 |
| realme 6 مراجعة هاتف |
مراجعة هاتف 6 realme ريلمي 6
ريلمي
بعد ما اتأخرت علينا كتير أخيراً أعلنت عن طرح 6 realme بالإضافة
للنسخة البرو في مصر نسيبنا من النسخة البرو دلوقت وانهارده هنراجع ريلمي 6
العادي، الموبايل اللي
نازل ياخد مكان ريلمي 5 برو لأن التسعير هنا زاد حبتين تلاتة، طب مين اللي خاد
مكان ريلمي 5؟ ما احنا قولنا في مراجعة 6i انه نازل ياخد مكان ريلمي 5
فعيب تسأل سؤال زي ده
إلا لو مكنتش شوفت مراجعة 6i فأنا هسامحك، ومن غير رغي كتير يلا بينا على
الريفيو.
موبايل 6 realme ريلمي 6
تصميم موبايل ريلمي 6
خامات موبايل 6 realme بلاستيكية محمية بطبقة جوريلا جلاس 3 مع إطار بلاستيك برضو سمكه 8.9 ملم
ووزن الموبايل 191 جرام.
خلاص
الموبايل نزل في فئة سعرية معظمها خامات إزاز ومكنش ينفع نعدي النقطة دي طالما
ريلمي حطت تسعير مخيب، لكن في المجمل انت هنا بتضحي بالخامة مقابل قيمة كويسة،
وريلمي ريحت دماغها وضافتلك طبقة جوريلا جلاس 3 مقاومة لرذاذ الماء كتتحسين للماتريال، ونقطة الوزن التقيل هنا تأخذ
على ريلمي مقارنة بالموبايلات البلاستيك التانية وصعب تستخدمه بإيد واحدة مع إن
دلوقت كل الموبايلات صعب تستخدمها بإيد واحدة.
الديزين واخد
روح ريلمي XT في شكل الانعكاسات اللي
عبارة عن تدرج للون الأزرق من الفاتح للغامق وبيتجمعوا في نقطة في الأسفل وريلمي
بتسمي التصميم ده "المذنب" والألوان بتاعته الأبيض والأزرق مخلياه روش وشبابي.
وفي الضهر
فيه الكاميرات الأربعة جاية في شكل مستطيل وفلاش بره نطاق المستطيل مع شعار ريلمي
في الأسفل بالتوازي مع مستطيل الكاميرات، عجبني التصميم ده أوي، لكن اللي معجبنيش
هو بروز الكاميرات الكبير لدرجة انك لو حطيته على المكتب هيقعد يتهز منك ويفضل
تركبله جرابه عشان يغطي جزء من البروز.
الشاشة:
الشاشة IPS فل اتش دي بلس بحجم 6.5 بوصة فيها ثقب فوق على الشمال مع كثافة
بكسلات 405 بكسل في البوصة
الواحدة، وقوة سطوع 480 نيتس وبتستحوذ
الشاشة على 84% من الواجهة، لحد
هنا عادي لكن الطفرة هنا معدل التحديث 90 هرتز.
الشاشة هنا زي ريلمي 6 برو وأخيراً بقينا نشوف دقة
فل اتش دي بلس في النسخة العادية بعد ما كانت حكر على النسخة البرو، والجميل كمان
انها نفس معدل التحديث 90 هرتز واللي تعتبر أرخص شاشة 90 هرتز حتى الآن
واللي هتديك سلاسة وسرعة في الاستخدام لكنها بتستنزف البطارية بسرعة لكن فيه أوبشن
انك تختار 60 أو 90 هرتز أو تخليه
أوتو وهنصحك تخليه 60 هرتز علطول
بإستثناء وانت بتلعب لأنك هتشوف فرق حقيقي خاصة وانت بتلعب على فريم ريت عالي، ومن
ناحية تانية تحافظ على حالة البطارية لأن 90 هرتز بتستنزف البطارية.
وبالنسبة لألوان الشاشة فالألوان جيدة لكن بالتأكيد مش بنفس حيوية ونضارة الشاشات
الأموليد، لكن الميزة في سطوع الشاشة فيها مستويات عالية من السطوع اللي بيوصل 480 نيتس أو شمعة ودي
درجة ممتازة السطوع تحت الشمس وهتخليك تشوف الشاشة بوضوح كمان مستوى عدم السطوع
بيقل ل 2.6 شمعة وده مريح
للعين ومناسب لاستخدام الموبايل في الضلمة.
