 |
| مراجعة Samsung galaxy note10 lite |
موبايل Samsung note 10 lite سامسونج نوت 10 لايت
سامسونج نزلت Samsung galaxy note 10 lite سامسونج نوت 10 لايت للسوق المصري اللي بيديك مميزات النوت بسعر قليل ومناسب في خطوة عظيمة من سامسونج لجذب شريحة أكبر من المستخدمين لسلسلة النوت، والهاتف يعتبر فلاجشيب على صغير، وعشان سامسونج تعملك نوت بالسعر ده فأكيد هيبقى فيه تنازلات فخلونا نشوف هل التنازلات دي ممكن تأثر على الموبايل.
نظرة تفصيلية على هاتف Samsung note 10 lite سامسونج نوت 10 لايت
أولاً التصميم وبنية موبايل سامسونج نوت 10 لايت :
موبايل سامسونج note 10 lite بيجي بأبعاد 76.1 × 163.7 ملم وسمكه 8.7 ملم ووزن الهاتف يصل إلى 199 جرام كمان الموبايل بيجي بضهر بلاستيك (مع اختلاف المسميات زي ما سامسونج بتسميها جلاستيك لكن في الأول والأخير الماتريال بلاستيك) وجاي بفريم من المعدن بيدي الموبايل شوية متانة.
كماتريال الموبايل بعيد تماماً عن ماتريال النوت وتصاميمها والواحد مقفول من بلاستيك سامسونج الحقيقة بعد فضيحة A71 ممكن تشوفها من هنا بس خليك عارف إن ده من التنازلات اللي سامسونج عملتها عشان تديك نوت بسعر قليل
لكن كديزين الموبايل ألوانه وانعكاسات الإضاءة مطفية عن النوت 10 بلس أو حتى العادي بالإضافة إلى أنه تقيل نسبياً حوالي 200 جرام عشان الفريم المعدن ووزن القلم فصعب تستخدمه بإيد واحدة عشان كبير وتقيل، ورصة الكاميرات التلاتة بشكل حرف L اللي خلاص اتعودنا على ده من سامسونج وبقى التريند، مع بروز للكاميرات صغير جداً يكاد يكون مش موجود الكاميرات فعلاً فلات مع ضهر الموبايل بالنسبة لثقب كاميرا السيلفي فهو أصغر من 71A و 51A يكاد يكون مش موجود ومش هياخد عينك وانت بتتفرج سهل جداً تنساه.
كان نفسي سامسونج تزين الديزين الجميل ده بخامات إزاز وكان الموبايل هيبقى تحفة فعلاً ودايماً بننصح بتركيب جراب في الموبايلات البلاستيك لأنها عرضة أكتر للخربشة والتبصم.
شاشة الهاتف :
الشاشة من نوع Super AMOLED بأبعاد 20:9 بحجم 6.7 بوصة بدون حواف تقريباً حتى الحافة السفلية صغيرة جداً مع وجود ثقب صغير بانش هول (خرم) وتستحوذ الشاشة على 86.6% من جسم الهاتف بدقة فهي فل اتش دي بلس 2400 ×1080 بكسل مع كثافة بكسلات 394 بكسل في البوصة الواحدة .
الموبايل جاي بكاميرا خلفية ثلاثية كلهم بدقة 12 ميجابكسل بس الكاميرا الأولى ببعد بؤري 27mm وبفتحة عدسة واسعة F1.7 بحجم بكسل 1.4 ميكرون مزودة بخاصية dual pixel فيز ديتيكشن اوتو فوكس وكمان فيها مثبت بصري للصور OIS، أما الثانية جاية ببعد بؤري 52mm وبفتحة عدسة أضيق F2.4 وهي عدسة telephoto للتصوير عن بعد مزودة أيضاً بخاصية الفيز ديتيكشن اوتو فوكس وخاصية التثبيت البصري OIS مع وجود زوم بصري 2X، أما الكاميرا الثالثة فبتيجي بفتحة عدسة F2.2 ببعد بؤري 12mm وهي عدسة ultrawide للتصوير بزوايا عريضة، والكاميرات التلاتة جاية مع فلاش خلفي أحادي LED.
لما نقول شاشة من سامسونج فأنت بتتكلم في شاشة ممتازة ورائعة فما بالك لما تكون الشاشة سوبر اموليد وبتدعم تقنية HDR فالشاشة هتديك تجربة مشاهدة ممتازة ودرجة عالية من السطوع ودرجة منخفضة من عدم السطوع وألوان زاهية حتى في ضوء الشمس،الصراحة تجربة مشاهدة الفيديوهات والأفلام ممتعة للغاية.
