مراجعة موبايل Nokia 7.2 غرقان في مشاكل ممكن تقبلها ؟ | هاتف بلس

مراجعة نوكيا 7.2 

نبذة عن موبايل nokia 7.2

نوكيا تحاول العودة المنافسة في سوق الهواتف الذكيه خاصة في الفئة الاقتصادية والمتوسطة فأعلنت يوم 23 سبتمبر عن موبايلين Nokia 7.2  بجانب اخوه الصغير 6.2 وانهارده هنتكلم عن 7.2 المعتمد على عدسات Zeiss الألمانية وده بيخلي الموبايل منافس جداً في التصوير وتصميم الموبايل في نظري واحد من أشيك التصميمات في فئته السعرية لكن المظاهر خداعة وده اللي هنكتشفه خلال المراجعة.

نظرة تفصيلية على هاتف 7.2 Nokia

تصميم موبايل نوكيا 7.2 

أولاً التصميم وبنية Nokia 7.2 :

موبايل نوكيا 7.2 بيجي بأبعاد 75.2 × 159.9 ملم وسمكه حوالي 8.3 ملم ووزن الهاتف يصل إلى 180 جرام كمان الموبايل بيجي بضهر بوليمر وهو عبارة عن مخلوط من الزجاج مع البولي كربونات متغطي بطبقة حماية جوريلا جلاس 3 وفريم من البلاستيك وفيه لمبة الاشعارات موجودة في زر البور وفيه زرار المساعد الصوتي من جوجل على يسار الهاتف والموبايل بيدعم شريحتين اتصال في وضع الاستعداد من نوع نانو سيم ومتوفر بالألوان الأبيض الثلجي والأخضر المزرق واللون الفحمي.

تصميم الهاتف بوليمر بتعادل قوته ضعف البولي كربونات العادية ووزنه نص الألومنيوم بصراحة نوكيا أبدعت هنا، الموبايل شيك جداً ومش هيتخربش بسهولة ومسكتة مريحة ورصة الكاميرات الأربعة بصورة دائرية جميلة لكنها بارزة جداً هتخليك قلقان لو الموبايل وقع على ضهره وكمان لمبة الاشعارات الموجودة في زرار التشغيل شكلها حلو ومميز بس للأسف الحلو مبيكملش فالإطار جاي من البلاستيك مش المعدن وكمان زرار المساعد الصوتي من جوجل محدش بيستخدمه ومينفعش تخصصه لحاجة تانية لأن الواجهة خام. 

---

شاشة الهاتف :

الشاشة كاملة من نوع IPS LCD موجود عليها طبقة حماية جوريلا جلاس 3 بأبعاد 19.5:9 بدون نوتش وبحجم 6.3 بوصة بدون حواف تقريباً مع وجود نوتش صغير waterdrop وتستحوذ الشاشة على 82.4% من جسم الهاتف اما الدقة فهي فل اتش دي بلس 2280 ×1080 بكسل مع كثافة بكسلات 400 بكسل في البوصة الواحدة الشاشة بتدعم HDR10 وخاصية always-on display .

الشاشة لو كانت أموليد كان هيبقي أفضل بكتير لكنها على أي حال بتقدم تجربة مشاهدة جيدة أفضل من شاشات IPS العادية ومن حيث السطوع والألوان زاهية حتى في ضوء الشمس مفيهاش مشاكل لكنها متوصلش لدرجة الأموليد وتجربة HDR عليها جميلة.

---

منصة التشغيل :

أندرويد 9 باي خام مع دعم لمشروع أندرويد ون من جوجل واللي بيضمن سرعة وصول التحديثات لفترة طويلة بتوصل لسنتين وتلاتة للتحديثات الأمنية، الواجهة الخام في ناس بتعتبرها ميزة عشان بساطتها وسهولتها وسرعتها وفيه ناس بتعتبرها عيب لأنها مفيهاش إضافات كتير، الموبايل جاي مع معالج سناب دراجون 660 وهو معالج قديم بقاله أكتر من سنتين وموجود في موبايلات بنص تمن الموبايل ده ويعمل بمعمارية 64 بت وبدقة تصنيع 14 نانوميتر يعمل بثمانية أنوية وبتردد يصل 2.2 جيجاهرتز لأربع أنوية بينما الأربعة أنوية الباقية بتردد 1.8 جيجا هرتز بالإضافة لمعالج رسوميات 512Adreno واللي أداءه مقبول في الألعاب.

