 |
| مقارنة أونر 9X pro مع سامسونج A51 |
موبايلات أونر 9X pro و سامسونج A51
أونر نزلت مؤخراً موبايلها أونر 9X pro فقولنا نعمله مقارنة
مع موبايل تاني في نفس فئته السعرية سعره ويكون منتشر برضو واخترنا سامسونج A51 واللي
محقق مبيعات كويسة، من غير ما نرغي كتير يلا بينا نبدأ المقارنة.
نظرة تفصيلية على كل موبايل
تصميم وبنية أونر 9X pro و سامسونج A51 :
نبدأ بموبايل
أونر 9X pro اللي أبعاده 77.2×163.1 ملم وسمكه 8.8 ملم
ووزن 206 جرام أما
سامسونج 51A بيجي بأبعاد 158.5 × 73.6 وسمكه 7.9 ملم ووزنه 172 جرام، شخصياً بحب الموبايلات الخفيفة واللي سمكها رفيع وهنا هفضل
السامسونج A51 خلونا نبص على الديزين والماتريال.
موبايل أونر 9X pro جاي بماتريال زجاج مع فريم ألومنيوم وده اللي متقل وزنه ومفيش إعلان رسمي عن طبقة الحماية أما سامسونج A51 جاي بماتريال بلاستيك بالكامل حتى الفريم بلاستيك لكن عليه طبقة حماية
جوريلا جلاس 3 ميزة الفريم
البلاستيك انه مش هيقشر زي الألومنيوم لكن يعيبه انه ضعيف مش هيستحمل لو الموبايل
وقع على جنبه، بالنسبة بقى لمسكة الموبايلين في الايد فمسكة سامسونج A51 مريحة ومناسبة وخفيفة على الايد أما أونر 9X pro فالموبايل تقيل حبتين لو مسكته لفترة طويلة.
من حيث
الديزين بقى فموبايل أونر 9X pro تصميمه تحفة وشيك خاصة من
الضهر بسبب انعكاس للإضاءة على شكل حرف X بيخلي شكل الموبايل روش
الحقيقة، أما A51 فتصميمه بسيط وفيه انعكاس للضوء
بألوان الطيف.
ونلخص
اللي فات فإن تصميم أونر 9X pro جميل جداً وشياكة لكن
يعيبه الوزن التقيل، لكن A51 مش لاقي فيه ميزة في الديزين مقارنة بالأونر إلا خفة وزنه.
الشاشات
:
الشاشة في أونر 9X pro من نوع IPS LCD بينما شاشة سامسونج 51A فمن نوع Super AMOLED
ودي نقطة تفوق صريحة لسامسونج، حجم الشاشتين متقارب جداً 6.5 بوصة للشاشتين شاشة 9X pro كاملة بدون نوتش إنما شاشة A51 فيها ثقب، لكن عجبني استغلال مساحة الشاشة في السامسونج أكتر
شوية بسيطة مع إن المفروض العكس، والشاشتين جايين بدقة فل اتش دي بلس.
وعملياً شاشة السامسونج بتقدم سطوع وألوان زاهية ومشبعة
حتى في ضوء الشمس ودي ميزة الشاشات الأموليد، ومع ذلك فالفرق بينهم بسيط لصالح سامسنوج A51.
شاشة A51 قولنا عليها قبل كده انها أفضل شاشة فئة متوسطة وشاشات
السامسونج مش محتاجة كلام عليها، لكن الفكرة في الناس اللي مبتحبش الشاشات عشان IPS
وده مش مبرر لأني فيه شاشات IPS أفضل بكتير من شاشات أموليد.
منصة
التشغيل :
موبايل أونر 9X pro بيشتغل بأندرويد 9 باي مع واجهة هواوي 9.1 EMUI لكن زي ما انتو عارفين من غير خدمات جوجل
عشان الحظر المعمول من أمريكا على الصين، أما سامسونج 51A فبيشتغل بأندرويد 10 مع واجهة سامسونج الجديدة 2 One UI.
