مراجعة هاتف Infinix S5 pro مع العيوب | شاشة كاملة و سلايدر في الفئة الاقتصادية!!

infinix s5 pro مراجعة هاتف

مراجعة هاتف Infinix S5 pro انفنكس اس 5 برو

انفنكس من أقدم الشركات اللي قدمت قيمة مقابل السعر، وهنتكلم انهارده عن infinixS5 pro بعد ما الشركة نزلت النسخة العادية S5 في مصر من حوالي 5 شهور، ونشوف هل موبايل انفنكس اس 5 برو بيقدم قيمة كويسة مقابل سعره ولا لأ؟ ومن غير رغي كتير يلا نبدأ.

موبايل infinix S5 pro انفنكس S5 برو

تصميم infinix S5 pro

خامات بلاستيكية بالكامل بما في ذلك إطار بلاستيك بسماكة 9.0 ملم ووزن الموبايل 195 جرام.

الموبايل في فئة سعرية معظمها خامات بلاستيك وهو مختلفش حاجة عنهم غير إن البلاستيك لامع مدى احساس انه إزاز، وزن الموبايل تقيل شوية وده راجع للسلايدر اللي متقل الوزن بزيادة ومكبر سمك الموبايل مخليه تخين وصعب تستخدمه بإيد واحدة مع إن دلوقت كل الموبايلات صعب تستخدمها بإيد واحدة.

الديزين عبارة عن تدرج سواء للون الأخضر أو البنفسجي من الفاتح للغامق، والحواف رفيعة والكونرز مستديرة مش حادة، من الآخر تحسه كده موبايل فلاجشيب مش فئة اقتصادية خالص.

وفي الضهر فيه الكاميرات التلاتة جوة مستطيل أسود حافتة السفلى دائرية ومعاهم فلاش مزدوج ومن فوق المستطيل بيطلع موتور الكاميرا السيلفي اللي الشركة بتعد انه بيشتغل لحد متوسط 15 ألف مرة، وبره نطاق المستطيل من الأسفل في المنتصف هتلاقي مستشعر البصمة وتحته مباشرة شعار انفنكس، أنا شخصياً عاجبني التصميم ده أوي، بس مش عاجبني بروز الكاميرات الكبير بزيادة لدرجة انك لو حطيته على المكتب هيتهز منك وللأسف الجراب مبيغطيش غير جزء صغير من البروز.

الشاشة:

شاشة كاملة IPS فل اتش دي بلس بحجم 6.5 بوصة باستحواذ 83.8% من الواجهة مع كثافة بكسلات 395 بكسل في البوصة الواحدة، وأبعاد 19.5:9.

الشاشة هنا فيها نقطتين قوة ونقطة ضعف أول نقطة قوة انها فل اتش دي بلس ويعتبر من أرخص الموبايلات بشاشة فل اتش دي، والنقطة التانية انها شاشة كاملة بدون نوتش ولا خرم ولا الكلام ده كله ودي نقطة مبنشفاش خالص في الفئة دي، و النقطتين دول بيخلو تجربة الفرجة عليها ممتازة لكن تجربة الألعاب سيئة بسبب المعالج الضعيف، أما نقطة الضعف هي مسألة الخدش لأن الشاشة معلهاش أي طبقة حماية فالأفضل تركب الاسكرينة اللي جاية مع علبة الموبايل.

الشاشة شارب وواضحة والألوان مشبعة لدرجة انك ممكن تنخدع وتفتكرها أوليد، لكن الوحش هو سطوع الشاشة اللي آخره 360 شمعة ودي درجة سطوع منخفضة جداً دلوقتي الشاشات بتوصل 480 شمعة المشكلة هتلاحظها أكتر في استخدام الموبايل في ضوء الشمس بالعافية هتشوف محتوى الشاشة، درجة عدم السطوع 5.3 شمعة ودي درجة عالية وبرضو دي درجة سيئة ومش مريحة للعين أثناء استخدام الموبايل في الضلمة.

الواجهة:

الموبايل بيشتغل بواجهة انفنكس 6.0 XOS المبنية على نظام أندرويد 10.

واجهة XOS هي واجهة خاصة بانفنكس فيها تخصيصات كتير ومع المعالج الضعيف والرامات القليلة مخلين الواجهة تقيلة ومش سلسة في المجمل.

الذاكرة:

نسخة واحدة اللي نازلة مصر من الموبايل ده بذاكرة داخلية 64 جيجابايت نوعها 5.1 eMMC مع رامات 4 جيجا من نوع LPDDR4x وبيتيحلك تركب كارت ميموري خارجي حتى 256 جيجابايت في منفذ مستقل.

أنا شايف إن نسخة 4 جيجا رام هي الأنسب وده راجع للمعالج الضعيف حبتين، فلو كان نزل نسخة 6 جيجا مكنتش هنصحك بيها لأن المعالج مش هيعرف يعمل RAM management من ناحية ومن ناحية تانية انفنكس هتنزل نوت 7 بمعالج أقوى هيكون بسعر أزيد حاجة بسيطة من S5 pro.

