مقارنة نوكيا 7.2 مع أوبو A9 2020 | هاتف بلس

مقارنة نوكيا 7.2 مع أوبو A9 2020 | هاتف بلس

نبذة عن موبايلات نوكيا 7.2 و أوبو A9 2020 

من حسن حظ نوكيا ان موبايلها نوكيا 7.2 سعره نزل أكتر من 700 جنيه فقولنا نعمله مقارنة مع موبايل تاني في رينج سعره مع موبايل منتشر برضو ومطلوب ووقع الاختيار على أوبو A9 2020، ولولا نزول سعر الموبايل كنا هنحطه في مقارنة قوية بين ريلمي XT و سامسونج A51 و أوبو رينو 2F و شاومي MI 9T وحوش فئة 5000 جنيه وكانت مقارنة قوية جداً أنصحك تبص عليها من هنا.

نظرة تفصيلية على كل موبايل

أولاً التصميم وبنية الموبايلات :

نبدأ بموبايل نوكيا 7.2 اللي بيجي بأبعاد 75.2 × 159.9 ملم وسمكه حوالي 8.3 ملم ووزن 180 جرام أما أوبو A9 2020 بيجي بأبعاد 163.6 × 75.6 وسمكه 9.1 ملم ووزنه 195 جرام، نسيبنا بقى من النقطة دي اللي أغلبكم مبيهتمش بيها بس فيه ناس وأنا واحد منهم بحب الموبايلات الخفيفة واللي سمكها رفيع ونبص على الديزين والماتريال اللي الموبايلات جاية بيهم.

موبايل نوكيا 7.2 جاي بماتريال بوليمر وهو عبارة عن مخلوط من الزجاج مع البولي كربونات مدعم بطبقة حماية جوريلا جلاس الجيل الثالث 3 مع فريم بلاستيك أما أوبو A9 2020 جاي بماتريال بلاستيك وازاز من قدام عليه طبقة حماية جوريلا جلاس 3+ أعلى من 3 العادية وكمان جاي بفريم بلاستيك وقلنا قبل كده ان دي ميزة وعيب في نفس الوقت ميزة انه مش هيقشر زي الألومنيوم وعيب انه ضعيف مش هيستحمل الصدمة لو الموبايل وقع على جنبه، بالنسبة بقى لمسكة الموبايلين في الايد فمسكة نوكيا 7.2 مريحة ومناسبة وخفيفة على الايد أما A9 2020 فالموبايل تقيل شوية لو مسكته لفترة طويلة.

من حيث الديزين بقى فموبايل نوكيا 7.2 تصميمه تحفة وشيك خاصة من الضهر بسبب رصة الكاميرات التلاتة في دائرة مع الفلاش وبيتوسطهم شعار Zeiss الألمانية ولما تطلع الموبايل في ايدك هتلاقي كل شوية حد يسألك ده اي الموبايل ده بس يعيبه بروز الكاميرات الزيادة بصورة كبيرة، أما A9 2020 فتصميمه كلاسيكي بس فيه انعكاسات الإضاءة مبهرة ورصة الكاميرات الأربعة بشكل رأسي وبروزها بسيط خالص عكس نوكيا 7.2 اللي بروز الكاميرات فيه زيادة حبتين.

بروز الكاميرات في نوكيا 7.2

ونلخص كل اللي فات فإن تصميم نوكيا 7.2 جميل جداً وشياكة وخفيف الوزن ورفيع بس بروز الكاميرات كبير جداً فلازم تركبله جراب ولما تحط الموبايل على ضهره تحطه براحة عشان متخبطش الكاميرات، لكن الأوبو مش لاقي فيه ميزة في الديزين مقارنة بالنوكيا بإستثناء انعكاسات الإضاءة. 

---

الشاشات :

الشاشتين من نوع IPS LCD موجود عليها طبقة حماية جوريلا جلاس 3 أبعاد الشاشة في نوكيا 7.2 19:9 بينما أوبو A9 2020 أبعادها 20:9 حجم الشاشتين متقارب جداً 6.3 بوصة في حالة نوكيا 7.2 بينما 6.5 بوصة في حالة أوبو A9 2020 حتى استحواذ الشاشات زي بعض تقريباً 82.5% من جسم الهاتف مع وجود نوتش waterdrop في كلتا الشاشتين وده بيبين قد ايه النسب متقاربة لكن لحد هنا واختلفو في الدقة فنوكيا 7.2 جاية بدقة فل اتش دي بلس 2280 ×1080 بكسل مع كثافة بكسلات 400 بكسل في البوصة الواحدة وبتدعم خاصية HDR10 مع خاصية always-on display أما 9A جاي بدقة اتش دي بلس بس 720 ×1600 بكسل مع بكثافة بكسلات أقل بكتير 270 بكسل في البوصة الواحدة ومفيهاش HDR.