نظام الأندرويد الخام مش هيسمحلك تعمل نسختين من التطبيقات لكن المميز ان فيه خاصية ultimate storage with google photos واللي هيسمحلك ترفع عدد غير محدود من الصور وحتى الفيديوهات على سيرفرات جوجل ودي خاصية كانت حكر على موبايلات جوجل بيكسل، بالنسبة بقى للمعالج فهو معالج قديم موجود في موبايلات بنص تمن الموبايل ده كمان أداء المعالج تقيل شوية لكن وده شيئ محيرني لأن الواجهة خام المفروض يبقى الأداء سلس عن كده وبالنسبة لمعالج الرسوميات 512Adreno هيديك أداء كويس إلى حد ما في الألعاب لكن على إعدادات جرافيك متوسطة في أغلب الألعاب.

---

الذاكرة :

النسخة الوحيدة المتوفرة للأسواق المصرية تأتي بذاكرة داخلية بحجم 128 جيجابايت مع ذاكرة وصول عشوائي بسعة 6 جيجا رام من نوع 2.1 UFS وتوجد إمكانية لإضافة كروت ذاكرة خارجية حتى سعة 512 جيجابايت في منفذ مخصص.

الرامات 6 جيجا هتخليك تشغل تطبيقات كتير في الخلفية وهتساعدك تأدي مهام كتيرة في وقت واحد.

---

كاميرات موبايل nokia 7.2

الكاميرا :

الكاميرا الخلفية ثلاثية بتستخدم عدسات Zeiss الألمانية المعروفة الكاميرا الأولى بدقة 48 ميجابكسل وبفتحة عدسة واسعة F1.8 مزودة بخاصية التركيز التلقائي اوتو فوكس وتنتج صور بدقة 6000×8000 بكسل أما الثانية فبدقة 8 ميجابيكسل ببعد بؤري 13mm وبفتحة عدسة أضيق F2.2 وهي عدسة ultrawide للتصوير بزوايا عريضة 118 درجة والكاميرا الثالثة فبدقة 5  ميجابكسل مسؤولة عن قياس العمق، ومن خصائص الكاميرا التحكم في حساسية الضـوء ISO وتعويض التعريض بالإضافة للتصوير المستمر و التصوير بمدى ديناميكي مرتفع HDR، ومن خصائص الكاميرا أيضاً تحديد الوجوه واللمس لظبط الفوكس واوتو فلاش عن طريق فلاش خلفي أحادي LED.

كاميرات نوكيا بشكل عام ممتازة لأنها بتستخدم عدسات Zeiss الألمانية الشهيرة لكن الغريب ان نوكيا شالت العدسة التليفوتو واللي كانت موجودة في +7 Nokia وبالنسبة لأداء الكاميرات على أرض الواقع فهتديك نتايج ممتازة وتفاصيل كتيرة وحدية لكن في صور هتحس ان مفيش تفاصيل وده بسبب الذكاء الاصطناعي اللي أحياناً بيغلط فأتمنى ينزل تحديث يحل المشكلة دي، وضع النايت مود بياخد وقت عشان يكون الصورة وبيحتاج ثبات لكن من وجهة نظري مفيهوش اختلاف عن الوضع الأساسي ومش بيديك تحسينات كتير.

أما بالنسبة لتصوير الفيديو بتصور بدقة فور كيه بسرعة 30 إطار في الثانية ويوجد مثبت إلكتروني أثناء تصوير الفيديو لتقليل الاهتزازات الناتجة عن الحركة.
بالنسبة للكاميرا الاماميه تأتي بدقة 20 ميجابكسل بفتحة عدسة F2.0 وتصور فيديو بدقة فل اتش دي بسرعة 30 إطار في الثانية الواحدة .

كاميرا السيلفي هتديلك تحديد الأطراف وعزل ممتاز ولون بشرة واقعي بالنهار وبالليل جودتها مقبولة أيضاً يعني بصراحة أداءها أفضل من الكاميرا الخلفية.

---

سماعة الهاتف :

سماعة خارجية واحدة بالإضافة لوجود منفذ السماعات التقليدي 3.5mm.

السماعة بتطلع جودة صوت جيدة بس مش أعلى حاجة وبالنسبة لسماعة المكالمات فصوتها عالي ومفيهوش مشاكل .

---

الاتصالات والحساسات :

واي فاي 802.11 بترددات b/g/n/ac بالإضافة لدعمه خاصية dual-band وخاصية WI-FI Direct والهوتسبوت لمشاركة الموبايل داتا.

بلوتوث الإصدار 5.0 مع دعمه لخاصية A2DP وخاصية LE وخاصية aptX وخاصية EDR 

نظام التموضع العالمي GPS مع دعمه لأنظمة ملاحة A-GPS ونظام الملاحة GLONASS ونظام BDS ونظام الملاحة GALILEO

يوجد دعم لموجات الراديو FM، لكن لا يدعم الهاتف خاصية الاتصال قريب المدى NFC وكذلك لا يدعم الهاتف مستشعر الأشعة تحت الحمراء كالتي توجد في أجهزة شاومي.