 الأداء:

الموبايل نازل بمعالج ميدياتك Helio P35 ثماني النواة بدقة تصنيع 12 نانو بتردد 2.3 جيجاهرتز، وجاي معاه معالج الرسوميات PowerVR GE8320.

المعالج ضعيف ويعتبر تطور بسيط لا يتعدى 10% مقارنة بانفنكس S5 العادي، ونفس المعالج موجود هواوي Y6s بسعر أقل 400 جنيه، نظرياً المعالج محقق 117 ألف نقطة في اختبارات Antutu متأخر كتير عن ريلمي C3 اللي بنفس تسعيره بفرق حوالي 75 ألف نقطة.

الأداء على مستوى المهام اليومية من سوشيال ميديا وتصفح سريع وتمام، لكن على مستوى الألعاب ضعيف جداً، المعالج آخره يشغلك 5 أو 6 تطبيقات في الخلفية من غير ما يقفل منها.

معالج 8320PowerVR GE معالج جرافيكس ضعيف آخره يشغلك ببجي على إعدادات جرافيك balanced مع فريم ريت medium بشكل كويس.

لعبة فورتنيت مش مدعومة بشكل رسمي على المعالج ده للأسف، ومن الآخر لو انت واحد هدفه الألعاب فالموبايل ده مش ليك.

 الكاميرات:

الموبايل جاي ب 3 كاميرات خلفية الأولى بدقة 48 ميجابكسل بفتحة عدسة F1.8 بحجم بكسل 0.8 ميكرون مزودة بالفيز ديتيكشن اوتو فوكس، والثانية بدقة 2MP مهمتها أخذ قياسات العمق وعمل العزل، والكاميرا الثالثة عبارة عن مستشعر low light للاضاءات الضعيفة والخافتة، والكاميرات جاية مع فلاش مزدوج Dual-LED.

أداء الكاميرا الرئيسية في وضح النهار بتطلع نتايج كويسة من حيث الألوان الزاهية والنويز القليل والصور طالع فيها تفاصيل كتير بالأخص لو بتصور على وضع 48MP لكن الدايناميك رينج ضايع خالص الأماكن المنورة منورة بزيادة بينما أماكن الشادو مضلمه ومفيهاش نور.

في تصوير البورتريه معالجة الصور محتاجه تتحسن لأنها مش بتطلع لون البشرة مظبوط، العزل شغال كويس برضو وقليل لما يغلط والصور فيها تباين وعزل كويس بفضل عدسة العمق.

جودة الصورة بالليل رائعة بفضل سنسور الإضاءة الضعيفة واللي لاحظته انه مفيش نويز كتير بس ده على حساب التفاصيل في الصورة اللي بقت قليلة خالص بمجرد ما تزوم مش هتلاقي تفاصيل الصورة بتبقى سوفت لكن كألوان فالألوان مظبوطة.

للأسف مفيش هنا كاميرا الترا وايد واللي بقت حاجه أساسية لأنها بتطلع صور بزوايا عريضة وغير مألوفة على عين الإنسان، وعشان كده الناس بتفضلها.

كمان الموبايل مفيهوش كاميرا ماكرو وبالنسبالي مش فارقة معايا وأنا شايف إن وجودها زي عدمه لأنها بتطلع صور سوفت مفيهاش تفاصيل ولا أي حاجة وانت تقدر تاخد النتيجة اللي هتطلع من الكاميرا الرئيسية بعد ما تقص الصورة.

في تصوير الفيديوهات فالموبايل بيصور فيديوهات فل اتش دي بسرعة 30 إطار في الثانية ولا يوجد به أي نوع ثبيت.

من عيوب الموبايل انه مش بيصور فور كيه آخره يصور فل اتش دي بنتايج وحشة  بيبقي فيها حركة واهتزازات كتير وده لأنه مفيهوش تثبيت من أي نوع.

الكاميرا الأمامية بسلايدر "موتور" دقتها 16 ميجابكسل بفتحة عدسة F2.0 وبحجم بكسل 1.0 ميكرون.

فيه حاجة لاحظتها والموتور بيطلع انه بيتهز ومش طالع باستقامة زي موتور أوبو رينو 2F حتى استجابة الموتور للاهتزاز متأخرة شوية مش سريعة فأنت وحظك بقى لو الموبايل وقع منك وانت بتتصور سيلفي على حسب سرعة وقوعه وزمن سقوطه شغل فيزيا أنا عارف بس بحاول أبسطهالك.

إنما كجودة ففيه حاجتين حلوين وحاجتين وحشين، الحلو فيها لون البشرة مايل للأحمر حاجة بسيطة وده أوقع من لما يفتحلك البشرة وتبقى بيضه، والحاجة التانية الداينامك رينج بتاعها مقبول، أما الوحش فأولاً التفاصيل ضايعة خالص الصور مش شارب على الإطلاق، وثانياً وضع البورتريه مبيعملش عزل كويس وتحديد الأطراف مش مظبوط.