وعملياً شاشة النوكيا بتقدم سطوع وألوان زاهية ومشبعة حتى في ضوء الشمس تخليها تقرب لشاشات الأموليد لكن مش زيها والكلام ده قولناه في مراجعة نوكيا 7.2، والأوبو فيه خاصية بتزود السطوع تحت الشمس عشان الشاشة تبان بوضوح عالي، فنقطة الشاشة التفوق فيها لصالح نوكيا 7.2 ومع ذلك متقدرش تلاحظ فرق قوي بين شاشة نوكيا 7.2 وبين شاشة A9 إلا لو دققت أو لو انت متعود على الشاشات الأموليد.

---

منصة التشغيل :

الموبايلين بيشتغلو بأندرويد 9 باي لكن النوكيا بيجي بواجهة خام أندرويد ون من جوجل بدون إضافات لكن أوبو A9 بيشتغل بواجهة 6.1 color OS.

الأندرويد الخام بيضمن سرعة وصول التحديثات لفترة بتوصل لسنتين وتلاتة للتحديثات الأمنية، بس الواجهة الخام في ناس بتعتبرها ميزة عشان سهولتها وسرعتها وفيه ناس بتعتبرها عيب لأنها مفيهاش إضافات كتير، الأندرويد الخام مش هيسمحلك تعمل نسختين من التطبيقات لكن المميز ان فيه خاصية ultimate storage with google photos واللي هيسمحلك ترفع عدد غير محدود من الصور  والفيديوهات على سيرفرات جوجل ودي خاصية كانت حكر على موبايلات جوجل بيكسل، على الجانب الآخر واجهة 6 color OS واجهة سلسة وسريعة وناس كتير حبتها بس ملينا منها وشوفناها في موبايلات كتير سواء لأوبو أو ريلمي.

---

الذاكرة :

هنتكلم عن النسخ اللي موجودة في مصر بالنسبة لنوكيا 7.2 النسخة المتوفرة للأسواق المصرية تأتي بذاكرة داخلية بحجم 128 جيجابايت مع ذاكرة وصول عشوائي بسعة 6 جيجا رام من نوع eMMC وبالنسبة لأوبو 9A فجاي بذاكرة داخلية بحجم 128 جيجابايت مع ذاكرة وصول عشوائي بسعة 8 جيجا رام من نوع 2.1 UFS والاتنين ينفع تركبلهم كارت ميموري خارجي حتى 512 جيجابايت في منفذ مخصص.

الرامات 8 جيجا بتدليك مساحة أكبر لتشغيل تطبيقات كتير في الخلفية وبتساعد المعالج انه يأدي مهام كتيرة في وقت واحد والتفوق هنا لأوبو A9 2020 بس تفوق بسيط.

---

الأداء :

لما نبص على المعالج هتلاقيهم متقاربين جداً عندك نوكيا 7.2 فيه المعالج سناب دراجون 660 ثماني النواة بتردد يصل 2.2 جيجاهرتز ومعمارية تصنيع 14 نانوميتر أما أوبو A9 2020 جاي بمعالج سناب دراجون 665 بتردد يصل 2.0 جيجاهرتز بمعمارية تصنيع 11 نانوميتر وأداءهم متقارب جداً بس الفرق بيبان لما تشغل جرافيكس أو ألعاب فأوبو A9 بيتفوق بفارق كبير بفضل معالج الرسوميات 610 Adreno بينما نوكيا 7.2 جاي بمعالج رسوميات أقل 512 Adreno.

أينعم أوبو اتفوقت على النوكيا هنا في الأداء بس فيه نقطة عايزك تبقى عارفها ان المعالجات دي قديمة خاصة 660 بقاله أكتر من سنتين وكمان موجودة في موبايلات بأقل من 3000 جنيه.

