مراجعة هاتف Samsung galaxy M11 | العملاق الصغير !!

مراجعة هاتف سامسونج ام 11

مراجعة هاتف 11Samsung galaxy M سامسونج جالكسي ام 11

سامسونج أطلقت هاتف Samsung galaxy M11 سامسونج ام 11 في مصر مع أخوه الأكبر 31M واللي اتكلمنا عنه بالتفصيل في مراجعته، ودلوقتي جه معادنا مع M11 اللي نازل في فئة ألفين جنيه الفئة اللي بيبقى فيها تنازلات كتير فخلونا نشوف سامسونج هتتنازل عن اي في الموبايل ده، يلا نبدأ.

موبايل Samsung galaxy M11 سامسونج ام 11

تصميم Samsung M11

خامات بلاستيكية بالكامل زي أخوه الكبير 31M بما في ذلك إطار بلاستيك بسماكة 9.0 ملم ووزن الموبايل 197 جرام.

الموبايل فيه تنازل كبير في خاماته والبلاستيك هنا ضعيف وعرضة للتبصم والخدش بسهولة لدرجة انك ممكن تخدشه بضوافرك حرفياً، حاله حال معظم موبايلات الفئة الاقتصادية وده أصلاً حال أغلب سلسلة M من سامسونج واللي بتهتم اكتر بتقديم مواصفات قوية مقابل السعر، وزن الموبايل تقيل شوية 197 جرام وده راجع لبطاريته الضخمة وده مأثر حتى في سمك الموبايل التخين 9 ملم.

الديزين كلاسيكي بحت مفيهوش تدرج ولا انعكاسات للإضاءة ولا أي حاجة، مجرد لون مطفي سواء الأزرق أو الأسود، الحواف حولين الموبايل كبيرة للأسف وبالأخص الحافة السفلية كبيرة وشكلها وحش مش بتخليك تستمتع بتجربة الشاشة الكاملة.

وفي الضهر فيه 3 كاميرات موجودة فوق على الشمال مترتبة جوه شكل مستطيل حوافه دائرية وموجود الفلاش بره نطاق المستطيل، و بالتوازي مع نهاية المستطيل من الأسفل وفي المنتصف موجود مستشعر بصمة واخد شكل بيضاوي مش دائري زي ما احنا متعودين والحقيقة الشكل ده مناسب أكتر لصابع السبابة زي ما قولنا في 31M، بروز الكاميرات قليل جداً بيتغطي تماماً مع تركيب جراب بس للأسف الموبايل مبيجيش معاه جراب في العلبة.

وأكيد حاجة حلوة اننا نشوف تصميم الشاشة الكاملة بالثقب في الفئة دي لكن تجربة الشاشة الكاملة مش حلوه بسبب الحواف الكبيرة زي ما قولنا وبسبب ضعف جودة الشاشة زي ما هنقول دلوقت.

الشاشة:

شاشة PLS TFT اتش دي بلس بحجم 6.4 بوصة بتصميم الخرم بانش هول باستحواذ 81.6% من الواجهة مع كثافة بكسلات 268 بكسل في البوصة الواحدة، وأبعاد 19.5:9.

الشاشة هنا ضعيفة و سيئة وتقريباً دي اول مره نقول كده على شاشة سامسونج وده لأنها TFT الضعيفة وكان يفضل تبقى IPS عشان تديني تجربة مشاهدة حلوه خاصة وانها شاشة كاملة بثقب حرفO.

الشاشة ضعيفة بين المنافسين وده لأنها TFT زي ما قلت لكن على أي حال الألوان بتحسها باهته شوية مش بالنضارة اللي العين تحبها ومفيهاش تشبع مجرد شاشة عاديه، الكارثة بقى في ضوء الشمس مش هتشوف محتوى الشاشة بوضوح خالص هتقعد تركز بعينك عشان تشوف محتوى الشاشة.

الواجهة:

الموبايل بيشتغل بواجهة سامسونج 2 One UI المبنية على نظام أندرويد 10.

واجهة سامسونج 2 One UI اللي شالو منها أنيميشن كتير ملهاش لازمة والواجهة بقت أسرع وأسلس وتحربة الاستخدام عليها بقت أفضل خاصة في multitasking.

الذاكرة:

النسخة اللي نازلة مصر من الموبايل ده بذاكرة داخلية 32 جيجابايت نوعها 5.1 eMMC مع رامات 3 جيجا من نوع LPDDR4x وبيتيحلك تركب كارت ميموري خارجي في منفذ مستقل.

