إعلان

Header Ads

مقارنة قوية بين ريلمي XT و سامسونج A51 و أوبو رينو 2f و شاومي MI 9T وحوش فئة ال 5000 جنيه | هاتف بلس

1/26/2020

مقارنة قوية بين ريلمي XT و سامسونج A51 و أوبو رينو 2f و شاومي MI 9T 

مقارنة بين ريلمي XT و سامسونج A51 و أوبو رينو 2F و شاومي MI 9T


نبذة سريعة عن الموبايلات

كنا وعدناكم اننا هنعمل مراجعة لسامسونج A51 بس كله عمل مراجعته فقررنا انهارده نعمل حاجة مختلفة وتكون حاسمة في قرارك لو نويت تشتري أي موبايل من دول سامسونج A51 أو ريلمي XT أو أوبورينو 2F أو شاومي MI 9T اللي كل موبايل فيهم لما نزل عمل قلبان خلونا نشوف مين بطل وحوش فئة 5000 جنيه، حاجة بسيطة قبل ما نبدأ الموضوع ده طويل شوية بس ممتع جداً فياريت كباية القهوة وعيش، كمان حاجة كنا هنحط موبايل نوكيا 7.2 معاهم بس الموبايل سعره نزل لأكتر من 700 جنيه فممكن نبقى نعمله مقارنة مع اي موبايل تاني في رينج سعره.

نظرة تفصيلية على كل موبايل

أولاً التصميم وبنية الموبايلات :

نبدأ بموبايل ريلمي XT اللي بيجي بأبعاد 75.2 × 158.7 ملم وسمكه حوالي 8.6 ملم ووزن 183 أما سامسونج A51 بيجي بأبعاد 158.5 × 73.6 وسمكه 7.9 ملم ووزنه 172 جرام أما بقى رينو 2F فجاي بابعاد 162.4 × 75.8 مع سمك 8.7 ملم ووزن 195 جرام وأخيراً MI 9T جاي بأبعاد 156.7 × 74.3 مع سمك 8.8 ملم ووزنه 191 جرام نسيبنا بقى من النقطة دي ونبص على الديزين والماتريال اللي الموبايلات جاية بيهم.
كلهم جايين بماتريال إزاز ومحمي بطبقة حماية جوريلا جلاس الجيل الخامس عدا سامسونج A51 اللي عليه طبقة حماية جوريلا جلاس 3 وكمان جاي بفريم بلاستيك زيه زي ريلمي XT ودي ميزة وعيب في نفس الوقت ميزة انه مش هيقشر زي الألومنيوم وعيب انه ضعيف مش هيستحمل الصدمة لو الموبايل وقع على جنبه، بالنسبة بقى لمسكات الموبايلات الأربعة في الايد فمسكتهم مريحة ومناسبة وأخفهم على الايد السامسونج كمان الموبايل جاي بثقب بالنسبالي بفضله عن النوتش اللي جاي في ريلمي XT لكن 2F و MI 9T جايين بشاشة كاملة مع سلايدر للسيلفي ودي حاجة حلوة انك تاخد شاشة كاملة لكن فيه ناس مبتحبش السلايدر وعندها خوف منه بالإضافة انه بيتقل وزن الموبايل كمان رينو 2F فيه انعكاسات الإضاءة مبهرة ورصة الكاميرات الأربعة بصورة جميلة ومدفونة جوة الازاز ملهاش بروز خالص مع وجود كرة خضرة من السراميك بتمتص الصدمات لو الموبايل وقع على ضهره بس معجبنيش الوزن التقيل اللي حوالي 200 جرام.
صورة بتوضح بروز الكاميرات ونحافة كل موبايل

بص من الآخر تصميم السامسونج جميل جداً وشياكة وأخفهم وزن وأنحفهم ورصة الكاميرات الأربعة بروزها قليل جداً لكن شكلها مش لطيف كمان أقلهم في طبقة الحماية بالنسبة لأوبو فهو شيك جداً لو انت بتحب السلايدر والحركات دي بس فريم بلاستيكي وهو اتقل واحد فيهم من حيث الوزن بالنسبة ل XT فيه برضو انعكاسات إضاءة جميلة بس بروز الكاميرات فيه كبير جداً بالنسبة الباقيين كمان تحس ان جودة الازاز ضعيفة وأخيراً ال MI 9T حاجة في النص بينهم الأربعة. 