---

الكاميرا :

الكاميرا الخلفية في نوكيا 7.2 ثلاثية مع عدسات Zeiss الألمانية الأولى بدقة 48 ميجابكسل بفتحة عدسة واسعة f1.8 بحجم بكسل 0.8 ميكرون مزودة بخاصية الفيز ديتيكشن اوتو فوكس أما الثانية فبدقة 8 ميجابيكسل ببعد بؤري 13mm وبفتحة عدسة أضيق f2.2 وهي عدسة ultrawide والكاميرا الثالثة فبدقة 5 ميجابكسل وبفتحة عدسة f2.4 مسؤولة عن قياس العمق مع فلاش خلفي أحادي LED.

نخش على كاميرات 9A واللي جاي بأربع كاميرات خلفية الأولى بدقة 48 ميجابكسل بفتحة عدسة واسعة f1.8 بحجم بكسل 0.8 ميكرون مزودة بخاصية الفيز ديتيكشن اوتو فوكس والثانية بدقة 8 ميجا بكسل وفتحة عدسة f2.3 ذات بعد بؤري 13mm للتصوير بزوايا واسعة للغاية ultrawide والكاميرا الثالثة فبدقة 2 ميجابكسل وفتحة عدسة f2.4 والكاميرا الرابعة فهي فقط مسؤولة عن العمق بدقة 2 ميجابكسل وفتحة عدسة f2.4 ،الكاميرات جاية مع فلاش خلفي مزدوج Dual-LED.

كاميرات نوكيا عامة ممتازة لأنها بتستخدم عدسات Zeiss الألمانية الشهيرة وبالنسبة لأداء الكاميرات على أرض الواقع فهتديك نتايج ممتازة وتفاصيل كتيرة وحدية لكن في بعض الصور هتحس بضياع التفاصيل وده بسبب الذكاء الاصطناعي اللي أحياناً بيغلط، ووضع النايت مود بياخد وقت عشان يكون الصورة وبيحتاج ثبات لكن من وجهة نظري مفيهوش اختلاف عن الوضع الأساسي ومش بيديك تحسينات كتير، لكن ككل كاميرات نوكيا 7.2 أقوى وأكثر شارب وتفاصيل من الأوبو في ضوء الشمس لكن في الليل الجودة وحشة في الاتنين.

بالنسبة لتصوير الفيديو فالموبايلين بيصورو بدقة فور كيه بسرعة 30 إطار في الثانية أو فل اتش دي بسرعة 30 إطار في الثانية أيضاً مع وجود مثبت إلكتروني لكن التثبيت في حالة النوكيا أفضل وأكثر ثباتاً كمان لما تصور فيديو بالليل كاميرا A9 بتعمل نغمشة وبلور. 
بالنسبة للكاميرات الاماميه فنوكيا 7.2 جاي بدقة 20 ميجابكسل بفتحة عدسة f2.0 مع استخدام لعدسات Zeiss أيضاً بينما أوبو فدقتها 16 ميجابكسل بفتحة عدسة f2.0 برضو والاتنين بيصورو فيديو بدقة فل اتش دي بسرعة 30 إطار في الثانية.

جودة كاميرا السيلفي في الموبايلين تقريباً زي بعض سواء في ضوء النهار أو بالليل فالنتايج واحدة تقريباً مفيش فروقات كبيرة وإن كان صور نوكيا فيها سنة إضاءة بسيطة جداً ولون بشرة واقعي عن أوبو A9.

---

الصوت :

الاتنين جايين بسماعة خارجية تحت على اليمين صوتها وواضح ونفس الكلام لصوت سماعة المكالمات رائع و ممتاز بالإضافة لوجود منفذ السماعات التقليد 3.5mm فيهم كلهم.

بس الحقيقة التجربة الصوتية في A9 ممتازة وممتعة الصوت مجسم وواضح وفيها درجة بيز وبتدعم تقنية Dolby Atmos وكمان سماعة المكالمات بتشتغل مع السماعة الخارجية في نفس الوقت بيحسسك انك قاعد في المكان اللي جاي منه الصوت ومن نظري موبايل A9 2020 أحسن تجربة صوتية في فئته.

