مراجعة هاتف realme C3 طفرة الفئة الاقتصادية ولكن.. !! | هاتف بلس

realme c3 مراجعة هاتف

مراجعة هاتف realme C3 ريلمي C3

ريلمي قررت السنة دي تولع المنافسة في أي فئة تدخلها، وعملت هاتف realme C3 ريلمي C3 أول موبايل موجه للجيمينج في الفئة الاقتصادية وحطت باقي الشركات وبالأخص شاومي في مأزق كبير، بس خليك عارف انك عشان تاخد موبايل جيمينج في رينج 2200 جنيه لازم تقدم تنازلات هوضحهالك في الريفيو، بدون رغي كتير يلا نبدأ الريفيو بتاعتنا.

موبايل realme C3 ريلمي C3

تصميم موبايل ريلمي C3

موبايل realme C3 خاماته بلاستيك عليها طبقة حماية جوريلا جلاس 3 مع فريم بلاستيك برضو سمكه 9 ملم ووزن الموبايل 195 جرام.

الفئة الاقتصادية أغلبها إن لم يكن كلها خامات بلاستيك فمفيش عيب في النقطة دي لأنك بتضحي بالخامات مقابل الإمكانيات، لكن المميز ان عندك طبقة جوريلا جلاس 3 مقاومة لرذاذ الماء حاجة بتحسن الماتريال، نقطة الوزن مش في صالح الموبايل لأنه وزنه تقيل مقارنة بالموبايلات البلاستيك وده راجع لبطاريته الضخمة، ممكن يبقى تقيل على الاستخدام بإيد واحدة.

تصميم وشكل الموبايل مميز اول مرة نشوف الديزين ده وانعكاسات شبه أشعة الشمس بتبدأ من عند الكاميرا وبتتوزع على بقية الموبايل شكلها وألوانها حلوين، لكن الحواف كبيرة خاصة الحافة السفلية، رصة الكاميرات كلاسيكية فوق بعض بالطول بروزها شبه كبير.

---

الشاشة:

الشاشة نوعها IPS بدقة اتش دي بلس بحجم 6.5 بوصة فيها نوتش مع كثافة بكسلات 270 بكسل في البوصة الواحدة، مع سطوع بقوة 480 نيتس.

تجربة الألوان الزاهية والدقة العالية والتجربة البصريه الممتعة والكلام ده كله مش موجود وده شئ طبيعي على الفئة الاقتصادية.

C3 سطوع شاشة ريلمي

لكن اللي مش طبيعي إنها على الرغم من انها شاشة IPS فئة اقتصادية أنا قولت هيبقى سطوعها تحت الشمس ضايع خالص لكن المفاجأة اني لقيت العكس، الشاشة سطوعها مقبول جداً ومحتوى الشاشة باين كويس حتى والشمس قوية.

---

منصة التشغيل:

موبايل ريلمي C3 بيشتغل بواجهة ريلمي الجديدة 1 Realme UI المبنية على نظام أندرويد 10 .

الموبايل ده أول موبايل يجي بواجهة ريلمي UI اللي تعتبر تطوير لواجهة أوبو 7 color OS واللي ميعرفش فريلمي كانت بتستخدم واجهة أوبو color OS لكن ريلمي قررت تعمل واجهة خاصة بيها، ومن حيث الواجهة فهي بقت أسلس وأسرع مع شكل أيقونات جديد وطريقة الاشعارات اتغيرت عن Color OS كمان موجود الدارك مود.

---

الذاكرة:

النسخة اللي نازلة مصر من الموبايل ده جاية بذاكرة داخلية 64 جيجابايت نوعها 5.1 eMMC مع ذاكرة وصول عشوائي 3 جيجا رام نوعها DDR4X وبيتيحلك تركب كارت ميموري خارجي حتى سعة 256 جيجابايت في مكان مخصص.

الذاكرة 64 كويسة ولو كنت اتمنى تيجي من نوع UFS الأسرع من eMMC لكن مش هنبقى طماعين، حجم الرامات برضو كويس على الفئة دي ولو إني كنت أفضل ريلمي تنزل النسخة 4 جيجا رام لكن ريلمي منزله الموبايل ده بتستهدف بيه فئه معينه عشان هتنزل ريلمي 6i اللي أعلى منه.

---

الأداء:

الموبايل فيه معالج ميديا تك الجديد Helio G70 بدقة تصنيع 12 نانو ثماني النواة بتردد بيوصل 2.0 جيجاهرتز، وجاي معاه معالج رسوميات Mali-G52 2EEMC2.