منصة التشغيل:
موبايل ريلمي 6 بيشتغل بواجهة ريلمي الجديدة Realme UI
المبنية على نظام أندرويد 10.
واجهة ريلمي UI عبارة عن تطوير لواجهة أوبو 7 color OS، تصميم الواجهة
بقى شبابي أكتر مخليها سلسة وسريعة مع شكل أيونات وطريقة عرض اشعارات جديدين عن Color OS
وموجود دارك مود، والمميز كمان في الواجهة دي انها موفرة في الطاقة بشكل أفضل من
واجهة أوبو.
الذاكرة:
نسختين بس هما اللي نازلين مصر من الموبايل ده، واحدة بذاكرة
داخلية 128 جيجابايت نوعها 2.1 UFS مع ذاكرة وصول عشوائي 4 جيجا رام والنسخة
الثانية بذاكرة 128 مع 8 جيجا رام نوع
الرام LPDDR4x وبيتيحلك تركب كارت ميموري خارجي في مكان مخصص.
المفروض كانت ريلمي نزلت نسخة 64 مع 4 رام عشان تحل معضلة التسعير
خاصة وأن النسخة 128 مع 4 جيجا رام تعتبر من
أقل النسخ من حيث حجم الرام في فئتها السعرية، والمشكلة الأكبر انك لو بصيت على
سعر النسخة الكبيرة 128 مع 8 هتلاقيها في فئة 4500 والفئة دي فيها
موبايلات أفضل لو أهملنا 90 هرتز اللي مش هتلاقيها في موبايل أرخص من
ده، ولينا كلام عن التسعير في الآخر.
الأداء:
الموبايل فيه معالج ميدياتك Helio G90T بدقة تصنيع 12 نانو ثماني النواة بتردد 2.0 جيجاهرتز، وجاي
معاه معالج رسوميات Mali-G76 MC4.
المعالج ده نفس معالج شاومي نوت 8 برو، نظرياً المعالج محقق 288 ألف نقطة في
اختبارات Antutu متفوق على نوت 8 برو بفرق حوالي 10 آلاف نقطة، والغريب ان
المعالج ده متفوق على معالج ريلمي 6 برو بفرق مش صغير 20 ألف نقطة مش عارف ريلمي
بتفكر إزاي لكن في اختبار GeekBench اللي بيقيس القوة على مستوى النواه الواحدة فريلمي 6 برو متفوق بفرق
بسيط.
الأداء سريع جداً سواء على مستوى المهام اليوميه من سوشيال
ميديا وتصفح أو على مستوى الألعاب وهنتكلم عن النقطة دي لاحقاً، المعالج بيقدر
يشغلك تطبيقات كتير في الخلفية من غير ما يقفل منها وطبعاً عدد التطبيقات على حسب
حجم الرامات، لكن فيه تنازل كبير في هاردوير المعالج وهو عدم وجود نظام تبريد
والتنازل ده هتلاحظه مع الألعاب في ارتفاع عالي لدرجة حرارة الموبايل، واللي هيأزم
الوضع اننا بقينا في الصيف، وممكن مع الاستخدام الطويل يحصل تلف في المكونات
الداخلية والنقطة دي مش هتبان غير مع الاستخدام الطويل.
معالج الرسومياتMali-G76 بيشغلك ببجي على إعدادات جرافيك HDR مع فريم ريت ultra بدون لاج وفيه ميزة فشيخة انك لو قللت إعدادات الجرافيك وخليتها
أقل حاجة smooth بيديك خيار انك تعلب على فريم ريت extreme ودي تجربة مميزة جداً خاصة مع وضع 90 هرتز.
لعبة فورتنيت بتشتغل على معدل إطارات 30 وبتشتغل على
كواليتي هاي بصورة ممتازة وبدون مشاكل.
الكاميرات:
الموبايل جاي بأربع كاميرات خلفية بدقة 64 ميجابكسل للكاميرا
الأولى بمستشعر سامسونج GW1 بفتحة عدسة F1.8 بحجم بكسل 0.8 ميكرون مزودة بالفيز ديتيكشن
اوتو فوكس، والثانية بدقة 8MP ببعد بؤري 13mm وفتحة عدسة F2.3 وهي عدسة
التراوايد، والكاميرا الثالثة بدقة 2MP وبفتحة عدسة F2.4 بحجم بكسل 1.75 ميكرون وهي عدسة
مخصصة لتصوير الماكرو، والكاميرا الرابعة بدقة 2MP وفتحة عدسة F2.4 مسؤولة عن تصوير
الأبيض والأسود وأخذ قياسات العمق، والكاميرات جاية مع فلاش LED.
