مراجعة موبايل huawei nova 7i نجم في فئته لكن مع عيوب تافهه!! | هاتف بلس

مراجعة موبايل huawei nova 7i

مراجعة موبايل huawei nova 7i هواوي نوفا 7i

بعد الإعلان عنه بفترة طويلة قررت هواوي تنزل هاتف huawei nova 7i نوفا 7i في مصر بعد ما خدت خطوة جريئة ونزلت موبايلات بدون خدمات جوجل مش بس في الصين لأ عالمياً ومنهم مصر زي Y7p و 9X pro، واخر موبايل نزل مصر من السلسلة دي كان نوفا 3i ومن غير رغي كتير نخش في المراجعة.

هاتف huawei nova 7i هواوي نوفا 7i

تصميم موبايل نوفا 7i:

موبايل نوفا 7i بيجي بخامات بلاستيك حتى الفريم بلاستيك بسمك 8.7 ملم ووزن الموبايل 183 جرام.

فئة الموبايل السعرية أغلبها -إن لم يكن كلها- خامات إزاز حتى الخامات البلاستيك اللي في الموبايل ده رديئة وعرضه للتبصم والخدش تحس انه مش موبايل هواوي خالص، حتى وزنه تقيل مقارنة بالموبايلات البلاستيك، ومع تركيب الجراب وزنه بيبقى تقيل على الاستخدام بإيد واحدة.

تصميم الموبايل في نظري إبداعي بسيط بمعنى انه عندك حواف صغيرة بإستثناء الحافة السفلية، وعندك انعكاسات بالتدرج تأثيرها شيك وألوان جميلة بدون تكلف وفزلكة، رصة الكاميرات شبه رصة mate20 مع بروز متوسط للكاميرات بيتغطى مع الجراب.

---

الشاشة:

الشاشة نوعها IPS بدقة فل اتش دي بلس بحجم 6.4 بوصة مع وجود ثقب بانش هول مع كثافة بكسلات 398 بكسل في البوصة الواحدة.

بداية حجم الثقب كبير وبياخد العين ومش هتنساه بسهولة بس ممكن تلغيه عن طريق شريط اسود بيملى الشاشة مكان الثقب كمان الشاشة مش معلن ان عليها طبقة حماية فخليك حذر معاها.

عملياً بقى سطوع الشاشة قوي وألوانها زاهية وحيوية لدرجة انك ممكن تفتكرها شاشة أموليد لكن مشكلتها الكبيرة وانت بره في ضوء الشمس مش هتشوف الشاشة بوضوح وده من نظري الفرق الجوهري بين شاشات IPS والشاشات الأموليد.

---

منصة التشغيل:

موبايل نوفا 7i بيشتغل بواجهة هواوي 10 EMUI المبنية على أندرويد 10.

الموبايل ده زي ما انتو عارفين بدون خدمات جوجل بعد مشاكل أمريكا مع الصين، لكن تطبيق app gallery بتاع هواوي بيخليك تقدر تحمل منه خدمات جوجل بكل سهولة، لكن زي ما قولنا قبل كده الموضوع فيه مخاطرة لأن ممكن جوجل تقفل الموضوع ده بين عشية وضحاها.

---

الذاكرة:

الموبايل نازل بنسخة واحدة جايه بذاكرة داخلية بحجم 128 جيجابايت من نوع 2.1 UFS مع ذاكرة وصول عشوائي 8 جيجا رام نوعها LPDDR4X وبيتيحلك تركب كارت ميموري خارجي حتى سعة 256 جيجابايت لكن من نوع نانو ميموري مكان شريحة الاتصال التانية.

حجم الرامات مناسب جداً في فئته ويعتبر اول موبايل في فئة 4000 بحجم 8 جيجا رام، مع 128 ذاكرة داخلية وان كنا بدأنا نشوف مساحة ربع تيرا في الفئة المتوسطة زي 9X pro، المشكلة في ان نوع النانو ميموري مش منتشر قد كده وممكن تدوخ شوية على ما تلاقي الكارت ده.

---

الأداء:

الموبايل جاي بمعالج هواوي كيرين 810 بدقة تصنيع 7 نانو ثماني النواة بتردد بيوصل 2.27 جيجاهرتز، وجاي معاه معالج رسوميات Mali-G52 MP6.