الشاشات :

الشاشة في السامسونج وريلمي من نوع Super AMOLED موجود عليها طبقة حماية جوريلا جلاس 3 في سامسونج A51 وجوريلا جلاس 5 لل XT أما الشاشة في 2f و MI 9T فهي AMOLED أبعاد الشاشة فيهم 19.5:9 عدا السامسونج 20:9 كلهم بحجم 6.5 بوصة تقريباً وأكبر استحواذ شاشة سامسونج على 87.4% من جسم الهاتف بينما أقلهم ريلمي XT بنسبه 84.3% وده بيبين قد ايه النسب متقاربة كلهم جايين بدقة فل اتش دي بلس 2340 ×1080 بكسل فيما عدا MI 9T اللي زود الدقة سنة بسيطة 1080×2400 بكسل أما كثافة البكسلات حوالي 400 بكسل في البوصة الواحدة للموبايلات الأربعة الجميل بالنسبة لشاشة MI 9T انها بتدعم HDR.
وعملياً وعملياً الشاشات الأموليد بتقدم تجربة مشاهدة ممتازة من سطوع وألوان زاهية ومشبعة حتى في ضوء الشمس والصراحة ألوان شاشة A51 وتشبعها يخليها تستحق لقب أفضل شاشة فئة متوسطة لكن مفيهاش الخاصية جميلة من أوبو وريلمي هي Screen off clock اللي بتعرضلك الساعة والمكالمات الفائتة على الشاشة وهي مطفية لكنها مش بتعرضلك اي اشعارات تانية فيه مشكلة حصلت مع بعض المستخدمين على شاشة MI 9T وانها بتميل الأصفر لكن اعتقد انها حالات فردية ومتكررتش كتير.


منصة التشغيل :

الموبايلات الأربعة بتشتغل بأندرويد 9 باي وكلهم ليهم تحديث لأندرويد 10 ما عدا أوبو رينو 2f اللي لم تعلن أوبو عن نية إطلاق اصدار أندرويد 10 له حتى الآن وكل موبايل جاي بواجهة خاصة بيه ودي بتعتبر أذوراق كل واحد بيشوف واجهه أفضل من وجهة نظره فمش هنتكلم في النقطة دي كتير.


الذاكرة :

هنتكلم عن النسخ اللي موجودة في مصر بس بالنسبة ل A51 النسخة الوحيدة المتوفرة للأسواق المصرية تأتي بذاكرة داخلية بحجم 128 جيجابايت مع ذاكرة وصول عشوائي بسعة 6 جيجا رام من نوع 2.0 UFS وتوجد إمكانية لإضافة كروت ذاكرة خارجية حتى سعة 512 جيجابايت في منفذ مخصص بالنسبة لرينو 2f جاي بذاكرة داخلية بحجم 128 جيجابايت مع ذاكرة وصول عشوائي بسعة 8 جيجا رام من نوع 2.1 UFS حاله حال ابن عمه XT والاتنين ينفع تركبلهم كارت ميموري خارجي حتى 512 جيجابايت في منفذ مخصص عكس MI 9T اللي جاي بذاكرة داخلية بحجم 64 أو 128 جيجابايت مع ذاكرة وصول عشوائي بسعة 6 جيجا رام بس خد بالك مينفعش تركبله كارت ميموري خارجي إطلاقاً.
الرامات 8 جيجا هتخليك تشغل تطبيقات كتير في الخلفية وهتساعد المعالج انه يأدي مهام كتيرة في وقت واحد وبكده ولاد العم 2F و XT اتفوقوا في النقطة دي ونقطة تركيب ميموري خارجي اللي مش موجوده في الشاومي.


الأداء :

بص يا سيدي طبعاً انت هتقول ان أوبو و XT أحسن في الأداء عشان رام أعلى فهقولك لأ بص على المعالج الأول، انت عندك MI 9T أقواهم في المعالج وشاومي استخدمت سناب دراجون 730 بمعمارية تصنيع 8 نانوميتر يليه في القوة ال XT اللي جاي بمعالج سناب دراجون 712 بمعمارية تصنيع10 نانوميتر وبعدهم الرينو 2F واللي نازل بمعالج قديم من ميديا تك Helio P70 بمعمارية تصنيع 12 نانوميتر أما سامسونج بعد ما ظبطت الموبايل في الديزين والشاشة وعملت العجب جات على المعالج واسترخصت فاستخدمت معالج 9611 Exynos بمعمارية تصنيع 10 نانوميتر.
من ناحية المعالج فشاومي mi 9t قدملك أقوى معالج في الفئة دي وبعده ال XT اللي كنت اتمنى ريلمي تميز الموبايل ده عن ريلمي 5 برو اللي أقل منه في السعر إنما كلامي بقى لأوبو اللي استخدمت معالج قديم hello P70 بيعادل سناب دراجون 660 واللي استخدموا أوبو في F11 و F11 pro وموجود في موبايلات بسعر أقل بكتير من 2F وعندك ريلمي 5 برو بسعر أقل 2000 جنيه وفيه معالج سناب دراجون 712 أفضل من P70 بتاع 2F، وكذلك الأمر بالنسبة ل A51 حيث المعالج ده موجود في M30s بسعر أقل حوالي 1500 جنيه.