خيار النسخة 32 مع 3 جيجا رام خيار كويس على مستوى الفئة السعرية لكن كنا نتمنى أن الذاكرة الداخلية تكون من نوع UFS الأسرع بدل من eMMC البطيئة.

الأداء:

الموبايل نازل بمعالج سناب دراجون 450 ثماني النواة بدقة تصنيع 14 نانو بتردد بيوصل 1.8 جيجاهرتز، وجاي معاه معالج الرسوميات كوالكوم 506 Adreno.

للأسف المعالج سناب دراجون 450 معالج قديم وضعيف دلوقتي بقينا نشوف معالجات جيمينج في الفئة دي زي موبايل ريلمي C3 بمعالج ميديا 70G المعالج الموجه للألعاب، عالعموم المعالج محقق 89 ألف نقطة فقط في اختبارات Antutu متأخر كتير عن ريلمي 3C اللي بنفس تسعيره بفرق حوالي 90 ألف نقطة وده فرق كبير جداً.

فعلياً بقى أداء المعالج في المهام اليومية من سوشيال ميديا وتصفح وتبديل بين البرامج هيمشي حالك أغلب الوقت، لكن على مستوى الألعاب ضعيف اوي.

معالج 506 Adreno معالج جرافيكس مقبول آخره بيشغلك ببجي على إعدادات جرافيك balanced مع فريم ريت medium.

لكن لعبة فورتنيت مش مدعومة بشكل رسمي على المعالج ده للأسف.

الكاميرات:

الموبايل جاي ب 3 كاميرات خلفية الأولى بدقة 13 ميجابكسل ببعد بؤري 27mm وبفتحة عدسة F1.8 بحجم بكسل 1.12 ميكرون مزودة بالفيز ديتيكشن اوتو فوكس، والثانية بدقة 5MP ببعد بؤري 14mm وبفتحة عدسة F2.2 وهي عدسة الترا وايد، وأخيراً الكاميرا الثالثة بدقة 2MP وبفتحة عدسة F2.4 مخصصة لقياس العمق، والكاميرات جاية مع فلاش LED.

كوالتي الكاميرا الرئيسية في وضح النهار بتطلع نتايج مقبولة إلى حد كبير لكن الألوان مبتبقاش زاهية لأ تحسها بهتانة لكن في التصوير ان دور في الإضاءة الجيدة الموبايل بيأدي أداء ممتاز الحقيقة بألوان واقعية وتفاصيل كتيرة.

في تصوير البورتريه معالجة الصور بتطلع لون البشرة مظبوط إلى حد كبير، والعزل شغال كويس برضو لكن أحياناً يغلط والصور فيها عزل كويس جداً.

جودة الصورة بالليل فمتستناش نتايج قوية من أي موبايل اقتصادي زي ده، لكن عموماً موجود تفاصيل مقبولة وجودة مقبولة برضو.

حاجة ممتازة اننا نلاقي كاميرا الترا وايد في موبايل بألفين جنيه، جودتها حلوه بالنهار بتصور بزاوية واسعة لكن مش دي الزاوية الواسعة اللي متعودين عليها من سامسونج، الجودة بقى بالليل بتبقى ضعيفة جداً.

انا مش زعلان ان مفيش كاميرا ماكرو بالعكس انا شايف انها ملهاش أي تلاتين لازمة وطالما موجود كاميرا التراوايد فأنا موافق.

في تصوير الفيديوهات الموبايل بيصور فيديوهات فل اتش دي بسرعة 30 إطار في الثانية.

الموبايل ده اقتصادي فمتحلمش بقى بجودة فور كيه وللأسف الموبايل مفيهوش أي تثبيت اهتزاز، لكن حاجة حلوة ان في مايكروفون إضافي لعزل وتنقية الصوت لكن جودة الفيديو في الضياع

الكاميرا الأمامية دقتها 8 ميجابكسل ببعد بؤري 26mm مع فتحة عدسة F2.0.

الجودة زي ما انا متوقع من رقم كاميرا السيلفي ضعيفة وألوانها متداخلة والبشرة بتبقى سايحة على بعض لكن بيبقى فيها تفاصيل معقولة.

السماعات:

سماعة خارجية واحدة مكانها تحت على اليمين بالإضافة لوجود منفذ السماعات 3.5 ملم، ويوجد مايكروفون ثانوي لعزل الضوضاء.

