مراجعة هاتف 5.3 nokia نوكيا 5.3
هاتف جديد من نوكيا تم طرحه في السوق المصري وهو Nokia 5.3 نوكيا 5.3 ولأول مرة خالفت نوكيا سياستها بأنها تنزل موبايل بتسعير غالي وبعدها تقلل السعر كتير في المحلات لأ الموبايل ده نازل بسعر لقطة بالعكس السعر ممكن يزيد مع الوقت خلونا نراجع الموبايل حتة حتة ونشوف بيقدم ايه.
هاتف nokia 5.3 نوكيا 5.3
تصميم nokia 5.3
الهاتف نازل بخامات بلاستيك بوليمر مع وجود طبقة حماية جوريلا جلاس 3 على الشاشة ومع إطار بلاستيكي بسماكة 8.5 ملم ووزن الموبايل ككل 185 جرام.
الخامات البوليمر زي ما نوكيا بتسميها عبارة عن بلاستيك مضغوط ومقوي عشان يتحمل صدمات اكبر ، وزن الموبايل متوسط 185 جرام نظراً للخامات البلاستيكية المستخدمة في الهاتف وتقدر تستخدمه بإيد واحدة بسهولة.
تحت
دايرة الكاميرات موجود مستشعر البصمة في شكل دائري مدفون حاجة بسيطة جوه الهاتف عشان
ايدك تقدر تروحله بسهوله وتحت البصمة موجود اسم نوكيا بالطول، كله ده تمام لكن
اللي مش تمام هو وجود زرار مخصص لجوجل اسيستانت على الشمال للأسف الزرار ده ملوش
تخصيص ومتعرفش تخليه يعمل حاجة تاني وعلى الأغلب انت مش هتستخدم مساعد جوجل فممكن
تلغي الزرار ده وتريح دماغك.
الشاشة:
شاشة IPS LCD بحجم 6.55 بوصة محمية بطبقة جوريلا جلاس 3 بدقة اتش دي بلس 1600 × 720 بكسل مع كثافة بكسلات 268 بكسل في البوصة الواحدة بتصميم النوتش قطرة الماء waterdrop وتستحوذ الشاشة على 82.3% من الواجهة بأبعاد 20:9.
مش هنعيب على الشاشة كونها اتش دي بس لأن الفئة دي نصها شاشات فل اتش دي والنص التاني اتش دي بس فهي نقطة تفضيلات واولويات فلو عايز شاشة فل اتش دي ممكن تفكر في شاومي ريدمي 9 مثلاً.
طب الشاشة دي ذات نفسها أداءها ايه؟ الحقيقة أداءها
خرافي وانا متوقعتهوش الشاشة ألوانها زاهية وسطوعها تحت الشمس عالي وواضح وزوايا
الرؤية كويسة جداً بالإضافة لوجود طبقة حماية جوريلا جلاس 3 ، من الآخر الشاشة دي
من أحسن الشاشات في فئتها السعرية ناقصها بس تبقى فل اتش دي وتاخد تقييم عشرة من
عشرة.
الواجهة:
الموبايل بيشتغل بواجهة أندرويد ون الأندرويد الخام 10.
واجهة الأندرويد الخام ليها مميزات كتير زي نقطة ضمان
التحديثات لسنتين قدام وتلاتة للتحديثات الأمنية وكمان بتبقى خفيفة جداً على
المعالج وبتبقي سلسة وسهلة الاستخدام لكن عيبها الأكبر انها مفيهاش إضافات كتير أو
ويدجات زي الواجهات المخصصة بكل شركة.
الذاكرة:
الهاتف يأتي مع ذاكرة داخلية 64 جيجابايت نوعها 5.1 eMMC مع رامات 4 جيجا من نوع LPDDR4x وبيتيحلك تركب كارت ميموري خارجي حتى 512 جيجابايت في منفذ مخصص.
انا معنديش اعتراض على مساحة الذاكرة الداخلية أو حتى
الرامات لأنهم أفضل من المنافسين بإستثناء موبايلات انفنكس اللي بتهتم بالحتة دي
اكتر لكن عندي اعتراض على نوع الذاكرة كان نفسي يبقى UFS الأسرع.
الأداء:
الموبايل نازل بمعالج سناب دراجون 665 ثماني النواة بدقة تصنيع 11 نانو بتردد بيوصل 2.0 جيجاهرتز، وجاي معاه معالج الرسوميات Adreno 610.
