 |
| realme 6 pro هاتف |
مراجعة هاتف realme 6 pro ريلمي 6 برو
أي
موبايل ريلمي نسخة برو بينزل زي realme 3 pro 5pro كان دايماً بيبقى أفضل
موبايل في فئته السعرية بدون منافس قوي وبيبقي محل ترشيح من كتير من المراجعين لكن
الأمر المرة دي مختلف مع ريلمي وبالتحديد مع هاتف realme 6 pro ريلمي 6
برو يلا نبدأ مراجعتنا.
موبايل realme 6 pro ريلمي 6 برو
تصميم realme
6 pro
الهاتف نازل بخامات زجاج مدعمة بطبقة
حماية جوريلا جلاس 5 مع إطار
بلاستيكي بسماكة 8.9 ملم ووزن
الموبايل ككل 202 جرام.
الخامات إزاز
ممتازة وقوية لكن تحس ان إزاز ريلمي أضعف من إزاز الشركات التانية مش عارف ليه،
طبقة الحماية هنا جوريلا جلاس 5 أفضل
من النسخة العادية اللي فيها جوريلا جلاس 3 مع وجود حماية ضد رذاذ الماء، وزن الموبايل تقيل 202 جرام وده راجع للخامات الازاز.
وفي الضهر
فيه 4 كاميرات
موجودة فوق على الشمال مترتبة جوه شكل مستطيل أسمر حوافه دائرية بارز شوية عن سطح
الموبايل لكن بيتغطي مع تركيب الجراب،
وموجود الفلاش خارج المستطيل، ترتيب تقليدي للغاية للكاميرات مفيهوش إبداع
وشوفناها كتير في موبايلات مختلفة لريلمي.
زراير الصوت
موجودة على اليسار زرارين منفصلين عن بعض في مستوى اصبع السبابة والوسطى، وعلى
الناحيه اليمين موجود زرار البصمة فوق نقطة المنتصف بقليل مناسب لاصبع الابهام
للشخص الأيمن أما الشخص الأيسر فصعب جداً استخدام زرار البصمة.
الديزين
الثقب أو الخرم cutout هو الترند وهو الحاجة اللي
ماشية اليومين دول فريلمي قالت نخش التريند احنا كمان، الثقب عريض لأنه بيحتوي على
كامرتين سيلفي واحدة رئيسية والتانيه التراوايد حاجة حلوه اننا نشوف كاميرا سيلفي
التراوايد وده كنت بتمناه من زمان، لكن مخلي حجم الثقب كبير فأنا أفضل انك تلغيه
من الاعدادات بوضع شريط اسود كامل.
الشاشة:
شاشة IPS فل اتش دي بلس 1080 × 2400 بحجم 6.6 بوصة بتصميم الخرم بانش هول
باستحواذ 84.7% من الواجهة مع
كثافة بكسلات 399 بكسل في البوصة
الواحدة بأبعاد 20:9 وتعمل الشاشة
بمعدل تحديث 90 هرتز.
الألوان حلوة ومشبعة وفيها وضع Vivid اللي بيشبع الألوان الموبايل بيجي متسستم عليه لكن الألوان مش
بدقة ألوان الشاشات الأموليد، و بعيداً عن نقطة الألوان فالشاشة ميزة وعيب في نفس
الوقت وخليني اديك الزتونة وأقلك اي هي الميزة والعيب، الميزة يا سيدي انها شغالة
بمعدل تحديث 90 هرتز وده يعتبر
تاني أرخص موبايل بشاشة 90 هرتز بعد ريلمي 6 العادي، العيب بقى انها شاشة
IPS
وكون الموبايل في فئة 5000 جنيه ففكرة الشاشة IPS مش متقبلة ويفضل تكون أموليد وشخصياً لو هفاضل بين شاشة IPS
بتردد 90 هرتز ولا شاشة
أموليد هختار الشاشة الأموليد، لكن في الأول والآخر هي تفضيلات.
نقطة كمان مش متقبلة في الشاشة هي سطوع الشاشة لأن السطوع
هنا ضعيف جداً أعلى درجة سطوع في وضع الأوتو 421 نيتس ودي درجة سطوع منخفضة
أوي وفعلاً هتعاني وانت بتستخدم الموبايل في الشمس، درجة سطوع اللون الاسود 0.31 ودي درجة قليلة
هتيحلك تستخدم الموبايل في الضلمة بدون ما تأذي العين جامد.
الواجهة:
الموبايل بيشتغل بواجهة ريلمي المستقلة Realme UI
مبنية بالكامل على نظام أندرويد 10.