بص يا سيدي أنا عارف انك قلقان من حكاية
خدمات جوجل رغم انك تقدر تسطبها كلها بسهولة جداً، لكن يظل الموضوع ريسكي وفيه
مخاطرة لأن ممكن جوجل تعلن الحرب على الموضوع ده وتقفله، فلازم تبقى واخد قرارك من
البداية لأنها نقطة حاسمة، ولو نويت تشتري الموبايل ابقى خلي التاجر يسطبلك عليه
خدمات جوجل وده حقك، على الجانب الآخر فسامسونج A51 شغال بواجهة سامسونج 2 One UI واللي اتحسنت كتير
وبقت سلسلة وأسرع عن واجهات سامسونج اللي قبل كده.
الذاكرة
:
النسخ اللي موجودة بمصر بالنسبة لأونر 9X pro نازل منه النسخة بذاكرة داخلية بحجم 256 جيجابايت من نوع UFS2.1 مع ذاكرة وصول عشوائي
بسعة 8 جيجا رام، وينفع تركب
كارت ميموري خارجي لكن هتضطر تستغنى عن الشريحة الثانية، وأنا شايف إن 256 جيجابايت مش هتحتاج
معاها كارت ميموري لأنها كافية جداً وأول مرة نشوف موبايل بربع تيرابايت في الفئة
دي.
وبالنسبة لسامسونج A51 فجاي بذاكرة داخلية بحجم 128 جيجابايت من نوع 2.1 UFS مع ذاكرة وصول عشوائي بسعة 6 جيجا رام، مع
إمكانية تركيب ميموري خارجي حتى 512 جيجابايت في منفذ مخصص.
الرامات 8 جيجا بتدليك مساحة أكبر
لتشغيل تطبيقات كتير في الخلفية وبتساعد المعالج انه يأدي مهام كتيرة في وقت واحد
والتفوق هنا لصالح 9X pro تفوق بسيط.
الأداء
:
نيجي بقى
للمعالج عندك أونر 9X pro فيه المعالج كيرين 810 ثماني النواة بتردد يصل 2.27 جيجاهرتز
وبتكنلوجيا تصنيع 7 نانوميتر أما
سامسونج A51 جاي بمعالج سامسونج 9611 Exynos بتردد يصل 2.3 جيجاهرتز بتكنولوجيا تصنيع 10 نانوميتر.
المعالج في 9X pro هو نقطة القوة في الموبايل
لأنه معالج فلاجشيب حرفياً هيديك أداء صاروخي خاصة مع الرامات الكبيرة 8 جيجا أداء المعالج بيكافئ سناب دراجون 730 كمان فيه تبريد مائي مش هيخلي الموبايل يسخن بسرعة مع الاستخدام التقيل،
إنما أداء سامسونج A51 كويس وسريع برضو لكن مش هقول صاروخ زي 9X pro.
المعالج
الرسومي في 9X pro هو Mali-G52 MP6 بينما في A51 هو Mali-G72 MP3 وبالنسبة للأداء في الألعاب عندك بابجي في 9X pro بتشتغل على إعدادات جرافيك high HD بس مع ان المعالج يقدر يشغلها أحسن من كده
إنما 51A بيشغلها على إعدادات ultra HDR أينعم مش سلسة شوية وهتسقط منك فريمات كل
فترة لكن ممكن تقلل الاعدادات لحاجة أقل ومش هتوقع منك فريمات.
لعبة فورت
نايت مش مدعومة على المعالجين دول بشكل رسمي مع إنها مدعومة على معالجات أقل
وتشتغل عادي الفكرة ان المعالجات مش معمولها optimization مع الألعاب.
الكاميرا
:
الكاميرا الخلفية في أونر 9X pro ثلاثية الأولى بدقة 48 ميجابكسل بمستشعر سوني IMX582 بفتحة عدسة واسعة F1.8 بحجم بكسل 0.8 ميكرون مزودة بخاصية الفيز
ديتيكشن اوتو فوكس أما الثانية فبدقة 8 ميجابيكسل ببعد بؤري 13mm وبفتحة عدسة أضيق F2.4
وهي عدسة ultrawide والكاميرا الثالثة فبدقة 2 ميجابكسل وبفتحة عدسة F2.4 مسؤولة عن قياس العمق مع فلاش خلفي أحادي LED.