المعالج ده معالج قوي جداً في الفئة السعرية دي ويقدر ينافس لحد فئة 3000 و 4000 جنيه كمان، محقق 192 الف نقطة في اختبارات antutu متفوق على سناب دراجون 665 بفرق 24 الف نقطة واللي موجود في ريلمي 5 واللي موجود برضو في شاومي نوت 8 واللي هما في رينج سعر أعلى منه.

الأداء سريع في المهام اليوميه من سوشيال ميديا وتصفح وتشغيل أكتر من تطبيق في الخلفية يعني من الآخر المعالج مش هيقصر معاك خالص في المهام اليومية.

معالج الرسوميات بيقدر يشغلك ببجي على إعدادات جرافيك HD مع فريم ريت high بدون لاج أو تقطيع بإستثناء وانت بتخرج منها بياخد وقت بسيط تحس المعالج بيتصدم، لكن ككل أنا منبهر ان في موبايل اقتصادي بيشغل بابجي على إعدادات جرافيك هاي.

realme c3 لعبة بابجي علي

بالنسبة للعبة فورتنيت فهي مبتشتغلش بشكل رسمي على المعالج ده لسه محتاجه تظبط أمورها مع معالج ميديا تك الجديد -بس تقدر تلعبها عادي بس مش هتاخد نفس التجربة زي لما تكون اللعبة مدعومة بشكل رسمي.

C3 لعبة فورتنيت علي موبايل 

---

الكاميرات:

الموبايل جاي بثلاث كاميرات خلفية بدقة 12 ميجابكسل للكاميرا الأولى ببعد بؤري 28mm وبفتحة عدسة واسعة F1.8 بحجم بكسل 1.25 ميكرون مزودة بخاصية فيز ديتيكشن اوتو فوكس، والثانية جاية بدقة 2 ميجابكسل وفتحة عدسة F2.4 مخصصة لتصوير الماكرو، والكاميرا الأخيرة بدقة 2 ميجابكسل وبفتحة عدسة أضيق F2.4 وهي عدسة depth مسؤولة عن العمق، والكاميرات جاية مع فلاش LED.

realme c3 كاميرات

الكاميرا الرئيسية بتطلع نتايج مقبولة على أرض الواقع في ضوء النهار والصور فيها دايناميك رينج مقبول كمان فيه خاصية chomra boost اللي بتعزز الألوان وبتطلع ألوان مبهرة جداً، حتى على مستوى تصوير البورتريه معالجة الصور بقت أفضل وبقت تطلع لون بشرة أوقع لكن العزل احيان كتير بيغلط.

التصوير الليلي مش بتلاقي فيه تفاصيل واللي بيزود الطين بلة ان مفيش نايت مود.

كاميرا الماكرو بتخليك تصور حاجات على بعد 4 سم لكن بتطلع صور سوفت مفيهاش تفاصيل قد كده وألوانها ضايعه خالص أنا شايف إن ملهاش لازمه والأفضل لو كانت ريلمي حطت كاميرا الترا وايد بدالها.

بالنسبة بقى لتصوير الفيديوهات فالموبايل بيصور بدقة فل اتش دي بسرعة 30 إطار في الثانية مع إمكانية التصوير سلو موشن بسرعة 120 إطار في الثانية ومفيهوش أي نوع من انواع الثبيت.

لكن النتايج بتطلع مهزوزة جداً والكواليتي ضعيفة لأنه في الأول والأخر موبايل اقتصادي.

الكاميرا الأمامية دقتها 5 ميجابكسل ببعد بؤري 27mm بفتحة عدسة F2.4 وبحجم بكسل 1.12 ميكرون.

كاميرا السيلفي بتطلع لون البشرة مايل للأحمر لو الإضاءة ممتازة إنما لو الإضاءة قلت مش هتلاقي تفاصيل وهتطلع نتايج سيئة وصور مفيهاش نور.

---

السماعات:

سماعة خارجية واحدة مكانها تحت على اليمين بالإضافة لوجود منفذ السماعات 3.5 ملم.

جودة صوت السماعة من ضعيف لمتوسط في سماعات أفضل منها في الفئة دي، لكن صوت سماعات المكالمات تمام ومفيهوش مشاكل.

---

الاتصالات والحساسات:

واي فاي بيدعم خاصية الهوتسبوت لمشاركة الموبايل داتا.

