 |
مقارنة xiaomi redmi note 9 pro مع realme 6 |
مقارنة xiaomi redmi note 9 pro مع realme 6
أول ما ريلمي تنزل موبايل جديد وشاومي ترد عليها بالموبايل المنافس تلاقي خناقات مبتنتهيش على جروبات التقنية ده متعصب لريلمي وشايف موبايلها أفضل وواحد متعصب لشاومي شايف إن موبايلها احسن وواحد تاني فان لأوبو ملوش دعوة بالكلام ده وواحد تالت فان سامسونج ميعرفش مين ريلمي ولا شاومي أصلاً، وفيه ناس رزينة أكتر بتقارن ده بده بدون تعصب أو انحياز لبراند معين وتنصح المستخدم بالموبايل المناسب ليه وده اللي هنعمله انهارده من خلال مقارنة xiaomi redmi note 9 pro مع 6 realme ونشوف شاومي نوت 9 برو بيتفوق في اي وكذلك ريلمي 6 بيمتاز بإيه، لكن حابب انوه اني موضوع اليوم طويل وربما هو الأطول على الموقع حالياً وده بهدف ان يكون مرجع ان شاء الله لمن أراد شراء اي من الهاتفين.
نظرة تفصيلية على كل موبايل
التصميم والخامات:
البداية
مع موبايل شاومي redmi note 9
pro اللي جاي بماتريال زجاج مدعم بطبقة حماية
جوريلا جلاس 5 مع وجود
طبقة مقاومة للماء، مع فريم بلاستيكي، بينما 6 realme جاي
بماتريال بلاستيك بالكامل ومن الآخر شاومي متفوقة في نقطة الخامات بفارق كبير.
النوت 9 برو سمكه 8.8 ملم تقريباً زي سماكة موبايل ريلمي 6 اللي هي 8.9 ملم، وعلى ان الموبايلين تقريباً نفس السماكة إلا إن مسكة موبايل ريلمي 6 أفضل واخف على الايد حيث وزن الموبايل ككل 191 جرام وده مخلي مسكة هاتف ريلمي 6 اكثر راحة من مسكة الشاومي وده بسبب ان حجم الشاومي نوت 9 برو اكبر كمان وزنه اتقل 209 جرام بسبب استخدام خامات إزاز محترمة وقوية زي ما عودتنا شاومي في سلسلة النوت في الفترة الأخيرة .
من حيث الديزين بقى فالموبايلين تصميمهم تحفة وشياكة خاصة من الضهر بسبب انعكاسات الإضاءة المميزة في كل موبايل لكن انا حقيقة عجبني تصميم الريلمي أكتر اللي واخد روح ريلمي XT في شكل الانعكاسات اللي عبارة عن تدرج للون الأزرق من الفاتح للغامق وبيتجمعوا في نقطة في الأسفل وريلمي بتسمي التصميم ده "المذنب" والألوان بتاعته الأبيض والأزرق مخلياه روش وشبابي أكتر إنما تصميم نوت 9 تحسه مجرد تدرج للضوء فقط.
الشاشات:
الشاشة في الموبايلين
متشابهين في حاجات كتير زي مثلاً نفس النوع IPS LCD بنفس التصميم تصميم الثقب punch hole في المنتصف في حالة الشاومي
وعلى اليسار في حالة الريلمي، بنفس الدقة فل اتش دي بلس بنفس استغلال مساحة
الواجهة 84.5% من جسم الهاتف لكن كل موبايل
تميز في نقطة عن التاني في حالة note 9 pro تميز في السطوع العالي والوضوح
تحت أشعة الشمس بالإضافة لطبقة حماية جوريلا جلاس 5 بينما 6 realme بيتميز في نقطة معدل التحديث اللي بتوصل 90 هرتز ودي نقطة قوية جداً وده يعتبر أرخص موبايل بشاشة 90 هرتز حتى الآن بالإضافة لوجود طبقة حماية جوريلا جلاس 3، حجم الشاشة في الشاومي 6.67 بوصة اكبر من شاشة ريلمي 6 اللي حجمها 6.5 بوصة.