واجهة realme UI الجديدة واجهة خفيفة وسلسة شبه واجهة اوبو color OS الشركة الأم لريلمي مع طريقة مبسطة لعرض الاشعارات والمميز في
الواجهة ان فيها تخصصات كتير customization عشان تخصص الواجهة وتبقى مناسبة أكتر ليك وفيها شريط سيدبار في
الجنب تقدر تخصصصه بالأدوات اللي انت عايزها ودي حركة ريلمي غشاها من موبايلات
سامسونج سلسلة S وبالتأكيد فيها إمكانية الاختيار بين 60 أو 90 هرتز، ومميز هنا برضو وجود
الدارك مود اللي بقى شيء أساسي في كل الواجهات واللي بيوفر بعض من طاقة البطارية
وتقدر تخلي الهاتف على وضع الدارك مود علطول أو تعمله مزامنة عشان يشتغل بالليل
فقط، لكن تظل تجربة الدارك مود مش أفضل حاجة لأن الشاشة هنا IPS مش أموليد.
الذاكرة:
النسخة المطروحة في مصر من الموبايل ده بذاكرة داخلية 128 جيجابايت نوعها 2.1 UFS مع رامات 8 جيجا من نوع LPDDR4x
وبيتيحلك تركب كارت ميموري خارجي في منفذ مستقل.
عدم طرح ريلمي النسخ الأصغر من الهاتف في السوق المصري عمل
بلبلة وغضب كبير عن سعر الهاتف اللي هو أصلاً أغلى من تسعيره العالمي فده أثار موجة
غضب كبيره بين الناس بما فيهم عشاق ريلمي اللي كانوا مستنين نزول الموبايل بشوق
كبير، واعتقدت شخصياً إن ممكن ريلمي تطرح ده في المستقبل استجابةً لطلب الناس لكن
للأسف عدى أكتر من شهر وريلمي معملتش كده.
الأداء:
الموبايل نازل بمعالج سناب دراجون الجديد 720G ثماني النواة بدقة
تصنيع 8 نانو بتردد بيوصل 2.3 جيجاهرتز، وجاي
معاه معالج الرسوميات 618Adreno.
شريحة سناب دراجون الجديدة 720G شريحة محسنة عن سناب دراجون 712 واللي شوفناها في الاصدار
السابق realme 5 pro وأداءه قريب جداً من سناب دراجون 730، مشفناش شريحة 720G غير في موبايل شاومي نوت 9s والموبايل ده مع الأخذ بالاعتبار ان سعر note 9s أرخص حوالي 2000 جنيه، وهنا المعالج محقق 268 ألف نقطة فقط في
اختبارات Antutu للبنش مارك متأخر عن ريلمي 6 العادي اللي فيه شريحة
ميدياتك G90T بفرق 20 ألف نقطة وده فرق مش قليل إطلاقاً لكن في
اختبارات Geek bench اللي بيقيس قوة النواة الواحدة فريلمي 6 pro متفوق عن العادي وزي ما قولتلك قبل كده في مراجعة ريلمي 6 إن شريحة 720G أفضل في السخونة الأقل وتوفير استهلاك الطاقة إنما شريحة G90T
أفضل في الألعاب.
بدون صداع الأرقام فعلياً بقى أداء المعالج طيارة في
الاستخدام العادي في المهام اليومية من سوشيال ميديا وتصفح وتبديل بين البرامج
واللي مساعد في كده واجهة ريلمي السلسة اللي عكس واجهة شاومي نوت 9s اللي كان فيها تهنيجات.
معالج الرسوميات 618 Adreno أداءه كويس جداً
في الألعاب بيشغلك ببجي على إعدادات جرافيك HD مع فريم ريت high بسلاسة وبدون لاج.
الكاميرات:
الموبايل جاي ب 4 كاميرات خلفية الرئيسية بدقة 64 ميجابكسل ببعد
بؤري 26mm
وفتحة عدسة F1.8 وبحجم بكسل 0.8 ميكرون مزودة
بخاصية الفيز ديتيكشن اوتو فوكس، والثانية بدقة 12MP ببعد بؤري 54mm بفتحة عدسة F2.5 تدعم 2X زوم بصري وهي عدسة تيلي فوتو للتصوير عن بعد، الكاميرا الثالثة
بدقة 8MP ببعد بؤري 13mm
بفتحة عدسة F2.3 وهي عدسة
التراوايد، والكاميرا الرابعة بدقة 2MP بفتحة عدسة F2.4 مخصصة لتصوير
الماكرو، والكاميرات جاية مع فلاش أحادي LED.