بلوتوث الإصدار 5.0 ونظام التموضع العالمي GPS بالإضافة لدعمه موجات الراديو FM

لكن مبيدعمش خاصية الاتصال NFC أو حتى مستشعر IR.

مستشعر البصمة موجود في ظهر الهاتف سريع بشكل مقبول ويعتمد عليه وكمان بيدعم Face Unlock سريع برضو، أخيراً شوفنا بصمة في فئة C اللي مكنش بيجي فيها بصمة رغم انها كانت بتقدم قيمة كويسة وده كان بيخلي ناس كتير تروح لخيارات تانيه.

الموبايل فيه مستشعرات التسارع والتقارب وبوصلة ومستشعر الضوء.

الشبكة متوسطة بمعنى انك في الامكان المفتوحة هيستقبل معاك شبكة كويس جداً لكن في الأمكان المغلقة الشبكة هتبقى شرطة أو اتنين.

---

المنافذ:

منفذ يو إس بي 2.0 micro USB بيدعم OTG.

منفذ سماعات الرأس التقليدي 3.5 ملم

منفذين لتركيب شريحتين اتصال من النوع نانو SIM ومنفذ خاص لكارت ميموري.

---

البطارية:

بطارية realme C3 حجمها 5000 مللي أمبير بتشحن بقدرة 10 وات بتدعم الشحن العكسي اللي بتيحلك تستخدم الموبايل زي باور بانك وتشحن بيه موبايل تاني.

بطارية ريلمي سي 3

البطارية هتخليك تلعب براحتك وهتقعد معاك يوم ونص مستريح حوالي 10 ساعات شاشة مفتوحة من الاستخدام فوق المتوسط وده لأن المعالج والواجهة الجديدة موفرين في الطاقة.

العيب البسيط في بطئ الشحن 10 وات اللي هياخد اكتر من 3 ساعات على ما يملى البطارية لكن دي تعتبر تضحية عشان تاخد أداء جيمينج بسعر قليل.

---

عيوب موبايل realme C3

✖ الكاميرات متوسطة وعلى قدها مش أفضل حاجة في فئتها

✖ التجربة الصوتية سيئة

✖ لا يأتي مع الهاتف جراب ظهر أو سماعة أذن

✖ منفذ microUSB تقليدي وليس Type-C

✖ لا توجد لمبة الاشعارات ولا يوجد بديل لها

مميزات موبايل realme C3 ريلمي C3

✔ معالج قوي جداً أداءه ممتاز في المهام اليومية وهو أفضل معالج في هذه الفئة

✔ بطارية كبيرة 5000 مللي أمبير بتقعد 10 ساعات شاشة مفتوحة

✔ شاشة جيدة بمستويات سطوع عالية محمية بجوريلا جلاس 3

✔ مستشعر بصمة سريع وعملى

✔ تصميم مميز وجذاب

✔ يدعم تركيب شريحتين اتصال وكارت ميموري في وقت واحد

محتويات علبة موبايل realme C3

موبايل 3realme C متركبله اسكرينة بشكل مسبق

رأس شاحن 10 وات وكبل USB تقليدي micro USB

كتيب التعليمات والضمان ودبوس معدني لفتح منفذ الشريحة

الخلاصة

ريلمي C3 عمل طفرة كبيرة في الفئة الاقتصادية من حيث الأداء الأقوى في فئته السعرية سواء على مستوى المهام اليومية أو على مستوى الألعاب زائد بطارية قوية جداً هتساعدك تلعب براحتك وتصميم مميز ومختلف وخامات كويسة بتسعير ممتاز، فده بيخليه مرشح بقوة لأي حد عايز أداء لكن لو عايز تجربة كاميرات أفضل هتزود 200 جنيه وتروح لريلمي 5.

سعر موبايل realme C3

سعر موبايل ريلمي C3 الرسمي هو 2290 جنيه مصري و هيبقى عليه فلاش سيل ابتداءً من 24 مارس على موقع سوق.كوم بسعر 2190 للنسخة الوحيدة 64 جيجا مع 3 جيجا رام.

سعر موبايل realme C3

ريلمي عملت الصح ونزلت الموبايل بتسعير كويس وكان متوقع عشان يبقى أقل من ريلمي 5 اللي سعره 2550 واللي بيقدم نفس الامكانيات لكن مع كاميرات أفضل، فالتسعير ده حط الموبايل في فئة يقدر ينافس فيها بقوة
⚫ الشراء من سوق.كوم

⚫ الشراء من جوميا