انطباعات ومراجعة أولية لهاتف realme 7 و ريلمي 7 برو

 

انهارده هتكلم عن انطباعاتي عن موبايلات realme 7 و 7 برو وهل حدث تطويرات عن الاصدارات السابقة و اهم المميزات اللي نزلت في الموبايلات دي, لكن في البداية اعتذر عن فترة الغياب الكبيرة نظراً لظروف امتحاناتي.

موبابل realme 7

تصميم الريلمي 7

على عكس العاده ريلمي غيرت اخيرا من من شكل الموبايل ودي حاجه افتقدناها كثير سواء النسخة العادية او النسخه البرو لكن الحاجه اللي ظلت سابته هي الخامات خامات الريلمي 7 فضلت بلاستيك زي ما هي ودي حاجه كنا مستنيين نشوف لها تطوير لكن الحقيقة الشكل الجديد شكل مختلف ومميز وما شوفناش قبل كده.

الشاشه

الشاشه مختلفتش كثير عن الاصدار السابق هي هي نفس المواصفات  6.5 بوصة فل hd بلس شاشه 90 هرتز ريلمي ما تنازلتش عن النقطه دي بالاضافه لطبقه الحمايه جوريلا جلاس 3 نفس المواصفات بالضبط

الرامات

حصل فيها اختلاف بسيط ما بقاش في نسخه 64 4 أقل نسخه بقيت 64/6 والنسخه ال 128 و 8 جيجا رام نفس النوع UFS 2.1

الأداء

الاداء ما اختلفش كثير عن ريلمي 6 المعالج بقى ميدياتك 95G تطوير بسيط جدا عن G90T بس مش عارف بقى الأداء الفعلي هيكون افضل ولا ايه لكن على حسب المراجعين الهنديين اللي وصلهم الموبايل بيقولوا ان مفيش اختلاف كبير

الكاميرا

بالنسبة للكاميرا الرئيسية ريلمي استخدمت مستشعر السوني الجديد IMX682 اللي استخدمته في النسخه البرو وده تطوير ممتاز بس اكيد مش هيديك نفس نتائج التصوير بسبب اختلاف المعالج،  الكاميرا الالترا وايد الزاويه بتاعتها قلت بسبب البعد البؤري 16mm باختلاف 3mm عن ريلمي 6 وده هيترجم على أرض الواقع ان الصوره هي هتبقى أضيق بس مش عارفين بقى الجوده هتكون افضل ولا ايه ومازال عندك الكاميرا depth والكاميرا الماكرو اللي انا شايف ان هما ملهمش لازمه

بالنسبه للكاميرا السيلفي فهي موجودة داخل ثقب ومحصلش فيها اي تطوير

الموبايل جاي بنفس المنافذ نفس الفتحات نفسي تقنيات الاتصال ونفس مكان البصمه ما فيش اختلاف يعني

التطوير الملحوظ اللي حصل ان البطاريه هنا بقت 5000 ملي امبير بدل 4300 بس بنفس سرعه الشحن 30 واط ودي نقطه كان نفسي يحصل فيها تطوير وريلمي بتقول ان هو هيشحن 50 في الميه في 26 دقيقة وهيشحن البطاريه كاملة من صفر ل 100% في 65 دقيقه وده زمن كويس  جداً على البطاريه ال 5,000 مللي أمبير

واخيرا ألوان الموبايل mist blue و mist white ميست بمعنى ضباب، الصراحة الموبايل ما قدمش تطوير قوي يعني وانا متحمستش كتير للموبايل ده

أسعار هاتف ريلمي 7

النسخة الأقل 64/4 جيجا تم تسعيرها ب 14999 روبيه هندي بما يعادل 3200 جنيه مصري, والنسخة 128/8 تم نسعيرها ب 16999 روبيه هندي بما يعادل 3650 جنيه مصري مع العلم ان هذه هي اسعار الهند والاسعار في مصر تكون اغلي قليلاً بعد اضافة الضرائب.

 

هاتف realme 7 pro

نخش على النسخه البرو واللي حصل فيها شويه حركات كده عجبتني وحصل في تطويرات مثيرة يعني انا اتحمست له

نبدا بالتصميم

التصميم هنا نفس تصميم الريلمي 7 باختلاف في الألوان هنا في اللون الأزرق لكنه أغمق شوية عن ازرق 7 realme واللون التاني هو اللون الفضي

ثانيا الشاشه

الشاشة حصل فيها تغيير جذري بقت سوبر اموليد لكن ريلمي قررت الاستغناء عن نقطة 90 هرتز وبقت شاشه عاديه 60 هرتز وده هيزعل الناس الجيمر، لكن الشاشات السوبر اموليد تكلفتها بتكون أغلى فريلمي عشان التكلفة متوسعش منهم ضافت حماية جوريلا جلاس 3 بلس بدلاً من جوريلا جلاس 5 اللي كانت في ريلمي 6 برو، ونتيجه لان الشاشه بقت اموليد فأنت هنا بقيت تاخذ بصمه مدمجة في الشاشه بدل ما كانت في الجنب.

الكاميرا

الكاميرا ظلت زي ما هي 64 ميجا بيكسل لكن هنا ريلمي استخدمت مستشعر سوني الجديد 682 IMX الجيل التاني واللي بيطلع نتائج ممتازه زي ما ريلمي عرضت نماذج للصور في المؤتمر وده يعتبر تطوير كويس جدا لكن الحاجه الوحشه ان ريلمي استغنت عن العدسه التليفوتو مش عارف ريلمي اخذت الخطوه دي ازاي لكن بتقول ان الكاميرا الرئيسية بالمستشعر الجديد 682 هيقدر يديك نتايج وتفاصيل بنفس قوه العدسه التليفوتو وريلمي عوضتها وحطت مكانها عدسه ماكرو اللي ما حدش بيستخدمها

كاميرا السيلفي بقت أحادية بدقة 32 ميجابكسل بفتحة عدسة f2.5 بعد ما كانت ثنائيه في الاصدار السابق واستغنت ريلمي عن الكاميرا السيلفي الالتراوايد

البطاريه زادت بقت 4500 مللي أمبير بعد ما كانت 4300 زياده فرق بسيط بس الاضافه البسيطة دي ريلمي عوضتها بحاجة اكبر وهي شاحن 65 واط شاحن قوي جدا بيشحن البطارية كاملة في 34 دقيقة.

الحقيقة الموبايل ده في اب جريد  حلوه زي الشاشة الاموليد والكاميرا 64 بكستشعر السوني الجيل التاني مع الشاحن السريع 65 واط لكن في المقابل فيه داون جريد زي ازالة العدسة التيلي فوتو والتنازل عن نقطة 90 هرتز

أسعار هاتف ريلمي 7 برو

الاسعار بتبدا من 19999 روبيه هندي للنسخة 128/6 جيجا بما يعادل 4200 جنيه مصري والنسخة الاعلي 128/8 بسعر 21999 روبيه هندي بما يعادل 4700 جنيه مصري مع التذكير مرة ثانية أن الاسعار في مصر تكون اغلي قليلا بسبب الضرائب.

انتظروا مراجعة كاملة الهاتفين عند نزولهم للسوق المصري