الكاميرا الرئيسية فيها نفس مستشعر ريلمي XT
القوي وبتيحلك تصور على وضع 16 أو 64 ميجابكسل، وهنا وضع 64 بيطلع تفاصيل أكثر
وألوان أحسن ونويز أقل عن وضع 16 ونظام HDR ممتاز في وضع 64 لكن خلي بالك حجم الصور بيبقى كبير 20 ميجا وأكتر لو
هتقعد تستخدم وضع 64 فهتستهلك مساحة
تخزين كبيرة، النتايج كويسة على أرض الواقع الصور طالع فيها دايناميك رينج ممتاز
خاصة بالنهار بفضل نظام HDR المتقدم من ريلمي، كمان فيه خاصية chomra boost اللي بتعزز الألوان وبتطلع ألوان مشبعة و مبهرة لكن ساعات الألوان
بتفرقع وتبقى مشبعة بصورة كبيرة.
في تصوير البورتريه معالجة الصور بقت أفضل وبقت تطلع لون
بشرة أوقع العزل نادراً لما يغلط والصور فيها تباين كويس بفضل عدسة العمق.
جودة التصوير الليلي وسط بمعنى انه مفيش نويز كتير بس لسه
موجود لو عملت زوم والتفاصيل مش زي صور النهار بتقل خالص إنما كألوان فالألوان
مظبوطة، النايت مود بياخد حوالي 4 ثواني بس بيطلع صور منورة وفيها تفاصيل
أكتر عن الوضع الأساسي.
الكاميرا الالترا وايد بتصور بزاوية °119 درجة ومعالجة
الصور بقت مبهرة الحقيقة فيها كمية دايناميك رينج رهيبة حتى أكتر من الكاميرا
الرئيسية مش عارف إزاي؟! وفيه معالجة أتوماتيكية للتشوه، وبالنسبة
للتفاصيل فهي وسط بمعنى انها أكيد مش زي الكاميرا الرئيسية لكن أفضل من الكاميرا
الماكرو.
كاميرا الماكرو لتصوير الأشياء على بعد 4 سم بتطلع صور
ناعمة مفيهاش تفاصيل ولا حاجة بالنسبالي كاميرا الماكرو مجرد سد خانة، انت ممكن
تاخد نفس النتيجة من الكاميرا الرئيسية بعد ما تقص الصورة.
الموبايل بيصور فور كيه بنتايج كويسة لكن بيبقى فيه اهتزازات
كتير وده لأن المثبت الالكتروني مبيشتغلش على وضع فور كيه وبيشتغل فقط على وضع فل
اتش دي.
الكاميرا الأمامية دقتها 16 ميجابكسل بمستشعر سامسونج S5K3P9 ببعد بؤري 26mm بفتحة عدسة F2.0 وبحجم بكسل 1.0 ميكرون.
كاميرا السيلفي للأسف مفيهاش اوتو فوكس، لكن كجودة تفاصيلها
حلوه في الإضاءة الجيدة وبتطلع لون البشرة مايل للأحمر وده أوقع من لما يفتحلك
البشرة وتبقى بيضه، وفيها نظام تجميل عن طريق الذكاء الاصطناعي بينعم الوش وبيضيف
بعض التأثيرات الحلوة.
السماعات:
سماعة
خارجية واحدة مونو مكانها تحت على اليمين بالإضافة لوجود منفذ السماعات 3.5 ملم.
جودة الصوت السماعة متوسطة مش أعلى
حاجة في موبايلات زي شاومي نوت 8 صوتها
أعلى منه ودي كانت مشكلة في ريلمي 5،
لكن صوت سماعات المكالمات تمام ومفيهوش مشاكل.
الاتصالات والمستشعرات:
واي فاي وخاصية dual-band وخاصية WI-FI Direct وهوتسبوت.
بلوتوث 5.0 ونظام التموضع العالمي GPS وعندك راديو FM
البصمة موجودة في الجنب اليمين مع
زرار الباور وده أنسب مكان ليها وكأداء سريعة ومبتغلطش وتقدر تعتمد عليه بشكل كلي وكمان بيدعم Face Unlock سريع برضو.
الموبايل فيه مستشعرات التسارع
والتقارب وبوصلة وحساس جيروسكوب ومستشعر الضوء.