أينعم دقة الشاشة مش +QHD أو Dynamic Amoled زي أخوه الكبير بس دي كمان أحد التنازلات، كمان مفيش إعلان رسمي عن طبقة الحماية إلا أن بعض المواقع بتقول انها جوريلا جلاس 5 وعلى العموم الموبايل بيجي متركبله اسكرينة بشكل مسبق فحاول متشلهاش خالص.
منصة التشغيل :
موبايل Samsung note 10 lite بيشتغل بواجهة سامسونج 2.0 One UI المبنية على أندرويد 10.
الموبايل جاي بأحدث أنظمة تشغيل على مستوى العالم حالياً سواء الأندرويد أو الواجهة One UI 2 واللي اتحسنت كتير وبقت سلسلة وأسرع عن واجهات سامسونج اللي قبل كده.
الذاكرة :
النسخة اللي نازلة مصر جايه بذاكرة داخلية بحجم 128 جيجابايت من نوع 2.1 UFS Storage مع ذاكرة وصول عشوائي رامات بحجم 8 جيجا رام من نوع LPDDR4X وينفع تركب كارت ميموري خارجي حتى سعة 1 تيرابايت لكنه يستخدم منفذ الشريحة الثانية.
الأداء :
الموبايل جاي بمعالج سامسونج Exynos 9810 ثماني النواة بأقصى تردد يصل 2.7 جيجاهرتز للنواتين شغال بمعمارية 64 بت وبدقة تصنيع 10 نانوميتر، وجاي معاه معالج رسوميات Mali-G72 MP18.
المعالج ده بالرغم انه موجود في النوت 9 بس هو معالج قديم بقاله حوالي سنتين إلا أنه أقوى من سناب دراجون 730 ويتفوق عليه لكن لما تقارنه بمعالجات الفلاجشيب فلأ المعالج ده أقل يعني من الآخر المعالج ده وسط بين معالجات الفئة المتوسطة العليا وبين معالجات الفلاجشيب.
ولما نبص على أداء الموبايل فهو شبه صاروخي مع واجهة سامسونج الجديدة اللي شالو أنيميشن كتير فالمعالج بيديك أداء سريع مفيهوش مشاكل.
الكاميرا :
 |
| كاميرا النوت 10 لايت |
الموبايل جاي بكاميرا خلفية ثلاثية كلهم بدقة 12 ميجابكسل بس الكاميرا الأولى ببعد بؤري 27mm وبفتحة عدسة واسعة F1.7 بحجم بكسل 1.4 ميكرون مزودة بخاصية dual pixel فيز ديتيكشن اوتو فوكس وكمان فيها مثبت بصري للصور OIS، أما الثانية جاية ببعد بؤري 52mm وبفتحة عدسة أضيق F2.4 وهي عدسة telephoto للتصوير عن بعد مزودة أيضاً بخاصية الفيز ديتيكشن اوتو فوكس وخاصية التثبيت البصري OIS مع وجود زوم بصري 2X، أما الكاميرا الثالثة فبتيجي بفتحة عدسة F2.2 ببعد بؤري 12mm وهي عدسة ultrawide للتصوير بزوايا عريضة، والكاميرات التلاتة جاية مع فلاش خلفي أحادي LED.
سامسونج محبتش تتفزلك وتحطلك أرقام كبيرة زي 48 و 64 ميجابكسل والكلام ده وحططلك حاجة بسيطة وعملية وتقضي الغرض في نفس الوقت، وبالنسبة لأداء الكاميرات على أرض الواقع فالصور فيها كمية دايناميك رينج رهيبة وتفاصيل كتيرة بالرغم من عدد البكسلات القليل، الحقيقة سامسونج في وجهتها الجديدة 2 One UI عملت طفرة في معالجة الصور، بالإضافة إن الصور فيها تفاصيل وشارب ووضوح عالي.
بس مش كل الدنيا وردي لأن نقطة التصوير الليلي محتاج يتظبط سنة بسيطة من حيث الوايت بلانس فالصور بتميل للون للأصفر بصورة كبيرة مش مريحة للعين كمان في وضع البورتريه في غلطات بسيطة في العزل أكثرها بالليل ممكن متلاحظهاش بس بشكل عام الكاميرا ممتازة وتقدر تعتمد عليها.
