إعلان

Header Ads

مراجعة موبايل Samsung Galaxy A71 صاحب الغلطة التي لا تغتفر! | هاتف بلس

2/02/2020
موبايل سامسونج ايه 71, سامسونج جالاكسي A71, سامسونج ايه 71, سامسونج a71, سامسونج a70, سامسونج a7, سامسونج a50, سعر سامسونج a70,
مراجعة موبايل Samsung Galaxy A71

موبايل 71Samsung A سامسونج A71

سامسونج نزلت A51 للسوق المصري من حوالي شهر ونص ولقت نجاح ليه فقررت تنزل أخوه الكبير A71 خليفة أشهر موبايل في مصر 70A واللي بيعد ضمن الفئة المتوسطة العليا واللي الشركات بتحاول تبدع وتحطلك حاجات مميزة تخليك تزود شوية وتسيب الفئة المتوسطة، وطبعاً سلسلة A من سامسونج أكتر سلسلة سامسونج مبيعاً خاصة في مصر والكل بيستنى موعد نزول موبايل جديد في السلسلة دي بحماس وانهارده هنراجع موبايل Samsung A71 سامسونج A71 واللي سامسونج زهقتنا إعلانات عنه في كل حتة ولكن يبدو ان سامسونج بتعوض فلوس الإعلانات في أسعار الموبايلات وهنتكلم عن النقطة دي لاحقاً.

نظرة تفصيلية على هاتف Samsung A71

أولاً التصميم وبنية موبايل سامسونج A71
موبايل سامسونج A71 بيجي بأبعاد 76 × 163.6 ملم وسمكه 7.7 ملم ووزن الهاتف يصل إلى 179 جرام كمان الموبايل بيجي بضهر بلاستيك بس سامسونج ضايفاله لمعان وانعكاسات بألوان الطيف يحسسك ان هو إزاز بس هو في الأول والأخر بلاستيك ومتغطي بطبقة حماية جوريلا جلاس 3 وفريم من البلاستيك برضو ومتوفر بالألوان الأسود والفضي والأزرق واللون الوردي .
نقطة إن الموبايل يجي بخامات بلاستيك في رينج سعر 7000 جنيه دي نقطة مش مقبولة تماماً ممكن نعديها في A51 عشان سعره أرخص حوالي 2500 جنيه بس الكارثة إن البلاستيك ضعيف جداً ممكن مع الضغط عليه جامد يتني منك وده فيديو بيبينلك قد ايه الموبايل ضعيف


لكن كديزين فالموبايل شياكة وخفيف نسبياً من أخف الموبايلات بحجم 6.7 بوصة بس صعب تستخدمه بإيد واحدة، ورصة الكاميرات الأربعة بشكل حرف L اللي ممكن ناس تحبها وناس لأ بس ده بقى التريند، مع بروز للكاميرات كبير سنة بسيطة عن A51  بس الأضمن إنك تركبله جراب.

موبايل سامسونج ايه 71, سامسونج جالاكسي A71, سامسونج ايه 71, سامسونج a71, سامسونج a70, سامسونج a7, سامسونج a50, سعر سامسونج a70,
بروز الكاميرات في سامسونج A71 و A51

سامسونج قفلت الواحد من نقطة الخامات البلاستيك وعشان كده لو واخد قرار انك تجيب الموبايل فلازم تركبله جراب متخلعهوس وتحاول تستخدمه بلطف.

شاشة الهاتف :
الشاشة من نوع Super AMOLED موجود عليها طبقة حماية جوريلا جلاس 3 بأبعاد 20:9 بحجم 6.7 بوصة بدون حواف تقريباً مع وجود ثقب صغير بانش هول وتستحوذ الشاشة على 87.2% من جسم الهاتف اما الدقة فهي فل اتش دي بلس 2400 ×1080 بكسل مع كثافة بكسلات 393 بكسل في البوصة الواحدة .