السماعات:

سماعة خارجية واحدة مكانها تحت على الشمال بالإضافة لوجود منفذ السماعات 3.5 ملم.

مكان السماعة بيتكتم بسهولة أثناء مسكة الموبايل في الألعاب أو مشاهدة الفيديوهات، لكن كجودة فصوت السماعة متوسط مش أعلى حاجة، لكن صوت سماعات المكالمات تمام ومفيهوش مشاكل.

الاتصالات والمستشعرات:

واي فاي بيدعم dual-band و WI-FI Direct وهوتسبوت.

بلوتوث 5.0 و GPS وعندك راديو FM.

البصمة موجودة في الضهر، بصمة بطيئة وبتغلط احيان كتير ومع ذلك يفّضل تعتمد عليها ومتعتمدش على Face Unlock حفاظاً على عمر الموتور.

مستشعرات التسارع والتقارب وبوصلة وحساس جيروسكوب ومستشعر الضوء.

الشبكة حاجة وسط في معظم الأماكن يعني في موبايلات شبكتها أقوى من ده لكن عالعموم قليل لما الشبكة تفصل.

المنافذ:

منفذ يو إس بي القديم micro USB الإصدار التاني وبيدعم خاصية OTG.

منفذ سماعات الرأس التقليدي 3.5 ملم

منفذين لتركيب شريحتين اتصال من النوع نانو SIM ومنفذ خاص لكارت ميموري.

البطارية:

بطارية S5 pro حجمها 4000 مللي أمبير بتتشحن بقوة 10 وات فقط.

حجم البطارية مش الأفضل وكنا نتمنى تبقى 5000 زي بقية المنافسين زي ريلمي C3 وسامسونج M11 أو على الأقل تدعم الشحن السريع ولو بقدرة 15 وات هتفرق جداً مع المستخدمين، وعالعموم البطارية هتقضي معاك حوالي 7 ساعات شاشة مفتوحة.

نقطة الشحن البطئ 10 وات مبقتش حاجة مقبولة على مستوى كل الفئات السعرية في 2020 خلاص بقينا نشوف موبايلات ب 1700 جنيه فيها شاحن 18 وات زي شاومي 8A، وعلى أرض الواقع الشاحن بيشحن البطارية من صفر ل 30% في نص ساعة وبيشحنها كاملة في حوالي ساعتين ونص وده وقت طويل أوي.

عيوب موبايل infinix S5 pro

✖ المعالج لا يقدم أفضل أداء في فئته  ولم يقدم تطوير ملحوظ عن P22 الموجود في S5

✖ خامات بلاستيكية لامعة عرضة للتبصم والخدش

✖ درجة أقصى سطوع للشاشة منخفضة كذلك درجة عدم السطوع مرتفعة

✖ بطارية لا تدعم الشحن السريع وتستغرق وقت شحن طويل

✖ أداء الكاميرا خلفية ضعيف

✖ منفذ ميكرو يو اس بي القديم

✖ مكان السماعة الخارجية ناحية الشمال بيخليها تتكتم بسهولة 

مميزات infinix S5 pro انفنكس اس 5 برو

✔  تصميم جذاب وعصري زي موبايلات الفلاجشيب

✔ شاشة كاملة بحواف قليله جداً بدقة فل اتش دي

✔ كاميرا سيلفي في المجمل كويسة مقارنة بكاميرات نفس الفئة

✔ وجود لمبة الاشعارات

✔ يدعم تركيب شريحتين اتصال وكارت ميموري في آن واحد

محتويات علبة هاتف Infinix S5 pro

هاتف Infinix S5 pro مع اسكرينة حماية للشاشة و جراب ظهر شفاف للحماية بالاضافة ل رأس شاحن بطئ 10 وات و كبل micro USB زائد دبوس معدني لفتح درج الشريحة مع كتيب التعليمات ودليل الاستخدام ويوجد سماعات الأذن handfree

الخلاصة

انفنكس اس 5 برو عمل تطوير كبير مقارنة بانفنكس S5 العادي بإستثناء نقطة المعالج، وأنا شايف انه أنسب موبايل في فئته السعرية من حيث الديزين وجودة الشاشة، إنما كأداء فالأفضل تروح لريلمي 3C اللي بيقدم أقوى معالج في الفئة دي. 

سعر infinix S5 pro انفنكس اس 5 برو

سعر موبايل infinix S5 pro انفنكس اس 5 برو الرسمي هو 2444 جنيه للنسخة 64 مع 4 جيجا رام
متاح للحجز عبر سوق.كوم

تسعير الموبايل كويس ومقدم حاجات جديدة على فئته السعرية أهمها الشاشة الكاملة فل اتش دي بموتور وما تستهزاش من الموتور لأنه بيزود من تكلفة الموبايل.

تقييمي للموبايل ككل سبعة من عشرة 7/10