كاميرا الالترا وايد زي ما قولنا قبل كده بتديك زوايا عريضة جداً وسامسونج قدرت تعالج التشوه distortion الكبير اللي كان بيطلع من كاميرا الترا وايد في موبايلاتها قبل كده وأصبحت الكاميرا بتديلك زاوية واسعة للغاية يعني من الآخر سامسونج أفضل كاميرا وايد أنجل.
سامسونج محطتش كاميرا ماكرو في الموبايل ده بالرغم انها بقت موجوده في كل الموبايلات دلوقتي بس أعتقد أن سلسلة النوت مبتهتمش بالكاميرا بقدر اهتمامها بالأداء.
بالنسبة بقى لتصوير الفيديوهات فالموبايل بيصور بدقة فور كيه بسرعة 60 إطار في الثانية أو فل اتش دي بسرعة بتوصل 240 إطار في الثانية الواحدة ويوجد مثبت إلكتروني أثناء تصوير الفيديو لتقليل الاهتزازات الناتجة عن الحركة.بالنسبة للكاميرا الاماميه فهي تأتي بدقة 32 ميجابكسل ببعد بؤري 25mm بفتحة عدسة F2.2 وبحجم بكسل 0.8 ميكرون وبتصور فيديو بدقة فل اتش دي بسرعة 30 إطار في الثانية الواحدة .
كاميرا السيلفي تقريباً هي هي الموجودة في 71A ونفس تعليقنا عليها، فيها تحديد الأطراف وعزل ممتاز ولون بشرة واقعي بالنهار وبالليل جودتها مقبولة لكن أتمنى أن الداينامك رينج بتاعها يتحسن عن كده وتبقى زي الكاميرا الخلفية.
سماعة الهاتف :
سماعة خارجية تحت على اليمين صوتها عالي وواضح بالإضافة لوجود منفذ السماعات التقليدي 3.5 ملم.
السماعة بتطلع جودة صوت كويسة بس صوتها مش أعلى حاجة بدرجة تجسيم ممكن متكنش أحلى حاجة بس مقبولة ودي برضو أحد التنازلات.
الاتصالات والحساسات :
واي فاي 802.11 بترددات a/b/g/n/ac بالإضافة لدعمه خاصية dual-band وخاصية WI-FI Direct والهوتسبوت لمشاركة الموبايل داتا.
بلوتوث الإصدار 5.0 مع دعمه لخاصية A2DP وخاصية LE
نظام التموضع العالمي GPS مع دعمه لأنظمة ملاحة A-GPS ونظام الملاحة GLONASS ونظام BDS ونظام الملاحة GALILEO
يوجد مبيدعمش أي موجات راديوية، لكن بيدعم خاصية الاتصال قريب المدى NFC.
مستشعر البصمة أوبتيكال مدمج في شاشة الهاتف من الأسفل والبصمة اتحسنت كتير عن السابق حتى أسرع من A71 ودلوقتي تقدر تعتمد عليه بشكل كلي كمان الموبايل بيدعم Face Unlock.
الموبايل فيه مستشعرات التسارع والتقارب وتوجد بوصلة وحساس جيروسكوب لدعم تشغيل تطبيقات الواقع الافتراضي وحساس الضوء.
استقبال الشبكة فيه مشاكل بسيطة الشبكة معظم الوقت بتبقى متوسطة إلا لو طلعت في مكان مفتوح ولو كنت في الدور الأرضي مثلاً بتلاقي الشبكة ضعيفة جداً ممكن تقلل استقبال الشبكة ل 3G وهيلقط معاك كويس فى أغلب الأماكن.
المنافذ :
منفذ يو إس بي 1.0 Type-C الجيل الأول الإصدار التاني مع دعمه لخاصية الاتصال العكسي.
منفذ سماعات الرأس التقليدي 3.5mm jack
منفذين لتركيب شريحتين اتصال من النوع نانو SIM أو شريحة اتصال واحدة مع كارت ميموري.
البطارية :
بطارية سامسونج نوت 10 لايت من نوع بوليمرات الليثيوم غير قابلة للازالة بسعة 4500 مللي أمبير بتدعم الشحن السريع بقدرة 25 وات لكنها مش بتدعم الشحن اللاسلكي.
البطارية هتقضي معاك يوم ونص من الاستخدام المتوسط والجميل انها بتشحن بقدرة 25 وات يعني لما تفضى هتشحن في ساعة وربع ساعة وتلت بالكتير.