شاشات سامسونج الحقيقة محدش بيختلف عليها ملهاش منافس، بتقدم تجربة مشاهدة ممتازة ودرجة عالية من السطوع ودرجة منخفضة من السطوع وألوان زاهية حتى في ضوء الشمس،الصراحة تجربة مشاهدة الفيديوهات والأفلام ممتعة للغاية، لكن في نقطة لحظتها على التصميم إن ثقب كاميرا السيلفي أكبر من A51 مع إن المفروض العكس, الثقب الكبير هياخد عينك وانت بتتفرج لحد ما تتعود عليه وتبدأ تنساه .
موبايل سامسونج ايه 71, سامسونج جالاكسي A71, سامسونج ايه 71, سامسونج a71, سامسونج a70, سامسونج a7, سامسونج a50, سعر سامسونج a70,
حجم الثقب في سامسونج A71 و A51



منصة التشغيل :
موبايل A71 بيشتغل بواجهة سامسونج 2.0 One UI المبنية على أندرويد 10.
الموبايل جاي بأحدث أنظمة تشغيل على مستوى العالم حالياً سواء الأندرويد أو الواجهة 2 One UI اللي سلسة في التعامل ومفيهاش أنيميشن كتير واللي ممكن نبقى نعملها موضوع مخصص ليها.


الذاكرة :
النسخة اللي نازلة مصر جايه بذاكرة داخلية بحجم 128 جيجابايت مع ذاكرة وصول عشوائي رامات بسعر 8 جيجا من نوع UFS Storage 2.1 وينفع تركب كارت ميموري خارجي حتى سعة 512 جيجابايت في منفذ مخصص.


الأداء :
الموبايل جاي بمعالج سناب دراجون 730G على حد وصف شركة سامسونج ثماني النواة بأقصى تردد يصل 2.2 جيجاهرتز للنواتين شغال بمعمارية 64 بت وبدقة تصنيع 8 نانوميتر، وجاي معاه معالج رسوميات 618 Adreno.

في الفئة المتوسطة العليا هتلاقي نوعين من الموبايلات موبايلات إما بمعالج فلاج شيب ويشلك حاجة من أي حتة تانية أو موبايلات بمعالجات أقل من الفلاج شيب بحاجة بسيطة مع مميزات تانية سواء على مستوى الشاشة أو البطارية أو الرامات إلخ، وهنا سامسونج اختارت النوع التاني.
هل معنى كده ان الأداء وحش بالعكس أداء الموبايل صاروخ مع واجهة سامسونج الجديدة اللي شالو أنيميشن كتير فالمعالج حرفياً هيديك أداء صاروخي، وكمان في الألعاب هتلعب بابجي على إعدادات جرافيك HD وانت مرتاح والموبايل مش بيسخن معاك ممكن عشان الجو ساقع ومش هيسقط منك فريمات إلا كل ساعة كده لما يسقط منك فريم ولا حاجة،وعايزك تبقى عارف إن معالج زي ده موجود في موبايل أوبو رينو 2 بسعر أكتر من 2500 جنيه وبرضو نفس المعالج موجود في MI 9T بسعر أقل 1500 جنيه .


الكاميرا :
الموبايل جاي بكاميرا خلفية رباعية الكاميرا الأولى بدقة 64 ميجابكسل ببعد بؤري 26mm وبفتحة عدسة واسعة f1.8 بحجم بكسل 0.8 ميكرون مع مستشعر سامسونج S5KGW1 مزودة بخاصية الفيز ديتيكشن اوتو فوكس، أما الثانية فبدقة 12 ميجابيكسل ببعد بؤري 12mm وبفتحة عدسة أضيق f2.2 وهي عدسة ultrawide للتصوير بزوايا عريضة، والكاميرا الثالثة فبدقة 5 ميجابكسل وفتحة عدسة f2.4 مخصصة لتصوير الماكرو، والكاميرا الرابعة بدقة 5 ميجابكسل وفتحة عدسة f2.4 مسؤولة عن قياس العمق، والكاميرات جاية مع فلاش خلفي أحادي LED. 