مستشعر قارئ البصمة موجود في ظهر الهاتف وهو ليس بالأسرع فيه شوية بطء كمان الموبايل بيدعم Face Unlock وبطئ زيه زي البصمة بل أبطء من البصمة.

كما يوجد به مستشعرات التسارع والتقارب وتوجد بوصلة وحساس جيروسكوب لدعم تشغيل تطبيقات الواقع الافتراضي وحساس الضوء.

---

المنافذ :

منفذ يو إس بي 1.0 Type-C الجيل الأول الإصدار التاني مع دعمه لخاصية الاتصال العكسي بالإضافة لخاصية OTG.

منفذ سماعات الرأس التقليدي 3.5mm jack

منفذين لتركيب شريحتين اتصال من النوع نانو SIM ومنفذ خاص لكارت الميموري.

---

البطارية :

بطارية Nokia 7.2 من نوع بوليمرات الليثيوم غير قابلة للازالة بسعة 3500 مللي أمبير بتشحن بقدرة 10 وات مش بتدعم الشحن اللاسلكي.

البطارية يدوبك هتقضي معاك يوم لو استخدامك للموبايل متوسط فكان من الأفضل لو بطارية 4000 مللي أمبير فما فوق وده مش حاجة صعبة يعني شوفنا موبايل سامسونج M30s بطاريته 6000 مللي أمبير وسعره 3666 جنيه وليه يا نوكيا الموبايل مبيدعمش الشحن السريع، يعني البطارية هتفضي منك بسرعة وهتاخد وقت كبير في الشحن حوالي ساعتين.

---

عيوب موبايل Nokia 7.2 :

✖ الشاشة IPS مش AMOLED والحواف حوليها كبيرة شوية

✖ الهاتف لا يدعم الشحن السريع وكنت أتمنى لو زادت سعة البطاريه ل 4000 مللي أمبير أو أكثر

✖  زرار المساعد الصوتي لا فائدة منه ولا يمكن تخصيصه

✖ معالج الهاتف قديم ويوجد في فئة سعرية أقل بكتير وأداءه مش الأفضل في فئته

✖ سعر الموبايل مرتفع بالنسبة للقيمة اللي بيوفرها وبالنسبة لمنافسيه

✖ لا يوجد مستشعر الأشعة تحت الحمراء IR كما في هواتف شاومي

مميزات الموبايل 7.2 Nokia

✔ تصميم الهاتف فخم وشيك

✔ تقدر تستخدم شريحتين اتصال وكارت ميموري في وقت واحد

✔ أداء كاميرا السيلفي كان ممتاز بتدي صور واقعية جدا خاصة بالنهار

محتويات علبة موبايل 7.2 Nokia

⬤ موبايل نوكيا 7.2

⬤ شاحن 10 وات وكبل USB Type-C

⬤ كتيب التعليمات والضمان ودبوس معدني لفتح منفذ الشريحة

⬤ سماعة أذن

⬤ الموبايل مبيجيش معاه جراب أو لزقة حماية ممكن تدوخ شوية عشان تلاقيهم

الخلاصة

موبايل 7.2 nokia بيقدملك تصميم شياكة من البوليمر وشاشة حلوة احلى من شاشات IPS العادية وشبكة الموبايل قوية في أغلب الأماكن لكن البطارية صغيرة 3500 مللي أمبير مش بتدعم الشحن السريع ومعالج قديم ومعالج رسومي متوسط فلو بتدور على أداء قوي في الألعاب فالأفضل تدور على حاجة تانية زي شاومي mi 9t أو realme5 pro أو realmeXT اللي هما بنفس سعره، لكن الموبايل ككل مقبول مع خامات نوكيا المحترمة بالإضافة لخدمة ما بعد البيع وثقة العملاء في نوكيا وجودتها والنقطة اللي مش مخلياني ارشحه ان سعر عالي بس لو حصل دروب في سعره ووصل 4000 أو 4300 جنيه فهرشحه بشدة.

سعر موبايل Nokia 7.2 نوكيا 7.2

التسعير الرسمي من نوكيا ل 7.2 nokia هو 5199 جنيه مصري للنسخة الوحيدة المتوفرة للأسواق المصرية 128 جيجا مع 6 جيجا رام وممكن تلاقيها في المحلات أرخص من كده حوالي 300 جنيه وده رابط خصم بمناسبة البلاك فرايداي علي سوق.كوم .

سعر الموبايل غالي حبتين خاصة أن المعالج قديم والبطارية صغيرة لكن ليه يا نوكيا بتعلني عن سعر كبير في الأول بعد كده بتقللي السعر وبنلاحط وجود الموبايلات بسعر أقل في المحلات؟