الكاميرا الرئيسية خرافية مفيش كلام، في ضوء النهار بتطلع
نتايج ممتازة من ألوان زاهية ومشبعة عينك هتحبها -لكنها مش الألوان الواقعية- وتفاصيل كتير
وداينامك رينج عالي وإن كان محتاج يتحسن شوية والتصوير بالليل ممتاز أيضاً وتعتبر
الكاميرا على أفضل وجه.
في تصوير البورتريه الموبايل في أغلب الأوقات بيظبط لون
البشرة ويجيبه قريب من الأصفر الواقعي والتفاصيل كتير وواضحة لكن اوفر اول النتيجة
النهائية حلوة ومع شوية تعديلات بسيطة على snapseed مثلاً هتحصل على نتايج مبهرة.
وموجود كاميرا تيلي فوتو وهي المفضلة عندي من بقية الكاميرات
لأنها هي الأنسب في تصوير البورتريه، الكاميرا جاية بمعدل تكبير بصري 2X وأداء أفضل من القص من صورة الكاميرا الرئيسية من حيث النويز
القليل والتفاصيل الكتير، وموجود زوم ديجيتال 5X بيقص من الصورة ال 2X النتيجة النهائية مقبولة بس متقدرش تقص منها بعد كده.
الكاميرا الالتراوايد على الرغم انها بدقة ميجابكسل أقل
بكتير من الكاميرا الرئيسية أو كاميرا التيلي فوتو إلا إنها بتطلع صور جيدة جداً
فيها تفاصيل كتير بالأخص لو بالنهار مع دايناميك رينج عالي لكن في التصوير بالليل
بيظهر بعض النويز أو التحبب.
انا مش من فانز الكاميرا الماكرو لكن كاميرا الماكرو هنا
تقدر تطلع بيها نتايج لطيفة.
في تصوير الفيديوهات الموبايل بيصور فيديوهات بدقة فور كيه
بسرعة 30 إطار في الثانية
أو فل اتش دي بسرعة 120 إطار في الثانية
مع وجود مثبت إلكتروني EIS.
الموبايل ممتاز أيضاً في تصوير الفيديوهات، بيقدر يصور فور
كيه على العدستين الرئيسية و التيلي فوتو وبالنسبة للجودة فهي جيدة جداً من حيث
الألوان الزاهية والتباين الواضح والدايناميك رينج العالي والنويز القليل .
الكاميرا الأمامية ثنائية الرئيسية دقتها 16 ميجابكسل ببعد بؤري 26mm بفتحة عدسة F2.1 بحجم بكسل 1.0 ميكرون، والثانية بدقة 8MP ببعد بؤري 17mm وبفتحة عدسة F2.2 وهي عدسة التراوايد.
كاميرا السيلفي كويسة جداً الوايت بالانس مظبوط وإن كان
بيميل للون الأحمر سنة بسيطة بس الألوان حلوه والصور ككل شارب والدايناميك رينج
عالي لكن العزل في وضع البورتريه ضعيف إلى حد ما.
والمميز تاني في حتة السيلفي وجود الكاميرا السيلفي
الالتراوايد اللي بتخليك تصور مشاهد بزاوية واسعة أينعم كنتيجة صور نهائية مش أفضل
حاجة لكن تعتبر بداية كويسة لكاميرا التراوايد سيلفي.
السماعات:
سماعة
خارجية واحدة مونو مكانها تحت على اليمين بالإضافة لوجود منفذ السماعات التقليدي 3.5 ملم كما يدعم الهاتف مايك ثانوي لعزل
الضوضاء.
صوت الموبايل مش ستريو لكن الصوت عالي
وواضح وأحسن من 6 realme لكن مش أعلى حاجة ومن الآخر التجربة الصوتية متوسطة ومقبولة بشكل عام،
صوت سماعات المكالمات تمام ومفيهوش مشاكل، وكذلك صوت سماعات الأذن.
الاتصالات والمستشعرات:
واي فاي بيدعم dual-band وواي فاي دايركت وهوتسبوت.
بلوتوث 5.1 و GPS بالإضافة للراديو FM بالإضافة لتقنية الاتصال قريب المدى NFC.
البصمة موجودة في الجنب اليمين مع
زرار الباور خلاص ده بقى التريند، بصمة سريعة ودقيقة وقليل أوي خالص لما تغلط،
كمان موجود Face Unlock
مكان البصمة ده هو الأنسب الحقيقة
والأسرع في الوصول ليه وأفضل من المكان الموجود في الضهر.