صوت السماعات مقبول بمعنى صوتها عالي بس مش أعلى حاجة ومفيش تجسيم للصوت أو بيز في الصوت العالي، لكن صوت سماعات المكالمات تمام ومفيهوش مشاكل، وكذلك صوت سماعات الأذن، والجميل كذلك وجود مايكروفون إضافي لعزل الضوضاء.

الاتصالات والمستشعرات:

واي فاي بيدعم WI-FI Direct وهوتسبوت.

بلوتوث 4.2 و GPS بالإضافة للراديو FM.

البصمة موجودة في الضهر في مستشعر بيضاوي مش دائري، بصمة بطيئة وبتغلط احيان كتير لكن تظل مقبولة كما يوجد Face Unlock

حاجة كويسة إن سامسونج ضافت مستشعر البصمة واللي مكنش موجود في M10 وكان عيب رخم الحقيقة.

مستشعرات التسارع والتقارب ومستشعر الضوء فقط.

للأسف الموبايل مبيدعمش مستشعر البوصلة وده عيب رخم مش هيخليك تقدر تحدد الأماكن بدقة وكمان غياب مستشعر جيروسكوب اللي بيدعم تشغيل تطبيقات الواقع الافتراضي

الشبكة بتتراوح من متوسط لكويس حسب المكان اللي انت فيه.

المنافذ:

منفذ يو إس بي 1.0 Type-C الإصدار التاني بيدعم خاصية الاتصال العكسي وخاصية OTG.

منفذ سماعات الرأس التقليدي 3.5 ملم.

منفذين لتركيب شريحتين اتصال من النوع نانو SIM ومنفذ خاص لكارت ميموري.

البطارية:

بطارية M11 كبيرة حجمها 5000 مللي أمبير بتدعم الشحن السريع بقوة 15 وات.

رقم لبطارية 5000 رقم كبير ودي نقطة قوة في الموبايل، بس بالرغم من رقم البطارية الكبير إلا إنها مبتقعدش أكتر من 7 ساعات شاشة مفتوحة وده بسبب معالج سناب دراجون 450 القديم الغير موفر في الطاقة.

لكن المميز هنا هو سرعة الشحن 15 وات هو دلوقتي مبقاش سريع كفاية لكن بالنظر للمنافسين وفئة الموبايل السعرية فده شاحن سريع بيشحن البطارية كاملة في حوالي ساعتين فقط وده وقت معقول.

---

عيوب موبايل Samsung M11

✖ المعالج لا يقدم أفضل أداء في فئته لكن أداءه مقبول تماماً

✖ شاشة ضعيفة ودرجة سطوعها قليلة

✖خامات بلاستيكية ضعيفة عرضة للتبصم والخدش بسهولة

✖ غياب مستشعر البوصلة ومستشعر جيروسكوب

✖ للأسف لا يأتي مع الهاتف سكرينة حماية أو جراب ظهر

✖ لا يأتي مع الهاتف سماعات الأذن handfree

✖ لا توجد لمبة الاشعارات

مميزات Samsung M11 سامسونج ام 11

✔ تصميم الشاشة الكاملة مع وجود ثقب

✔ بطارية كبيرة 5000 مللي بتقعد معاك حوالي 7 ساعات ونص شاشة مفتوحة

✔ منفذ يو اس بي Type-C وشاحن سريع 15 وات

✔ وجود مستشعر بصمة والذي افتقدناه في الاصدار السابق M10

✔ يدعم تركيب شريحتين اتصال وكارت ميموري في آن واحد

محتويات علبة هاتف 11Samsung galaxy M

هاتف 11Samsung galaxy M ذات نفسه

رأس شاحن سريع 15 وات مع كبل يو اس بي من نوع Type-C

دبوس معدني لفتح درج الشريحة زائد كتيب التعليمات ودليل الاستخدام

الخلاصة

سامسونج 11M مقدمش مميزات كتير في فئته بإستثناء تصميم الشاشة الكاملة بالثقب والبطارية الكبيرة بالشاحن السريع واسم سامسونج المعروف طبعاً فيما عدا ذلك فالموبايل متأخر كتير عن المنافسين.

سعر هاتف Samsung M11 سامسونج ام 11

سعر موبايل Samsung galaxy M11 سامسونج ام 11 الرسمي هو 2222 جنيه للنسخة الوحيدة 32 مع 3 جيجا رام.

تقيمنا للموبايل ككل ثمانية من عشرة 8/10