الشاشة في نوت 9 برو نفسها شاشة نوت 9s تعتبر أضعف حاجة في الموبايل مقارنةً مع لمنافسين فهي مش شاشة أموليد زي موبايل سامسونج M31 ولا هي شاشة 90 هرتز زي هاتف ريلمي 6، حتى جودة الشاشة مش ممتازة فيه شادو حولين ثقب السيلفي بيبان أكتر لما خلفية الشاشة تكون بيضة أو لو ركزت حولين الخرم هتلاحظ الظل فعلاً ولكن بدون ما نضخم الموضوع فده امر طبيعي يحصل مع اي ثقب في شاشة IPS لكن المختلف هنا انه أوضح أكتر وقد يكون ده راجع لكبر حجم الخرم.
نقطة حابب انوه ليها في شاشة ريلمي 6 واللي تعتبر أرخص شاشة 90 هرتز حتى الآن واللي هتديك سلاسة وسرعة في الاستخدام لكنها بتستنزف البطارية لكن ريلمي ضافت أوبشن تختار بين 60 أو 90 هرتز أو تخليه أوتو وهنصحك تخليه 60 هرتز علطول بإستثناء وانت بتلعب لأنك هتشوف فرق ملحوظ خاصة وانت بتلعب على فريم ريت عالي، ومن ناحية تانية تحافظ على حالة البطارية لأن 90 هرتز بتستنزف البطارية.
منصة التشغيل:
الموبايلين بيشتغلوا بأحدث نظام أندرويد وهو أندرويد 10 لكن كل شركة وليها السوفت وير أو الواجهة الخاصة بيها فالنوت 9 برو بيشتغل بواجهة شاومي 11 MIUI بينما ريلمي 6 بيشتغل بواجهة ريلمي المستقلة Realme UI.
الذاكرة:
الشاومي نوت 9 برو فيه خيارين للذاكرة 64 جيجا ذاكرة داخلية من نوع 2.1 UFS مع ذاكرة وصول عشوائي بسعة 6 جيجا رام أو 128 جيجابايت ذاكرة داخلية مع رامات 6 جيجا، وينفع تركب كارت ميموري خارجي بدون الاستغناء عن الشريحة الثانية.
وبالنسبة لريلمي 6 فجاي بنسختين الأولى بذاكرة داخلية بحجم 128 جيجابايت من نوع 2.1 UFS مع ذاكرة وصول عشوائي بسعة 4 جيجا رام والنسخة الثانية 128 مع 8 جيجا رام وبرضو ينفع تركب ميموري خارجي في منفذ مخصص بدون الاستغناء عن أي شريحة.
الرامات 6 جيجا في شاومي خلت الأداء أسلس عن نوت 9s وخلت الانيميشن أسرع من الآخر ساعدت في الأداء كتير، الرامات 8 جيجا في ريلمي كبيرة وهتساعد في أداء أقوى لكنها في المقابل رفعت سعر الهاتف في فئة سعرية المنافسة فيها شرسة.
الأداء:
نيجي بقى
للمعالجات واللي من نظري اهم عوامل قوة الموبايل عندك نوت 9 برو فيه
المعالج سناب دراجون الجديد 720G ثماني النواة بتردد يصل 2.3
جيجاهرتز وبتكنلوجيا تصنيع 8 نانوميتر
أما 6 realme جاي
بمعالج ميدياتك المخصص للألعاب Helio G90T
بتردد يصل 2.05 جيجاهرتز بتكنولوجيا تصنيع 12 نانوميتر.
شريحة 720G شريحة جديدة لسه مشفنهاش في موبايلات كتير وتعتبر تطوير لشريحة 712 السابقة بينما شريحة G90T شريحة معروفة بأداءها القوي في الألعاب خصوصاً شوفناها قبل كده في شاومي نوت 8 برو، نظرياً المعالج نوت 9 برو محقق 278 ألف نقطة فقط في اختبارات Antutu متأخر عن ريلمي 6 بفارق بسيط 10 ألف نقطة واللي حقق 288 الف نقطة.