شريحة سناب دراجون 665 شريحة تعتبر كويسة لحالها ومناسبة جداً على الفئة السعرية اللي الموبايل فيها، وطبيعي جداً انها تكون أقل من معالجات ميدياتك الجديدة المخصصة للألعاب زي G70 اللي في ريلمي C3 أو G80 الموجودة في شاومي ريدمي 9 عالعموم المعالج محقق 164 ألف نقطة في اختبارات Antutu للبنش مارك متأخر بفرق بسيط عن المنافسين لكن المميز في شريحة سناب دراجون 665 عن المنافسين استهلاكها الأقل للطاقة وعدم السخونة مع الألعاب والأداء المستقر طول الوقت وده عن تجربة.
الناس اللي مش هاممها صداع الأرقام وعايزه تعرف الأداء على أرض الواقع فأداء المعالج كويس في الاستخدام اليومي من سوشيال ميديا وتصفح وتبديل بين البرامج واللي مساعد في كده واجهة الأندرويد الخام بدون إضافات كتير وبالتالي بتبقى بسيطة وخفيفة على المعالج يعني مش هتحس بتهنيح ولا حاجه من دي.
معالج الرسوميات 610 Adreno أداءه مقبول في الألعاب بيشغلك ببجي على إعدادات جرافيك balanced مع فريم ريت medium فقط.
الكاميرات:
في تصوير البورتريه الموبايل احيانا يظبط لون البشرة وفي أغلب الوقت مبيظبهوش لدرجة ان ممكن البشرة تلسع منك لو بتصور في شمس قوية لكن باستخدام تطبيق جوجل كاميرا الصورة بتتحسن كتير وبيظبط لون البشرة يعني اكتر وضع انت محتاج فيه لجوجل كاميرا هو الوضع ده.
الكاميرا الالتراوايد بتطلع صور متواضعة جداً يعني بالكاد مقبولة وطبعاً ده موبايل فئة اقتصادية مش مطلوب منه عدسة التراوايد خرافية في حين ان في منفسين للموبايل ده مفيهمش كاميرا التراوايد من الأساس.
كذلك الأمر بالنسبة للكاميرا الماكرو مجرد سد خانة نتايجها ضعيفة جداً.
في تصوير الفيديوهات الموبايل بيصور فيديوهات بدقة فور كيه أو فل اتش دي بسرعة 30 إطار في الثانية.
الموبايل كويس في تصوير الفيديوهات وبيقدر يصور فور كيه بتفاصيل كتير وألوان حلوة الحقيقة، وهناك ميزة أخرى هي وجود مايكروفون ثانوي لعزل الضوضاء أثناء تصوير الفيديوهات، لكن للأسف الموبايل مفيهوش أي تثبيت أو مقلل الاهتزازات فتحاول تثبت ايدك جامد وإلا فالنتيجة النهائية هتطلع مهزوزة.
الكاميرا الأمامية دقتها 8 ميجابكسل بفتحة عدسة f2.0.
السيلفي هنا سيئ جداً مش ظابط أي حاجة عزل مش مظبوط
وضعيف ألوان مبهته لون البشرة مش مظبوط ومش واقعي ده غير إن البشرة ممكن تلسع كتير
منك لو بتصور في حته فيها شمس قوية والتفاصيل قليلة النويز بيبدأ يظهر مع أقل
قللان للإضاءة والأسوء هو عدم وجود نايت مود زي الكاميرا الاساسية، للأسف نوكيا
بوظت تركيبة الكاميرات بكاميرا السيلفي دي.
السماعات:
سماعة خارجية واحدة مونو مكانها تحت على اليمين بالإضافة لوجود منفذ السماعات التقليدي 3.5 ملم كما يدعم الهاتف مايك ثانوي لعزل الضوضاء.
صوت الموبايل عالي وواضح
لكن مش أعلى حاجة لكن على أي حال التجربة الصوتية بشكل عام جيدة جداً، صوت سماعات
المكالمات تمام ومفيهوش مشاكل، وكذلك صوت سماعات الأذن.
الاتصالات
والمستشعرات:
واي فاي بيدعم واي فاي
دايركت وهوتسبوت.
بلوتوث 4.2 ونظام التموضع العالمي GPS بالإضافة لدعمه موجات الراديو FM والجميل انه يدعم أيضاً خاصية الاتصال قريب المدى NFC.
البصمة موجودة في ضهر الهاتف، بصمة متوسطة من حيث السرعة لا هي سريعة جداً ولا هي بطيئة حاجة كده في النص لكنها دقيقة وعملية، كمان موجود Face Unlock لكنه بطئ جداً وانا شخصياً بفضل البصمة في حوار امان الموبايل.