الكاميرا :

الكاميرا الخلفية في حالة الشاومي ثلاثية الأولى بدقة 48 ميجابكسل ببعد بؤري 26mm وبفتحة عدسة واسعة F1.8 بحجم بكسل 0.8 ميكرون مزودة بخاصية الفيز ديتيكشن اوتو فوكس أما الثانية فبدقة 8 ميجابيكسل ببعد بؤري 53mm وبفتحة عدسة أضيق F2.4 وهي عدسة telephoto للتصوير عن بعد وفيها 2X مرتين زوم بصري والكاميرا الثالثة فبدقة 13  ميجابكسل ببعد بؤري 12mm وبفتحة عدسة F2.4 مسؤولة عن التصوير الواسع ultrawide مع فلاش خلفي مزدوج Dual-LED وبتصور فيديو بدقة 4K  بسرعة 30 إطار في الثانية أو فل اتش دي بسرعة بتوصل 960 إطار في الثانية.
نخش على كاميرا ريلمي XT واللي هي نقطة القوة في الموبايل وجاي بأربع كاميرات خلفية الأولى بدقة 64 ميجابكسل بفتحة عدسة واسعة F1.8 بحجم بكسل 0.8 ميكرون للتصوير الوايد جاية بمستشعر سامسونج ISO CELL GW1 وده مستشعر ممتاز ومزودة بخاصية الفيز ديتيكشن اوتو فوكس والثانية بدقة 8 ميجا بكسل وفتحة عدسة F2.3 ذات بعد بؤري 13mm للتصوير بزوايا واسعة للغاية ultrawide والكاميرا الثالثة فبدقة 2 ميجابكسل وفتحة عدسة F2.4 مخصصة لتصوير الماكرو والكاميرا الرابعة فهي فقط مسؤولة عن العمق بدقة 2 ميجابكسل وفتحة عدسة F2.4 ،الكاميرات جاية مع فلاش أحادي وبتقدر تصور فيديو بدقة 4K بسرعة 30 إطار في الثانية أو فل اتش دي بسرعة 120 إطار في الثانية أو اتش دي بسرعة 960 إطار في الثانية الواحدة مع وجود مثبت إلكتروني.
أما كاميرات رينو 2F رباعية الأولى بدقة 48 ميجابكسل ببعد بؤري 26mm وبفتحة عدسة واسعة F1.7 تأتي بمستشعر S5KGM1SP من سامسونج مزودة بخاصية الفيز ديتيكشن اوتو فوكس وزوم ديجيتال حتى 10X والثانية فبدقة 8 ميجابيكسل ببعد بؤري 13mm وبفتحة عدسة أضيق F2.2 وهي عدسة ultrawide للتصوير بزوايا عريضة والكاميرا الثالثة فبدقة 2 ميجابكسل وفتحة عدسة F2.4 مخصصة لتصوير الأبيض والأسود والكاميرا الأخيرة فتأتي بدقة 2 ميجابكسل وفتحة عدسة F2.4 مسؤولة عن قياس العمق والكاميرات جاية مع فلاش خلفي مزدوج Dual-LED وبتصور فيديو بدقة فل اتش دي بسرعة 30 إطار في الثانية مع وجود مثبت إلكتروني أثناء تصوير الفيديو.
بالنسبة ل A51 فالكاميرا الخلفية رباعية الأولى بدقة 48 ميجابكسل ببعد بؤري 26mm وبفتحة عدسة F2.0 بحجم بكسل 0.8 ميكرون مزودة بخاصية الفيز ديتيكشن اوتو فوكس أما الثانية فبدقة 12 ميجابيكسل ببعد بؤري 13mm وبفتحة عدسة أضيق F2.2 وهي عدسة ultrawide والكاميرا الثالثة فبدقة 5 ميجابكسل وبعد بؤري 40mm وفتحة عدسة F2.4 مخصصة لتصوير الماكرو والكاميرا الأخيرة فتأتي بدقة 5 ميجابكسل وفتحة عدسة F2.2 مسؤولة عن قياس العمق،وبيجي معاهم فلاش أحادي وبتقدر تصور فيديو بدقة 4K بسرعة 30 إطار في الثانية أو فل اتش دي بسرعة 120 إطار في الثانية مع وجود مثبت إلكتروني.
الحقيقة الريلمي XT برنس جداً في التصوير مش عشان الأرقام لأن فعلاً أداء الكاميرا ممتاز في أغلب ظروف الإضاءة سواء كانت جيدة أو ضعيفة أو حتى المنعدمة وهتحس بفرق فعلاً عن 48 ميجابكسل وفرق كبير من حيث التفاصيل والشارب والوضوح ومعالجة الصور بفضل مستشعر GW1 الممتاز من سامسونج وحاجات كتير ودي النقطة اللي ريلمي بتحاول تسوق الموبايل على أساسها بس نقطة الكاميرا الماكرو محتاجة شوية تظبيط واعتقد ان محدش بيستخدمها.
أما بالنسبة لتصوير الفيديو فاقواهم MI 9T اللي هيديك دقة فور كيه بسرعة 30 إطار في الثانية أو فل اتش دي بسرعة 960 إطار في الثانية الواحدة يعني صباح السلو موشن بس يعيبه انه مفيش مثبت إلكتروني لتقليل الاهتزازات الناتجة عن الحركة واللي موجود في XT اللي بيديك دقة الفور كيه برضو بس XT هيديك فل اتش دي بسرعة 120 إطار في الثانية وبيديك 960 فريم على الاتش دي بس ويجي بعديهم A51 وأخيراً أوبو رينو 2F اللي مبيصورش فور كيه من الأساس.
بالنسبة للكاميرا الاماميه ف MI 9T و رينو2F جاين بسلايدر بوب اب والكاميرا في MI 9T جاية بدقة 20 ميجابكسل بفتحة عدسة F2.2 بينما رينو فدقتها 16 ميجابكسل بفتحة عدسة F2.0 ودي نفس مواصفات كاميرا السيلفي لل XT أما بقى A51 فجاي بكاميرا 32 ميجابكسل بفتحة عدسة F2.2 وكلهم بيصورو فيديو بدقة فل اتش دي بسرعة 30 إطار في الثانية.
من الأرقام هتقول ان السامسونج أفضل بس بالعكس ال A51 اقلهم في جودة الصور زي MI 9T لأن أضيقهم في فتحة العدسة وفي الإضاءة الضعيفة هيظهر معاك نويز كتير أما XT مازلت مصمم على رأي انه أحسن كاميرا سيلفي في فئة 5000 جنيه وبتديلك عزل ممتاز ولون بشرة واقعي بالنهار وبالليل جودتها مقبولة أيضاً بفضل مستشعر سوني IMX 471 المتطور كذلك الأمر بالنسبة لكاميرا 2F اللي قريبه من XT جداً.