المعالج ده معالج فلاجشيب حرفياً بيكافئ سناب دراجون 730 ويتفوق عليه وقريب جداً من سناب دراجون 845 أداؤه صاروخي في المهام اليوميه من سوشيال ميديا وتصفح وتشغيل تطبيقات كتير في الخلفية من الآخر بيديك الأداء اليومي اللي انت عايزه وزيادة.

ولما نبص على أداء معالج الرسوميات بيقدر يشغلك ببجي على إعدادات جرافيك HD مع فريم ريت high بدون أي لاج أو تقطيع وأنا شايف إن المعالج يقدر يشغلها على إعدادات أعلى من كده.

بالنسبة للعبة فورتنيت مبتشتغلش بشكل رسمي على المعالج ده -بس تقدر تلعبها عادي- مع إنها مدعومة على معالجات أقل لكن الفكره فكرة optimization

---

الكاميرات:

الموبايل جاي بأربع كاميرات خلفية بدقة 48 ميجابكسل بمستشعر سوني 586IMX للكاميرا الأولى ببعد بؤري 26mm وبفتحة عدسة واسعة F1.8 بحجم بكسل 0.8 ميكرون مزودة بخاصية فيز ديتيكشن اوتو فوكس، والثانية جاية بدقة 8 ميجابكسل وبفتحة عدسة أضيق F2.4 وهي عدسة ultrawide، والثالثة بدقة 2 ميجابكسل وفتحة عدسة F2.4 مخصصة لتصوير الماكرو، والكاميرا الرابعة بدقة 2 ميجابكسل وفتحة عدسة F2.4 مسؤولة عن قياس العمق، والكاميرات جاية مع فلاش LED.

الكاميرات عملية وبتطلع نتايج ممتازة على أرض الواقع في ضوء النهار والصور فيها كمية دايناميك رينج كتيرة -زي ما هواوي معودانا في كاميراتها- والتفاصيل والألوان مبهرة جداً خاصة في وضع 48 ميجابكسل وبتقل شوية لو بتصور على وضع 12 ميجابكسل.

التصوير الليلي مش بتلاقي فيه تفاصيل لكن لو شغلت النايت مود هياخد 5 أو 6 ثواني عشان وهيطلع تفاصيل أفضل بقليل حتى على مستوى السما بيبدأ يبان فيها تفاصيل.

كاميرا الالترا وايد بتطلع برضو صور شارب وفيها تفاصيل بس مش بجودة الكاميرا الرئيسية لكنها مقبولة، الحواف بتبقى سوفت مش شارب نتيجة التشوه اللي بيحصل لكن التشوه بيتعالج وبيسيب حواف ناعمه.

كاميرا الماكرو مقبولة بدقة 2 ميجابكسل بتقدر تصور حاجات على بعد 4 سم وبتطلع صور فيها تفاصيل مقبولة لكن كألوان ضايعة خالص تحسها مغيمة.

بالنسبة بقى لتصوير الفيديوهات فالموبايل للأسف مفيهوش تصوير 4K بيصور بدقة فل اتش دي بسرعة 30 إطار في الثانية ومفيهوش أي نوع من انواع الثبيت.

لكن النتايج سواء من الكاميرا الرئيسية أو كاميرا الالترا وايد فيها دايناميك رينج وتباين وألوان مقبولة ونويز قليل. والكاميرا الأمامية دقتها 16 ميجابكسل بفتحة عدسة F2.0 وبحجم بكسل 1.0 ميكرون.

كاميرا السيلفي قوية بتطلع لون البشرة مظبوط زي اللون الطبيعي في الإضاءة الممتازة إنما لو الإضاءة قلت التفاصيل بتروح لكن تقدر تشغل النايت مود وهيعوضلك التفاصيل لكن بيحتاج ثانية أو اتنين فحاول متهزش ايدك.

---

السماعات:

سماعة خارجية واحدة موجودة تحت على اليمين صوتها عالي وواضح بالإضافة لوجود منفذ السماعات التقليدي 3.5 ملم.

السماعة بتطلع جودة صوت كويسة وصوتها عالي وواضح حتى أعلى من 9X pro اللي نزل من فترة قريبة، بالإضافة لوجود مايك ثانوي لعزل الضوضاء أداءه كويس.

---

الاتصالات والحساسات:

واي فاي بيدعم WI-FI Direct وخاصية dual-band والهوتسبوت لمشاركة الموبايل داتا.