الأداء سواء هنا أو هنا سريع جداً في المهام اليوميه من سوشيال ميديا وتصفح أو على مستوى الألعاب وهنتكلم عن النقطة دي بعد شوية، المعالج بيقدر يشغلك تطبيقات كتير في الخلفية من غير ما يقفل منها وطبعاً عدد التطبيقات على حسب حجم الرامات، لكن النقطة السلبية في هاتف ريلمي 6 فيه تنازل كبير في هاردوير المعالج وهو عدم وجود نظام تبريد والتنازل ده هتلاحظه مع الألعاب في ارتفاع عالي لدرجة حرارة الموبايل، وممكن مع الاستخدام الطويل يحصل تلف في المكونات الداخلية والنقطة دي مش هتبان غير مع الاستخدام الطويل، لكن فعلياً أداء 720G أفضل من G90T في الاستهلاك الأقل للطاقة وفي نقطة السخونة اللي مبيسخنش خالص إلا لو قرصت على الموبايل قوي في الألعاب لكن G90T أفضل في الألعاب.
المعالج الرسومي في note 9 pro هو 618 Adreno نفس معالج الجرافيكس الموجود في شريحة سناب دراجون 730 بينما معالج رسوميات 6 realme هو 4Mali-G76 MC.
الكاميرات:
بالنسبة للكاميرا الألتراوايد فالموبايلين متقاربين جداً في النتيجة لكن شاومي نوت 9 أفضل من حيث الجودة الجيدة جداً بالنهار والصور فيها تفاصيل اكتر وداينامك رينج عالي والتشوه عند الجوانب قليل جداً بفضل المعالجة التلقائية للتشوه اللي بيطلع منها، بينما ريلمي 6 فيه معالجة للتشوه وداينامك رينج عالي وربما أعلى من الكاميرا الرئيسية لكن اوفر اول النتيجة النهائية في صالح الشاومي.
كجودة فيديوهات فالحقيقة جودة الشاومي خرافية خاصة في وضع 4K من بتطلع الألوان زاهية والتباين واضح والدايناميك رينج عالي والنويز قليل اللي يكاد يكون مش موجود، والمميز كمان الموبايل بيسجل صوت الفيديو مجسم ستريو، والأميز من كل ده التثبيت الالكتروني اللي بيخلي حركة الكاميرا ناعمة جداً وبيشتغل كمان على الكاميرا الالترا وايد والحقيقة التثبيت في الشاومي أفضل من ريلمي 6 اللي تحس الفيديو فيه اهتزاز واضح حتى وانت مشغل وضع التثبيت لكنه بيديك بعض التثبيت وهو أفضل من عدم تفعيله فشوف بقى انت عاوز دقة فور كيه ولا عايز فيديو إلى حد ما ثابت بس فل اتش دي.
بالنسبة للكاميرات الاماميه عندك النوت 9 جاي بكاميرا سيلفي موجودة في ثقب بالمنتصف بدقة 32 ميجابكسل بفتحة عدسة F2.8 بينما ريلمي 6 جاي بكاميرا سيلفي موجودة في ثقب على اليسار دقتها 16 ميجابكسل بفتحة عدسة F2.0 والاتنين بيصورو فيديو سيلفي
بدقة فل اتش.
للوهلة الأولى هتقول ان كاميرا نوت 9 برو أفضل لكن الواقع عكس كده وده راجع لأن فتحة العدسة الضيقة في الشاومي واللي مش بتدخل كمية ضوء كبيرة عكس ريلمي 6 اللي فيه فتحه عدسة واسعة بتدخل كمية كبيرة من الضوء الأمر ممكن ميكنش واضح بالنهار في الإضاءة القوية لكن الأمر ده بيبان أكتر وانت بتتصور بالليل او ان دور زي كافيه أو قاعة مثلاً التفوق صريح لصالح ريلمي 6 وللأسف كاميرا السيلفي في الشاومي نوت 9 برو مش أفضل حاجة وسط فئتها، بالنسبة للون البشرة فاللون واقعي في الاتنين لكن أوقع حاجة بسيطة في ريلمي 6 بيخلي البشرة مايلة سنة بسيطة اوي للاحمر.