نخش على كاميرات A51 واللي جاي بأربع كاميرات خلفية الأولى بدقة 48 ميجابكسل بمستشعر
سامسونج S5KGM2 بفتحة عدسة F2.0 بحجم بكسل 0.8 ميكرون مزودة بخاصية الفيز
ديتيكشن اوتو فوكس، والثانية بدقة 12 ميجابكسل وفتحة عدسة F2.2
ذات بعد بؤري 12mm للتصوير بزوايا واسعة للغاية ultrawide والكاميرا الثالثة فبدقة 5 ميجابكسل وفتحة عدسة F2.4 مخصصة لتصوير الماكرو والكاميرا الرابعة
فهي فقط مسؤولة عن العمق بدقة 5 ميجابكسل وفتحة عدسة F2.2
،الكاميرات جاية مع فلاش خلفي أحادي LED.
نقطة الكاميرات هنقسمها على جزئين الجزء
الأول خاص بالكاميرا الرئيسية والجزء التاني خاص بباقي الكاميرات.
بالنسبة لأداء الكاميرات الرئيسية على أرض
الواقع فكاميرا 9X pro بتطلع نتايج ممتازة بفضل مستشعر سوني IMX582 اللي بيتفوق على
مستشعر السامسونج GM2 هتديك تفاصيل
وحدية أكتر شوية من كاميرا A51 بشكل عام ومعالجة
صور أفضل، لكن أنا شايف ان لون البشرة واقعي أكتر في 51A بيميل للأصفر إنما 9X pro بيميل للون الأحمر.
بالنسبة لباقي الكاميرات عندك الكاميرا
الألترا وايد في سامسونج A51 أفضل لأنها بتطلع
صور بزوايا أوسع وتشوه أقل من 9X pro وبإضاءة أفضل الحقيقة سامسونج متفوقة في الحتة دي.
موبايل سامسونج A51 فيه كاميرا ماكرو عكس 9X pro اللي مفيهوش وده تفوق صريح لل A51 وأداءها كويس ومقبول.
بالنسبة لتصوير الفيديو فموبايل سامسونج A51 بيقدر يصور بدقة فور كيه أو فل اتش دي
بسرعة بتوصل 120 إطار في الثانية
وفيه تثبيت إلكتروني، لكن 9X pro مبيصورش فور كيه من الأساس وحتى دقة الفل اتش دي آخرها 30 إطار بس في الثانية
من الآخر سامسونج A51 متفوق في تصوير
الفيديوهات.
بالنسبة للكاميرات الاماميه عندك 9X pro جاي بكاميرا سيلفي بسلايدر بدقة 16 ميجابكسل بفتحة عدسة F2.2 بينما A51 جاي بكاميرا سيلفي موجودة في ثقب دقتها 32 ميجابكسل بفتحة
عدسة F2.2 برضو والاتنين بيصورو فيديو سيلفي بدقة فل
اتش.
جودة كاميرا السيلفي في الموبايلين قريبة
جداً من بعض سواء في ضوء النهار مفيش فروقات كبيرة غير إن صور البورتريه في 9X pro بتطلع لاسعة overexposed ولون البشرة بيبقى أبيض إنما A51
بيطلع لون بشرة أوقع.
التصوير بالليل أفضل في حالة 9X pro من حيث الإضاءة والتفاصيل وعدم ظهور النويز لكنه مش الواو يعني هو
أفضل حاجة بسيطة.
الصوت
:
الاتنين جايين بسماعة خارجية تحت على اليمين صوتها وواضح
ونفس الكلام لصوت سماعة المكالمات بالإضافة لوجود منفذ السماعات التقليدي 3.5mm فيهم كلهم.
بس الحقيقة
التجربة الصوتية في A51 ممتازة الصوت مجسم وواضح وفيها درجة
بيز وبتدعم تقنية Dolby Atmos وصوتها عالي إنما 9X pro صوتها متوسط يعني مش عالي قوي ولا واطي
والصوت مش مجسم من الآخر التجربة الصوتية في A51 أحسن.