الصوت :

كلهم جايين بسماعة خارجية واحدة تحت على اليمين بإستثناء XT اللي السماعة تحت على الشمال وكلهم صوتهم مجسم وواضح ونفس الكلام لصوت سماعة المكالمات رائع و ممتاز بالإضافة لوجود منفذ السماعات التقليدي 3.5mm فيهم كلهم.
التجربة الصوتية مكنش فيها مشاكل خالص بإستثناء نقطة السماعة اللي تحت على الشمال في XT وده هيخليك تكتم الصوت وانت ماسك الموبايل بتلعب أو بتشوف فيديوهات لكن كجودة فالصوت واضح والسماعة بتطلع جودة صوت جيدة وبالنسبة لسماعة المكالمات فصوتها مفيهوش مشاكل .


الاتصالات والحساسات :

كلهم بيدعموا واي فاي 802.11 بترددات a/b/g/n/ac بالإضافة لدعم خاصية dual-band وخاصية WI-FI Direct والهوتسبوت لمشاركة الموبايل داتا.
كمان كلهم بيدعموا بلوتوث الإصدار 5.0 مع دعمه لخاصية A2DP وخاصية LE بإستثناء رينو 2F اللي جاي ببلوتوث 4.2 ودي نقطة مش مهمة لأغلب المستخدمين إلا لواحد بيستخدم سماعات بلوتوث وعايز اتصال قوي ومزامنة في نفس الوقت للموسيقى.
نظام التموضع العالمي GPS مع دعمه لأنظمة ملاحة A-GPS ونظام الملاحة GLONASS ونظام BDS ونظام الملاحة GALILEO
يوجد دعم لموجات الراديو FM، لكن مبيدعموش خاصية الاتصال قريب المدى NFC بإستثناء A51 و MI 9T ولا بيدعموا مستشعر الأشعة تحت الحمراء حتى الشاومي.
كمان كلهم جايين بمستشعر قارئ البصمة مدمج في شاشة الهاتف من الأسفل كمان بيدعموا Face Unlock بس بطئ سنة في حالة A51.
كما يوجد به مستشعرات التسارع والتقارب وتوجد بوصلة وحساس جيروسكوب لدعم تشغيل تطبيقات الواقع الافتراضي وحساس الضوء.