منفذ اليو اس بي هنا 1.0 USB Type-C الجيل الأول الإصدار التاني بيدعم خاصية الاتصال العكسي وخاصية OTG.
المستشعرات موجود منها فقط
مستشعر التسارع والتقارب ومستشعر الضـوء.
للأسف نوكيا شالت مستشعر
مهم جداً وهو مستشعر الجيروسكوب المسؤول عن ثبات الفيديو وعن تشغيل تطبيقات الواقع
الافتراضي.
نقطة الشبكة كويسة ومفيهاش
مشاكل كعادة موبايلات نوكيا.
البطارية:
بطارية nokia 5.3 بتيجي بحجم 4000 مللي أمبير بتشحن بالسرعة التقليدية 10 وات.
البطارية بتصمد حوالي 6 أو 7 ساعات بالكتير شاشة مفتوحة وقت مش كبير في عالم الأرقام هذه الايام لكن جيد جداً بالنظر لحجم البطارية وده بسبب أمرين معالج سناب دراجون 665 يعتبر موفر كويس للطاقة والأمر التاني الواجهة الخام للأندرويد دي اكتر واجهة موفرة للطاقة، بشكل عام البطارية إلى حد كبير جيدة جداً لكنها ليست مميزة بالنظر للمنافسين وكنت أتمنى لو تكون على الأقل 5000 مللي خاصة ان موبايلات كتير في نفس رينج سعرها بتيجي بسعة 5000 مللي أمبير وده بقى يعتبر ال standard لكن على العموم البطارية هتقضي معاك يوم ونص او يومين من الاستخدام العادي المتوسط.
الأمر السيئ في موضوع
البطارية هو الشاحن التقليدي اللي بيجي بقوة 10 وات بيشحن البطارية كاملة 100% في
3 ساعات إلا ربع وقت طويل جداً الحقيقة، وهنا نوكيا لا قدمت بطارية كبيرة زي
المنافسين ولا حتى قدمت شاحن سريع يعوضك عن حجم البطارية، وعشان أداء البطارية
الكلى هديله تقييم 7.5 من عشرة.
عيوب هاتف nokia 5.3
✖ شاشة اتش دي بلس فقط وليست فل اتش دي
✖ الحواف حول الشاشة كبيرة خاصة الحافة السفلية
✖ كاميرا السيلفي ضعيفة مقارنة
مع المنافسين
✖ شاحن تقليدي 10 وات فقط ولا
يدعم الهاتف الشحن بسرعة اكبر من هذه
✖ لا يوجد مستشعر جيروسكوب
✖ لا يأتي مع الهاتف اسكرينة
حماية وقد تجد صعوبة في وجودها أو وجود اكسسوارات نوكيا بشكل عام في المحلات
مميزات nokia 5.3
✔️ أندرويد خام يضمن التحديثات لفترة طويلة
✔️ ألوان وسطوع الشاشة ممتازين
✔️ أداء مستقر أغلب الوقت
✔️ الهاتف يتيح تصوير فيديوهات بدقة فور كيه
✔️ وجود لمبة الاشعارات ووجود خاصية NFC
محتويات علبة هاتف 5.3 nokia
هاتف 5.3 nokia
رأس شاحن تقليدي 10 وات مع كبل يو اس بي Type-C
جراب ظهر شفاف للحماية ودبوس معدني لفتح
درج الشريحة مع كتيب التعليمات ودليل الاستخدام
سماعات الأذن handfree بمنفذ 3.5 ملم
الخلاصة
هاتف nokia 5.3 لا يقدم أفضل أداء في فئته لكنه يقدم أداء مستقر طول الوقت نوكيا 5.3 لا يقدم أفضل كاميرات لكنه يقدم تجربة تصوير كويسة جداً وتصبح أفضل مع تحميل جوجل كاميرا الهاتف يقدم خامات كويسة أيضاً ولم يظهر بالهاتف مشاكل أو عيوب مع الوقت بالإضافة إلى اسم نوكيا فالهاتف مناسب جداً لمن يبحث عن هاتف مضمون من شركة مضمونة.
سعر هاتف 5.3 nokia نوكيا 5.3
سعر موبايل nokia 5.3 في المحلات بيتراوح بين 2700 جنيه ل 2900 جنيه مصري للنسخة الوحيدة 64 مع 4 جيجا رام.
تقيمنا للموبايل ككل 8 من عشرة 8/10