منفذ اليو اس بي هنا 1.0 USB Type-C الجيل الأول الإصدار التاني بيدعم خاصية الاتصال العكسي وخاصية OTG.
كل المستشعرات موجودة التسارع
والتقارب والبوصلة ومستشعر جيروسكوب ومستشعر الضـوء وشغالين تمام بدون مشاكل.
نيجي لنقطة الشبكة واللي كتير بيسأل
عنها خاصة وأن الشبكات في مصر سيئة بس لأ الموبايل هنا بيلقط شبكة وموبايل داتا
كويس جداً حتى في أماكن شبكتها ضعيفة.
البطارية:
بطارية realme 6 pro حجمها 4300 مللي أمبير بتدعم الشحن السريع بقوة 30 وات مع دعم لخاصية الشحن السريع VOOC 4.0.
نفس البطارية والشاحن موجودين في
النسخة العادية 6 realme لكن الأداء هنا مختلف وأفضل بفضل شريحة سناب دراجون الجديدة 720G واللي بتوفر الطاقة بشكل ممتاز، البطارية بتصمد حوالي 8.5 ساعة شاشة مفتوحة، بالطبع الأداء أفضل من النسخة العادية لكن بالنظر
للمنافسين فهل مش الأفضل شاومي نوت 9s بطاريته 5000 مللي أمبير بتقعد أكتر من 10 ساعات
شاشة مفتوحة وتسعيره أقل بكتير.
لكن المميز هنا ومش هتلاقيه عند
المنافسين هو الشاحن السريع بقوة 30 وات
وعلى أرض الواقع بيشحن البطارية من صفر إلى 65% في نص ساعة وبيشحنها كاملة 100% في
ساعة واحدة فقط ومش محتاج اقول ان دي أرقام خرافية وده وقت ممتاز جداً.
عيوب هاتف realme 6 pro
✖ شاشة IPS
وليست أموليد كما أن سطوعها ليس بالأفضل
✖ عدم وجود لمبة
الاشعارات
✖ لا يوجد سماعات الأذن في علبة الهاتف
✖ تسعير الهاتف مرتفع بعض الشيء وإن كان
سعره في المحلات نزل حوالي 300 جنيه
في أقل من شهر
مميزات realme 6 pro
✔ تصميم مبهر وجذاب بخامات زجاجية
✔ شاشة كاملة بتصميم الثقب بمعدل تحديث 90 هرتز
✔ معالج قوي مخصص للألعاب وافتقدنا هذه
الميزة في انفنكس منذ زمن طويل
✔ تركيبة كاميرات ممتازة جداً سواء
الرئيسية أو حتى التلي فوتو والالترا وايد لا تزال ممتازة
✔ وجود كاميرا سيلفي التراوايد
✔ بطارية كويسة 4300 مللي أمبير تصمد
حوالي 9 ساعات شاشة مفتوحة
ويتم شحنها بالكامل في مجرد ساعة بفضل الشاحن السريع 30 وات
✔ يدعم تركيب
شريحتين اتصال وكارت ميموري في آن واحد
محتويات
علبة هاتف realme 6 pro
هاتف Realme
6 pro مع اسكرينة حماية تم تركيبها بشكل مسبق
رأس شاحن سريع 30
وات
مع كبل يو اس بي Type-C
جراب ظهر شفاف للحماية ودبوس معدني لفتح
درج الشريحة مع كتيب التعليمات ودليل الاستخدام والضمان
الخلاصة
هاتف realme 6 pro كأي نسخة برو من هواتف ريلمي بيقدم أداء قوي وتركيبه ممتازة من حيث الشاشة الكبيرة الكاملة بتصميم الثقب بمعدل تحديث 90 هرتز والأداء السريع وتجربة الكاميرات الخلفية الممتازة والبطارية القوية بشاحن سريع جداً ومع نزول سعره في أقل من شهر بيخليه قادر على المنافسة أو على الأقل قادر على الوقوف على رجليه.
سعر هاتف realme 6 pro ريلمي 6 برو
سعر موبايل realme 6 pro الرسمي هو 5390 جنيه للنسخة الوحيدة 128 مع
8 جيجا رام وسعرها في المحلات أصبح أرخص 300 جنيه أي سعره بقى حوالي 5100 جنيه.
الضجة اللي حصلت على التسعير وبعض
حملات المقاطعة خلت ريلمي مضطرة ترخص سعر الهاتف 300 جنيه في أقل من شهر ودي تعتبر مجرد قرصة ودن لشركة ريلمي.
تقيمنا للموبايل ككل ثمانية من عشرة 8/10