المنافذ :

كلهم جايين بمنفذ يو إس بي Type-C 1.0 الجيل الأول الإصدار التاني مع دعمه لخاصية الاتصال العكسي بالإضافة لخاصية OTG.
منفذ سماعات الرأس التقليدي 3.5mm jack
منفذين لتركيب شريحتين اتصال من النوع نانو SIM ومنفذ خاص لكارت الميموري بإستثناء MI 9T اللي مبيدعمش تركيب ميموري خارجي على الإطلاق.


البطارية :

كل البطاريات من نوع بوليمرات الليثيوم غير قابلة للازالة بسعة 4000 مللي أمبير لكن المميز ل reno 2f و XT انهم بيدعموا الشحن السريع بقدرة 20 وات مع دعم لخاصية VOOC flash Charge 3.0 يجي بعدهم MI 9T اللي بيشحن بقدرة 18 وات وأخيراً A51 اللي بيشحن بقدرة 15 وات بس، وأكيد كلهم مش بيدعموا الشحن اللاسلكي.
البطارية هتقضي معاك يوم أو حوالي 7 ساعات شاشة مفتوحة لو استخدامك للموبايل فوق متوسط بس ميزة XT و ابن عمه 2F انهم بيشحنوا بسرعة حوالي ساعة ونص بالكتير إنما A51 هيشحن معاك في ساعتين إلا ربع وال MI 9T حاجة في النص بينهم وأعتقد أن مسألة الربع ساعة مش زمن كبير يعني ومش هيكون فارق في قرارك فالبطاريات كلهم زي بعض تقريباً.


الخلاصة

سامسونج A51 تشتريه لو بتدور على موبايل خفيف على الايد واستخدامك ليه متوسط يعني أفلام وفيديوهات والشاشة هتساعدك بتجربة بصرية جميلة بس مش ألعاب وجرافيكس عشان المعالج الضعيف نسبياً ولو وحابب شكل الشاشة اللي بخرم ولو انت شايل الموبايل عشان يهمك براند سامسونج، انما ريلمي XT تشتريه لو بتدور على موبايل متكامل بكاميرا جبارة سواء صبح أو ليل ولو انت من مدمني السيلفي وعايز خامات خارجية احسن وشحن اسرع ورام أكبر 8 بدل 6 ومعالج سناب دراجون اقوى، والأوبو تشتريه لو عايز تصميم فخم وشيك وحركات سلايدر للسيلفي وبطارية بتدعم الشحن السريع وبتشحن في ساعة ونص ولو انت من محبي أوبو اللي بتهتم بتقفيل المنتج النهائي وتستخدم أفضل الخامات إنما لو عايز أداء قوي في الألعاب فالأفضل تسيبك من كل ده وتروح جري لشاومي mi 9t اللي أقواهم في المعالج بتاعه.


أسعار موبايلات A51 و XT و MI 9T و رينو2F

الأسعار الرسمية هي 5990 جنيه لرينو 2F وسعره دلوقت وصل ل 5500 في المحلات وربما أقل للنسخة الوحيدة المتوفرة للأسواق المصرية 128 جيجا مع 8 جيجا رام، أما XT فسعره الرسمي 5490 للنسخة الوحيدة 128 مع 8 جيجا رام وسعره بيوصل في المحلات أقل من كده حوالي 300 جنيه، بينما A51 فسعره الرسمي 5350 جنيه للنسخة 128 مع 6 جيجا رام وبيوصل سعره في المحلات حوالي 4800 جنيه، وأخيراً سعر MI 9T الرسمي 5666 للنسخة 64 مع 6 جيجا رام و 5999 جنيه للنسخة 128 جيجا مع 6 جيجا رام ودي اللي بننصح بيها عشان مفيش مكان لكارت الميموري والأسعار في المحلات بتوصل 5000 جنيه.

ملحوظة بسيطة حاولت على قد ما اقدر اجيب النقط المهمة واللي تهمكوا واختصر الحاجات اللي مش مهمة عشان الموضوع ميطولش اكتر من كده، ومحتاج دعمكم الفترة دي عشان نعمل محتوى قوى يفيدكم ان شاء الله.