الصوتيات:
الاتنين جايين بسماعة خارجية
تحت على اليمين صوتها وواضح ونفس الكلام لصوت سماعة المكالمات بالإضافة لوجود منفذ
السماعات التقليدي 3.5mm فيهم كلهم.
بس الحقيقة جودة الصوت في ريلمي 6 متوسطة مش أعلى حاجة في موبايلات كتير أعلى منها زي شاومي نوت 9 برو صوته أعلى بكتير من ريلمي 6، صوت سماعات المكالمات في الهاتفين تمام ومفيهمش مشاكل، وكذلك صوت سماعات الأذن مع العلم انه لا يأتي في علبة الهاتفان سماعات الأذن.
الاتصالات والحساسات:
الاتنين
بيدعموا الواي فاي بخواصه المختلفة dual-band
وخاصية WI-FI Direct والهوتسبوت لمشاركة الموبايل داتا، كمان
الاتنين بيدعموا نفس اصدار البلوتوث 5.0.
الموبايلين
بيدعموا خاصية الاتصال قريب المدى NFC،
لكن شاومي note 9 pro بيدعم مستشعر الأشعة تحت الحمراء بينما
ريلمي 6 مبيدعمهاش.
الشبكة
عادية جدا زي ومفيهاش مشاكل بتلقط معاك كويس في معظم الأماكن حتى لو مكان مغلق في
الدور الأرضي مثلاً الشبكة هتلقط معاك لكن مش هتلقط كاملة وده طبيعي.
المنافذ:
الموبايلين
بيدعموا كل المنافذ المعروفة زي منفذ يو إس بي 1.0 Type-C الإصدار
التاني مع دعم لخاصية الاتصال العكسي بالإضافة لخاصية OTG،
ومنفذ سماعات الرأس التقليدي 3.5
ملم ومنفذين لتركيب شريحتين اتصال ومنفذ
مخصص لكارت الميموري والذي يفضله الكثير لزيادة المساحة الداخلية دون الاستغناء عن
أي شريحة اتصال.
البطارية:
بطارية note 9 pro
بتيجي بسعة 5020 مللي أمبير بتشحن بقوة 33 وات،
بينما 6 realme جاي
ببطارية أصغر 4300 مللي أمبير بتشحن بقدرة 30 وات.
بطارية 9 برو هتقعد معاك من 8 إلى 10 ساعات شاشة مفتوحة وده رقم ممتاز وراجع لأن شريحة سناب دراجون الجديدة 720G موفر جداً للطاقة عكس بطارية ريلمي 6 اللي هتقعد معاك بالكتير 7 أو 8 ساعات شاشة مفتوحة على وضع 60 هرتز وده رقم مقبول إلى حد كبير.
بطارية 9 برو هتاخد حوالي ساعة وربع أو ساعة وعشر دقايق شحن وده وقت ممتاز الحقيقة على بطارية ضخمة بحجم 5000 مللي أمبير، لكن هاتف ريلمي 6 بيشحن في مجرد ساعة أو ساعة إلا خمس دقايق الفرق مش كبير بس في المجمل التفوق لصالح الشاومي كأداء بطارية.
الخلاصة
موبايل شاومي نوت 9 برو تشتريه لو بتدور على خامات قوية محترمة وتصميم شيك بشاشة كبيرة وأداء مستقر مبيسخنش وبطارية ممتازة تصمد يوم ونص استخدام متوسط تنفعك لو بتسافر كتير مع كاميرا رئيسية ممتازة إلى حد كبير، أما ريلمي 6 تشتريه لو انت جيمر أكتر وعايز شاشة بتردد 90 هرتز وأداء رسومي أقوى وبطارية بتتشحن بالكامل في مجرد ساعة.
أسعار موبايلات شاومي redmi note 9 pro و 6 realme
من نظري ان أقل نسخة في الشاومي نوت 9 برو تعتبر أفضل نسخة بتقدم قيمة كويسة مقابل السعر بينما أعلى نسخة في ريلمي لا انصح بها لأنها وضعت نفسها داخل فئة قوية وهناك هواتف أفضل بنفس السعر