بلوتوث الإصدار 5.1 ونظام التموضع العالمي GPS

لكن مبيدعمش تشغيل الراديو ولا بيدعم خاصية الاتصال NFC أو حتى مستشعر IR.

مستشعر البصمة موجود في الجنب مع زرار الباور وده من نظري أفضل مكان للبصمة وهو سريع جداً ويعتمد عليه وكمان بيدعم Face Unlock.

الموبايل فيه كل المستشعرات التسارع والتقارب وبوصلة وحساس جيروسكوب وحساس الضوء.

استقبال الشبكة ممتاز مفيهاش مشاكل في معظم الظروف الحقيقة معالجات هواوي مفيهاش مشاكل مع الشبكة.

---

المنافذ:

منفذ يو إس بي من نوع Type-C 1.0 الإصدار الثاني.

منفذ سماعات الرأس التقليدي 3.5 ملم 

منفذين لتركيب شريحتين اتصال من النوع نانو SIM أو شريحة اتصال واحدة مع كارت ميموري من نوع نانو ميموري.

---

البطارية:

بطارية هواوي نوفا 7i بتيجي بسعة 4200 مللي أمبير بتدعم للشحن السريع بقدرة 40 وات.

البطارية هتكفي معاك يوم ونص مستريح وممكن يومين من الاستخدام المتوسط ولو استخدامك تقيل هتكفيك اليوم لأن معالج الكيرين 810 موفر في الطاقة.

الشاحن السريع قدرته 40 وات بيشحن البطارية كاملة في ساعة وخمس دقايق ودي ميزة قوية في الفئة السعرية دي مكناش بشوفها، من الآخر البطارية اختيار ممتاز أوي في الفئة دي.

---

عيوب موبايل huawei nova 7i

✖ عدم وجود خدمات جوجل بشكل رسمي

✖ خامات الهاتف بلاستيك عرضة للتبصم والخدش بسهولة

✖ لا يدعم تصوير 4K ولا يوجد به مثبت لتقليل الاهتزازات

✖ لا يدعم تركيب شريحتين اتصال وميموري في نفس الوقت حتى الميموري من نوع نانو ميموري سعره غالي ومش منتشر

✖ شاشة IPS وليست AMOLED مع اننا رأينا الشاشات الأموليد في هذه الفئة

✖ لم يتم الإعلان رسمياً عن وجود طبقة حماية

✖ لا توجد لمبة الاشعارات

مميزات موبايل هواوي نوفا 7i

✔ معالج قوي أداءه ممتاز في المهام التقيلة وهو من أفضل معالجات فئته

✔ بطارية كبيرة 4200 مللي أمبير بتقعد 7 ساعات وأكتر شاشة مفتوحة

✔ شاحن سريع 40 وات بيشحن البطارية كاملة في مجرد ساعة

✔ مستشعر البصمة مع زرار الباور مكانه ممتاز وسريع وعملى

✔ أداء الكاميرات الخلفية ككل جيد في معظم ظروف الإضاءة

✔ كاميرا السيلفي من أحسن كاميرات السيلفي في فئتها

محتويات علبة موبايل huawei nova 7i

موبايل huawei nova 7i متركبله اسكرينة بشكل مسبق
رأس شاحن سريع 40 وات وكبل USB من نوع Type-C
جراب ظهر للحماية
كتيب التعليمات والضمان ودبوس معدني لفتح منفذ الشريحة
سماعة أذن بمنفذ 3.5 ملم

الخلاصة

موبايل نوفا 7i قدم أداء قوي على مستوى المهام اليوميه وأداء جيد في الألعاب زائد بطارية قوية جداً في فئته وتعتبر الأفضل وسعره معقول وده مخليه منافس قوي في فئته السعرية، بس خاماته رديئة فلو ناوي على الموبايل ده يبقى تركبله الجراب ومتخلعهوش أبداً.

سعر موبايل huawei nova 7i

التسعير الرسمي من هواوي ل nova 7i هو 4200 جنيه مصري للنسخة الوحيدة المتوفرة 128 جيجا مع 8 جيجا رام مع سمارت باند 4 هدية من هواوي قيمتها حوالي 500 جنيه.

الحقيقة التسعير ده ممتاز في الفئة دي وأنا شايف إن اكتر ناس استفادت من مشاكل الصين وأمريكا هما مستخدمين هواوي لأن أسعارها بقت أرخص. 
الشراء من سوق.كوم