الشبكة كويسة جداً في معظم الأماكن
ومفيهاش مشاكل وملناش أي تعليق عليها الحقيقة.
المنافذ:
منفذ يو إس بي 1.0 Type-C الإصدار الثاني بيدعم OTG وخاصية الاتصال العكسي.
منفذ سماعات الرأس التقليدي 3.5 ملم
منفذين لتركيب شريحتين اتصال من النوع
نانو SIM ومنفذ خاص لكارت ميموري.
البطارية:
بطارية 6 realme حجمها 4300 مللي أمبير
بتشحن بقوة 30 وات عن طريق
منفذ تايب سي.
البطارية أينعم على قدر المنافسة ولو
كنت اتمنى تبقى 5000 مللي أمبير
زي أخوه الصغير 6i لكن ريلمي عوضتها بشاحن
سريع قوي، وعالعموم البطارية هتساعد في الألعاب وهتقضي معاك يوم ونص استخدام متوسط
حوالي 8 ساعات شاشة مفتوحة على سرعة 60 هرتز
وده لأن زي ما قلتلك قبل كده إن واجهة ريلمي الجديدة موفرة بشكل كويس في الطاقة.
لكن ريلمي متفوقة بقارق كبير عن
المنافسين في نقطة الشحن السريع 30 وات
بإستثناء موبايل نوفا 7i جاي بشاحن 40 وات، على أرض الواقع بقى الشاحن سريع جداً بيوفرلك تشحن البطارية من
صفر ل 100% في مجرد ساعة
وأقل حوالي 55 دقيقة.
عيوب موبايل realme 6
✖ تسعير الهاتف
مرتفع ومخيب
✖عدم وجود نسخة 64 مع 4 رام
✖شاشة IPS
وليست أموليد
✖ لا يأتي في علبة
الهاتف سماعة أذن
✖ لا توجد لمبة الاشعارات
مميزات موبايل 6 realme ريلمي 6
✔ معالج
قوي وسريع في المهام اليومية وفي الألعاب
✔ شاشة فل اتش دي 90 هرتز
✔ بطارية كبيرة 4300mAH بتدعم الشحن السريع بقدرة 30 وات
✔ كاميرات قوية
بالأخص الكاميرا الرئيسية في أغلب ظروف الإضاءة
✔ مستشعر بصمة سريع جداً
موجود مع زرار الباور وده أفضل مكان ليه
✔ يدعم تركيب
شريحتين اتصال وكارت ميموري في آن واحد
محتويات علبة موبايل 6 realme
موبايل 6 realme متركبله اسكرينة بشكل مسبق
جراب ظهر شفاف للحماية
رأس شاحن سريع 30
وات
وكبل USB نوعه Type-C
كتيب التعليمات ودليل الاستخدام
الخلاصة
ريلمي 6 بالنسبة لريلمي 5 أو حتى 5 برو عمل قفزة كبيرة من حيث الشاشة الممتازة 90 هرتز بثقب للسيلفي وحواف قليلة والأداء الخرافي بفضل شريحة G90T والبطارية القوية والكاميرات الاحترافية، وده مخليه موبايل مناسب سواء على مستوى الألعاب أو على مستوى التصوير، لكن فيه تضحية بسيطة على حساب الخامات وافتقاده لنظام تبريد وتسعير من نظري مرتفع
سعر موبايل 6 realme ريلمي 6
سعر موبايل ريلمي 6 الرسمي هو 3990 جنيه
مصري للنسخة 128 مع 4 جيجا رام، و 4490 جنيه
للنسخة 128 مع 8 جيجا رام.
التسعير المرة دي مظبطش مع ريلمي،
والجروبات التقنية كلها مقلوبة على التسعير ده ومش هتلاقي حد بيشكر في سعر ده إلا
المراجعين المتعاونين مع الشركة نقطة ومن أول السطر.
لو انت عاجبك الموبايل فأنا هنصحك
تستني عليه شهر ونص شهرين والتسعير هيقل لكذا سبب أولاً شاومي هترد بموبايل note 9s وكذلك سامسونج هتنزل M31 المنافس للموبايلين دول، ثانياً هيكون الموبايل وصل للتجار وهيبقى فيه
حرق أسعار وأنا أتوقع السعر هينزل كمان 300 جنيه
وممكن أكتر.
شاومي هترخص نسخة النوت 8 برو عشان يقدر ينافس