الاتصالات
والحساسات :
الاتنين
بيدعموا واي فاي بالإضافة لدعم خاصية dual-band وخاصية WI-FI Direct والهوتسبوت لمشاركة الموبايل داتا.
سامسونج A51 بيدعم بلوتوث الإصدار 5.0 لكن
9X pro بيدعم بلوتوث 4.2.
كمان الاتنين
بيدعموا نظام التموضع العالمي GPS كمان بيدعموا لموجات
الراديو FM.
A51 بيدعم خاصية الاتصال قريب المدى NFC إنما 9X pro مبيدعمهاش والاتنين مبيدعموش مستشعر الأشعة
تحت الحمراء.
مستشعر البصمة موجود في جنب الهاتف مع زرار الباور
في حالة 9X pro وموجود في ظهر الهاتف في حالة A51 واللي اتحسنت عن الإصدار القديم لكن لو هنقارن السرعة فبصمة 9X pro أسرع لكن مش بيدعم Face unlock عشان يحافظ على عمر السلايدرإنما A51 فيه الفيس انلوك لكنه بطئ مش أسرع حاجة
الموبايلين
فيهم كل المستشعرات، التسارع والتقارب وبوصلة وحساس جيروسكوب لتشغيل الواقع
الافتراضي وحساس الضوء.
الشبكة في 9X pro أقوى ومستقرة أغلب الوقت إنما في A51 الشبكة متوسطة وكان فيه شكاوي كتير منها في الإصدار القديم A51 لكن اتحسنت تحسن بسيط.
المنافذ
:
الموبايلين
جايين بمنفذ يو إس بي 1.0 Type-C الجيل الأول الإصدار التاني مع دعم لخاصية الاتصال العكسي بالإضافة
لخاصية OTG.
منفذ سماعات
الرأس التقليدي 3.5 ملم
منفذين لتركيب
شريحتين اتصال من النوع نانو SIM ومنفذ مخصص لكارت الميموري
في حالة سامسونج A51 ومنفذين لشريحتي اتصال فقط أو شريحة
اتصال واحدة مع كارت ميموري في حالة أونر 9X pro.
البطارية
:
بطارية أونر 9X pro بتيجي بسعة 4000 مللي أمبير بتشحن بقدرة 10 وات، وبرضو سامسونج A51 جاي ببطارية 4000 مللي أمبير لكن بتشحن بقدرة 15 وات
ودي نقطة تفوق لسامسونج.
بطارية 9X pro هتقعد معاك 6 و 7 ساعات شاشة
مفتوحة لأن معالج الكيرين 810 موفر
جداً للطاقة عكس بطارية 51A اللي هتقعد معاك 5 ساعات بس شاشة مفتوحة.
بطارية 9X pro هتاخد حوالي ساعتين شحن وده وقت كبير لكن
السامسونج بتشحن في ساعتين إلا تلت أو ساعتين إلا ربع عارف إن مش فرق كبير بس نقطة
لازم نوضحها.
الخلاصة
موبايل أونر 9X pro تشتريه لو عايز أداء قوي وتصميم شيك مع خامات محترمة من أونر وشبكة قوية ومستقرة في أغلب الأماكن مع كاميرا رئيسية ممتازة إلى حد كبير، أما سامسونج A51 تشتريه لو عايز شاشة بألوان زاهية ومشبعة ولو انت عايز خدمات جوجل بشكل قانوني ولو بتدور على اسم سامسونج وخدمة ما بعد البيع كويسة من سامسونج.
أسعار موبايلات أونر 9X pro و سامسونج A51
الأسعار الرسمية هي 5350 جنيه لهاتف سامسونج A51 وسعره ودلوقت وصل ل 4500 في المحلات للنسخة الوحيدة المتوفرة للأسواق المصرية 128 جيجا مع 6 جيجا رام، أما أونر9X pro سعره الرسمي 4500 جنيه للنسخة الوحيدة 128 مع 8 جيجا رام وانتهت فترة الحجز المسبق وهيبقي متاح للبيع في منتصف شهر مارس.