أداء المعالج سيئ في توفير الطاقة بيخلي البطارية تفضي بسرعة متحسش ان دي سعة 4500 مللي, كمان كان نفسي الموبايل يدعم الشحن اللاسلكي زي أخوه الكبير وخاصة بقى فيه موبايلات كتير بتدعم الشحن اللاسلكي في رينج سعره بس دي برضو واحدة من التنازلات.
مميزات قلم S-pen
القلم من البلاستيك بوزن خفيف, بيشحن جوا جسم الموبايل.
إمكانية الكتابة على شاشة الموبايل المطفية علشان لو عاوز تدون ملاحظات سريعة وتبقى تبص عليها بعدين.
القلم فيه وضع الترجمة الفورية اللي بيتيحلك انك تقف على كلمة ويترجمهالك فورا من غير ما تعمل كوبي وتخرج من التطبيق.
الزرار الموجود في القلم تقدر تخليه يفتحلك تطبيق معين. وتقدر تتحكم في ابلكيشن الكاميرا وتصور من خلاله. او تقدر تقلب مثل في الاغاني الي انت بسمعها او توقف وتشغل من خلال القلم.
كمان القلم بيتيحلك انك تقص حته من الشاشة وتكتب عليها.
دي تقريباً كل حاجة عن القلم، فهل انت محتاجه؟ هل تستخدم القلم علطول لو جبت الموبايل ولا كام يوم وبعد كدا هتنسى انك جايب موبايل بقلم؟
عيوب موبايل Samsung note 10 lite :
✖ الموبايل جاي بخامات بلاستيك عرضة للتبصم
✖ المعالج قديم شوية بس أداءه كويس جداً
✖ مينفعش تركب شريحتين وكارت ميموري في وقت واحد
✖ مفيش لمبة الاشعارات بس الشاشة بتدعم Always-on display
✖ شبكة الموبايل مش أحسن حاجة
مميزات الموبايل سامسونج نوت 10 لايت :
✔ قلم S-pen بيؤدي مهام لا بأس بها
✔ شاشة سوبر اموليد بألوان زاهية ودرجات سطوع كبيرة
✔ أحدث واجهة من سامسونج مع أحدث إصدار أندرويد
✔ أداء الكاميرا الخلفية ممتاز بتطلع صور واقعية وداينامك رينج عالي خاصة بالنهار
✔ تصوير فيديو فور كيه بسرعة 60 إطار في الثانية
✔ سعة البطارية كبيرة 4500 مللي أمبير وبتشحن في ساعة وربع
✔ الموبايل محافظ على منفذ 3.5 ملم وينفع تركبله كارت ميموري عكس أخوه نوت 10 العادي
محتويات علبة موبايل Samsung Galaxy note 10 lite
موبايل Samsung note 10 lite متركب عليه اسكرينة مسبقاً
قلم S-pen بالإضافة لسنون القلم
رأس شاحن سريع 25 وات وكبل USB Type-C
جراب ظهر للحماية
كتيب التعليمات والضمان ودبوس معدني لفتح منفذ الشريحة
سماعة أذن ومنفذ OTG
الخلاصة
موبايل Samsung note 10 lite بيديك مميزات النوت من حيث القلم والأداء الكويس وبنص سعر أخوه الكبير وده بيخليه مناسب جداً للي حابب يجرب سلسلة النوت من سامسونج بمميزاتها وبسعر أقل، بس خلي بالك من الخامات البلاستيك وأول حاجة بعد ما تجيب الموبايل تركبله الجراب ومتخلعهوش أبداً.
 |
| Samsung galaxy note 10 lite |
سعر موبايل Samsung Galaxy note 10 lite
التسعير الرسمي من سامسونج ل Samsung note 10 lite هو 8999 جنيه مصري للنسخة الوحيدة المتوفرة للأسواق المصرية 128 جيجا مع 8 جيجا رام وهو متاح للبيع الآن بشكل رسمي علي سوق.كوم.
أخيراً سامسونج استجابت لنقطة التسعير ونزلت الموبايل بسعر قريب من السعر العالمي بعد ما كانت بتنزل تسعير كبير في البداية بتلم بيه فلوس الإعلانات وبعدها بفترة قصيرة تلاقي التجار حرقوا الأسعار، وأنا شايف إن تسعير الموبايل ده مناسب والسعر مش هيقل عن كده إلا خلال فترة كبيرة مع ثبوت سعر الدولار.