سامسونج ركبت التريند بتاع الأربع كاميرات وال 64 ميجابكسل وبالنسبة لأداء الكاميرات على أرض الواقع، الصور وانت بتصور بيكون فيها هايلايت كتير بس بعد ما تلقطها بتشوف كمية دايناميك رينج رهيبة، فسامسونج أبدعت في معالجة الصور حقيقة، بالإضافة لكمية التفاصيل والشارب والوضوح وحاجات كتير بس في نقطة بسيطة التصوير الليلي محتاج يتظبط سنة بسيطة في وضع البورتريه أحياناً يعزل واحيان لأ وأحيانا بيغلط في العزل.
الكاميرات الباقية بقى فكاميرا الالترا وايد بتديك زوايا عريضة جداً مش 118 درجة والكلام ده الزاوية هنا 123 درجة وفي الموبايل ده قدرت سامسونج تعالج التشوه distortion الكبير اللي كان بيطلع من كاميرا الترا وايد في موبايلات سامسونج قبل كده يعني صراحة سامسونج تستحق لقب أفضل كاميرا وايد أنجل.
وكاميرا الماكرو اللي محدش بيستخدمها غير كل فين وفين فسامسونج ظبطتها هي كمان وبتديلك شارب كتير بس مش أفضل كاميرا ماكرو لسة.
بالنسبة بقى لتصوير الفيديوهات فالموبايل بيصور بدقة فور كيه بسرعة 30 إطار في الثانية أو فل اتش دي بسرعة بتوصل 960 إطار في الثانية الواحدة يعنى صباح السلو موشن عالآخر ويوجد مثبت إلكتروني أثناء تصوير الفيديو لتقليل الاهتزازات الناتجة عن الحركة.

بالنسبة للكاميرا الاماميه تأتي بدقة 32 ميجابكسل ببعد بؤري 26mm بفتحة عدسة f2.2 وبحجم بكسل 0.8 ميكرون مع مستشعر سامسونج 1S5KGD وتصور فيديو بدقة فل اتش دي بسرعة 30 إطار في الثانية الواحدة .
كاميرا السيلفي فيها تحديد الأطراف وعزل ممتاز ولون بشرة واقعي بالنهار وبالليل جودتها مقبولة لكن أتمنى أن الداينامك رينج بتاعها يتحسن عن كده وتبقى زي الكاميرا الخلفية وساعتها سامسونج تاخد 10 من 10 في حتة الكاميرات.


سماعة الهاتف :
سماعة خارجية واحدة Mono تحت على اليمين صوتها عالي وواضح بالإضافة لوجود منفذ السماعات التقليدي mm3.5 
السماعة بتطلع جودة صوت كويسة وصوتها عالي بس مش أعلى حاجة الصوت مونو مش ستريو فدى النقطة اللي تفسد عليك تجربك مشاهدة الفيديوهات والأفلام، أما بالنسبة لسماعة المكالمات فصوتها عالي ومفيهوش مشاكل .


الاتصالات والحساسات :
واي فاي 802.11 بترددات a/b/g/n/ac بالإضافة لدعمه خاصية dual-band وخاصية WI-FI Direct والهوتسبوت لمشاركة الموبايل داتا.
بلوتوث الإصدار 5.0 مع دعمه لخاصية A2DP وخاصية LE 
نظام التموضع العالمي GPS مع دعمه لأنظمة ملاحة A-GPS ونظام الملاحة GLONASS ونظام BDS ونظام الملاحة GALILEO
يوجد دعم لموجات الراديو FM ودعم لخاصية الاتصال قريب المدى NFC، لكن لا يدعم الهاتف مستشعر الأشعة تحت الحمراء كالتي توجد في أجهزة شاومي.
مستشعر البصمة أوبتيكال مدمج في شاشة الهاتف من الأسفل وعندي عليه تعليق بسيط انه أينعم اتحسنت كتير عن الإصدار 70A واللي كانت فضيحة لسامسونج بس لسه مش سريع بما فيه الكفاية يعني بياخد ثانيه ونص ثانيتين على ما يفتح لكن تقدر تعتمد عليه بشكل كلي كمان الموبايل بيدعم Face Unlock.
الموبايل فيه مستشعرات التسارع والتقارب وتوجد بوصلة وحساس جيروسكوب لدعم تشغيل تطبيقات الواقع الافتراضي وحساس الضوء.