---

الاتصالات والحساسات :

الاتنين بيدعموا واي فاي 802.11 بترددات a/b/g/n/ac بالإضافة لدعم خاصية dual-band وخاصية WI-FI Direct والهوتسبوت لمشاركة الموبايل داتا.

كمان كلهم بيدعموا بلوتوث الإصدار 5.0 مع دعمه لخاصية A2DP وخاصية LE بالإضافة لخاصيتي EDR و aptXHD في حالة النوكيا.

نظام التموضع العالمي GPS مع دعمه لأنظمة ملاحة A-GPS ونظام الملاحة GLONASS ونظام BDS ونظام الملاحة GALILEO

يوجد دعم لموجات الراديو FM، لكن مبيدعموش خاصية الاتصال قريب المدى NFC ولا بيدعموا مستشعر الأشعة تحت الحمراء.

كمان جايين بمستشعر قارئ البصمة موجود في ظهر الهاتف لكن في حالة A9 مستشعر البصمة بيضاوي مش دائري هتاخد شوية على ما تتعود عليها كمان بيدعموا Face Unlock بس مش أسرع حاجة.

كما يوجد به مستشعرات التسارع والتقارب وتوجد بوصلة وحساس جيروسكوب لدعم تشغيل تطبيقات الواقع الافتراضي وحساس الضوء.

---

المنافذ :

نوكيا 7.2 جاي بمنفذ يو إس بي Type-C 1.0 الجيل الأول الإصدار التاني مع دعمه لخاصية الاتصال العكسي بالإضافة لخاصية OTG، أما A9 2020 جاي بمنفذ micro USB 2.0 مع دعم لخاصية OTG.

منفذ سماعات الرأس التقليدي 3.5mm jack

منفذين لتركيب شريحتين اتصال من النوع نانو SIM ومنفذ مخصص لكارت الميموري.

---

البطارية :

بطارية نوكيا 7.2 من نوع بوليمرات الليثيوم غير قابلة للازالة بسعة 3500 مللي أمبير لكن بتدعم الشحن بقدرة 10 وات، بينما A9 جاي ببطارية 5000 مللي أمبير بتشحن بقدرة 10 وات.

بطارية النوكيا يدوبك هتقضي معاك يوم استخدام متوسط وللأسف مبتدعمش شحن سريع فهتاخد حوالي ساعتين شحن وده وقت كبير، إنما أوبو بوظت الطبخة عشان نست تحط الملح، فالبطارية سعتها كبيرة 5000 مللي أمبير بس مبتدعمش شحن سريع فهتاخد حوالي 3 ساعات وأكتر شحن الموبايل هيجبلك شلل عشان يشحن 100% بس هتقضي معاك يومين واكتر استخدام متوسط.

---

الخلاصة

موبايل نوكيا 7.2 تشتريه لو بتدور على تصميم شياكة ملوش مثيل وشاشة ألوانها حلوة أحلي من شاشات IPS العادية وشبكة قوية ومستقرة في أغلب الأماكن مع كاميرات مرضية إلى حد كبير، أما أوبو A9 2020 تشتريه لو بتدور على بطارية أكبر وأداء أفضل بحاجات بسيطة أو لو عايز تعمل ابجريد لF11، وعموماً الموبايلين بيقدمو خامات محترمة وخدمة ما بعد البيع كويسة بالإضافة لثقة العملاء في الشركتين.

أسعار موبايلات نوكيا 7.2 و أوبو A9 2020  

الأسعار الرسمية هي 5200 جنيه لنوكيا 7.2 وسعره دلوقت وصل ل 4400 في المحلات وربما أقل للنسخة الوحيدة المتوفرة للأسواق المصرية 128 جيجا مع 6 جيجا رام، أما أوبو A9 2020 فلا اتذكر سعره الرسمي لكن متوسط سعره في المحلات حوالي 4500 جنيه للنسخة الوحيدة 128 مع 8 جيجا رام.

مش عارف ليه نوكيا بتحط تسعير عالي في البداية بعد كده بتنزل السعر وبنلاقيه في المحلات بسعر أقل بكتير وعشان كده أنا مرشحتش الموبايل لما عملتله مراجعة غير لما سعره ينزل لأنه ميستحقش أكتر من 4500 جنيه ودلوقتي سعره وصل 4300 يعني فرق 1000 جنيه تقريباً عن السعر الرسمي مش عارف ليه نوكيا بتنهج النهج ده!