المنافذ :
منفذ يو إس بي Type-C 1.0 الجيل الأول الإصدار التاني مع دعمه لخاصية الاتصال العكسي بالإضافة لخاصية OTG.
منفذ سماعات الرأس التقليدي 3.5mm jack
منفذين لتركيب شريحتين اتصال من النوع نانو SIM ومنفذ خاص لكارت الميموري.


البطارية :
بطارية سامسونج A71 من نوع بوليمرات الليثيوم غير قابلة للازالة بسعة 4500 مللي أمبير بتدعم الشحن السريع بقدرة 25 وات لكنها مش بتدعم الشحن اللاسلكي.
البطارية يدوبك هتقضي معاك يوم ونص مستريح من الاستخدام المتوسط لكن الجميل انها بتشحن بقدرة 25 وات يعني لما تفضى هتشحن في ساعة وتلت ساعة ونص بالكتير، نفسنا نشوف الشركات تنزل موبايلات تدعم الشحن اللاسلكي في رينج السعر ده.


عيوب موبايل Samsung A71 سامسونج A71

✖ الموبايل جاي بخامات بلاستيك ضعيفه سهلة الكسر وعرضة للتبصم
✖ الثقب الموجود في الشاشة أكبر من اللي في 51A
✖ البصمة بطيئة شوية بس مفيهاش مشاكل
✖ مفيش لمبة الاشعارات
✖ مفيش مستشعر الأشعة تحت الحمراء IR كما في هواتف شاومي
✖ سعر الموبايل غالي حبتين بالنسبة لإمكانياته

مميزات الموبايل سامسونج A71 :

✔ وزن الهاتف خفيف مع حواف صغيرة جداً حتى الحافة السفلية
✔ تقدر تستخدم شريحتين اتصال وكارت ميموري في وقت واحد
✔ شاشة سوبر اموليد بألوان زاهية ودرجات سطوع كبيرة
✔ أحدث واجهة من سامسونج مع أحدث إصدار أندرويد
✔ أداء الكاميرا الخلفية ممتاز بتدي صور واقعية جدا خاصة بالنهار وداينامك رينج عالي

محتويات علبة موبايل Samsung A71

موبايل سامسونج A71 متركب عليه اسكرينة مسبقاً
شاحن سريع 25 وات وكبل USB Type-C
جراب ظهر للحماية
كتيب التعليمات والضمان ودبوس معدني لفتح منفذ الشريحة
سماعة أذن

الخلاصة
موبايل Samsung A71 بعد ما قدم تركيبة كويسة من شاشة سوبر اموليد حلوة وشبكة مستقرة وبطارية كبيرة 4500 مللي أمبير بتشحن بقدرة 25 وات ومعالج 730G ومعالج رسومي قوي 618 Adreno بيديك أداء قوي في الألعاب، لكن خامات الموبايل رديئة بتخليه يتكسر بسهولة فلو انت من النوع اللي بيتخانق بالموبايل فأحسنلك تبعد عنه تماماً وسعره المبالغ فيه مش بيخلي ضمن ترشيحاتنا الأولية إلا إذا سعره نزل عن كده وكان استخدامك للموبايل بحذر.


سعر موبايل 71Samsung A سامسونج 71A

التسعير الرسمي من سامسونج ل Samsung A71 هو 6999 جنيه مصري للنسخة الوحيدة المتوفرة للأسواق المصرية 128 جيجا مع 8 جيجا رام متاح للحجز المسبق بشكل رسمي مع هدية ساعة galaxy fit E وكارت ضمان 6 شهور على الشاشة والتسليم بداية من شهر فبراير.

سعر الموبايل مبالغ فيه وميستحقش اكتر من 6500 جنيه بس لو عايز تشتري الموبايل استنى اسبوعين تلاتة من تاريخ نزوله لما سامسونج تلم فلوس إعلاناته بتلاقي التجار حرقوا الأسعار وبينزل سعره كتير وأتوقع هينزل سعره ل 6300 وربما 6000 جنيه.